သျှမ်းပြည် မြောက်ပိုင်း သီပေါမြို့တွင် ယမန်နေ့ (ဇွန် ၂၃)ရက် ည (၉ )နာရီ ဝန်းကျင်တွင် စစ်ကောင်စီ လက်ချက်ဖြင့် အရပ်သား(၁)ဦး ကျည်ထိမှန်သေဆုံးခဲ့ပြီး၊ မွေးကင်စ ရက်သားကလေး ကျန်ခဲ့ကြောင်း စုံစမ်းသိရသည်။
သီပေါမြို့ မြန်မာရပ် ရပ်ကွက်ရုံးရှေ့တွင် ယမန့်နေ့ ည ၉ နာရီဝန်းကျင်တွင် ဆိုင်ကယ်စီးလာသည့် လူငယ် (၂) ဦးကို စစ်ကောင်စီမှ လိုက်ပစ်ရာတွင် လူငယ်တစ်ဦး ခေါင်းကျည်းထိမှန်ပြီး သေဆုံးသွားကြောင်း၊ ထို သေဆုံးမှုကို ဆိုင်ကယ်မှောက်ပြီး သေဆုံးသည်ဟုသာ ပြောဆိုရင် လည်း စစ်ကောင်စီက ပြောဆိုခဲ့သည်။
စစ်ကောင်စီ မှ ပစ်ခတ်မှုကြောင့် ဦးခေါင်းထိမှန်ပြီး သေဆုံးသွားသူသည့် အသက်(၂၇)နှစ် အရွယ် ကိုအောင်မင်းသူ ထံတွင် မွေးကင်းစ (၂၂)ရက်သာရှိသေးသည့် ကလေးငယ်တစ်ဦး ကျန်ရှိနေကြောင်း သိရသည်။
“ မနေ့က လူငယ် (၂)ဦး ဆိုင်ကယ်စီးလာတယ်။ မြန်မာရပ် ရပ်ကွက်မှာ ကင်းလှည့်နဲ့ တွေ့တော့ သူတို့ကိုရပ်ခိုင်းတာ၊ မရပ်လို့ဆိုပြီး ပစ်တယ်။ သေနတ်သံ (၈)ချက် လောက်ရှိတယ်။ ကိုအောင်မင်းသူ ရဲ့ ဦးခေါင်းကိုထိပြီး သေဆုံးသွားတယ်။ သူမှာက (၂၂)ရက်သာရှိသေးတဲ့ကလေး ကျန်ခဲ့တယ်” ဟု သီပေါမြို့ခံ တစ်ဦး က သျှမ်းသံတော်ဆင့် ကို ပြောသည်။
ထို့အပြင် ကိုအောင်မင်းသူနှင့် အတူ လိုက်ပါသည့် လူငယ်(၁)ဦးသည် ကျည်အနည်းငယ်သာထိမှန်ခဲ့ကြောင်း သိရသည်။
အဆိုပါ လူငယ်သည် နိုင်ငံရေး ကိစ္စ ပါဝင်ပတ်သက်ခြင်းမရှိကြောင်း၊ PDF တပ်ဖွဲ့ဝင်လည်းမဟုတ်ကြောင်း၊ သို့သော် စစ်ကောင်စီဘက်မှ သတင်းကိုဖုံးကွယ်ရန် အတွက် ထိုလူငယ်သည PDF တပ်ဖွဲ့ဝင်ဖြစ်ပြီး ဆိုင်ကယ်မှောက်ပြီး ဆုံးပါးသွားသည် သတင်း လွှင့်နေကြောင်း သီပေါမြို့ ဒေသခံများက ပြောသည်။
စစ်ကောင်စီ ပစ်ခတ်မှုကြောင့် သေဆုံးသွားသည့်အောင်မင်းသူ ၏ ကျန်ရစ်ခဲ့သည့် အမျိုးသမီးမှာ စားဝတ်နေရေးအတွက် အခက်ခဲများစွာရှိလာနိုင်ကြောင်း၊ လက်ရှိမှာ ရက်သားကလေးနှင့် ကျန်ရစ်ခဲ့သဖြင့် ရုန်းကန် ရှာဖွေရန် ခက်ခဲနေကြောင်း လည်း ၎င်း၏ အမျိုးသမီး က စိတ်မကောင်းစွာပြောသည်။
“ ကျမမှာ သူရဲ့အသုဘချဖို့ပိုက်ဆံတောင်းမရှိဘူး။ သူများနား ချေးထားရတယ်။ ကလေးကလည်း မွေးပြီးတာ (၂၂ ) ရက်ဘဲရှိသေးတယ်။ အခုတော့ အမေတို့နဲနေရအုန်းမယ်။” ဟု ၎င်းအမျိုးသမီး က ပြောသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီး သီပေါမြို့တွင် စစ်ကောင်စီမှ ပစ်သတ်ခဲ့သူ စုစုပေါင်း (၂) ဦးရှိခဲ့ပြီး (၁၇) ဦးဖမ်းဆီးခံထားရကြောင်း သိရသည်။ ထိုပစ်သတ်ခံရသူ (၂) ဦးလုံးသည် မွေးကင်းစ ကလေးများရှိနေကြောင်းသိရသည်။
Leave a Comments