သျှမ်းပြည်မြောက်ပိုင်း ကျောက်မဲခရိုင် သီပေါမြို့နယ် အတွင်းရှိ စစ်ဘေးရှောင် ၃၀၀ ကျော်သည် စားဝတ်နေရေးအတွက် အခက်အခဲများ ကြုံတွေ့နေရကြောင်း သိရသည်။
သီပေါမြို့နယ်အတွင်းရှိ ဆွန်လုံကျးရွာအုပ်စုမှ ဆွန်လုံကျေးရွာ၊ ချောင်းဆုံကျေးရွာ နှင့် ဟတ်လျန်ကျေးရွာတို့မှ အိမ်ထောင်စု ၁၀၀ ၊ လူဦးရေ (၃၀၀) ကျော်တို့သည် ဒေသတွင်း စစ်ရေးတင်းမာမှုကြောင့် စားဝတ်နေ ရေးအတွက် အခက်အခဲများကြုံတွေ့နေရကြောင်း စစ်ဘေးရှောင်များကို ကူညီထောက်ပံရေးကော်မတီဝင်တစ်ဦး ထံမှ သိရသည်။
“အခု ဒီရွာသုံးရွာက ပြည်သူတွေကတော့ စစ်ဘေးကို ရှောင်နေရလို့ တောင်ယာလုပ်ငန်းတွေကိုလည်း မလုပ်နိုင်ဘူး၊ ပြီးတော့ တောတက်ပြီး မျှစ်ချိုး/မှိုရှာတာမျိုးလည်း မလုပ်ရတော့ စားဝတ်နေရေးအတွက် အတော်လေးကို ခက်ခက် ခဲခဲ ရင်ဆိုင်နေရပါတယ်၊ အခုထိ ဒေသတွင်း စစ်ရေးတွေက တင်းမာနေတုန်းပဲ” ဟု သျှမ်းသံတော်ဆင့်ကို ပြောသည်။
အဆိုပါ ရွာသုံးရွာမှ ပြည်သူ (၃၀၀) ကျော်သည် ဒေသတွင် စစ်ရေးတင်းမာမှုများကြောင့် အသက်မွေဝမ်းကြောင်း ဖြစ်သည့် တောင်/ယာ လုပ်ငန်းများကို လုပ်ကိုင်နိုင်ခြင်းမရှိသည့် အပြင် ဝင်ငွေများဖြစ်ကြသည့် မျှစ်ချိုး/မှိုရှာပြီး ရောင်းချခြင်း များလည်း မပြုလုပ်နိုင်ကြောင်း သိရသည်။
ထို့အပြင် နမ့်လန်ဘက်ရှိသည့် ဝမ်လီဘုန်းတော်ကြီးကျောင်း၊ ဝမ်စိမ်း နှင့် ဝမ်ကျောင်း ဘုန်းတော်ကြီးကျောင်းမှ နေရပ်မပြန်နိုင်သေးသည့် စစ်ဘေးရှောင်များလည်း ရှိနေသေးကြောင်း သိရသည်။
“အခု ကျနော်တို့ နမ့်လန်ဘက်မှာ ရှိတဲ့ စစ်ဘေးရှောင်တွေကို စားနပ်ရိက္ခာနဲ့ အသုံးအဆောင် သွားရောက်လှူဒါန်းဖို့ ပြင်ဆင်နေပါတယ်၊ ပြီးတော့ ချောင်းဆုံနဲ့ ဟာလျန်ဘက်က စစ်ဘေးရှောင်တွေအတွက်ကိုလည်း သွားရောက်လှူဒါန်းနိုင်ဖို့ ကျနော်တို့က စေတနာရှင်တွေကို စောင့်မျှော်နေပါတယ်” ဟု ၎င်းက ဆိုသည်။
လက်ရှိတွင် နမ့်လန်ဘက်ရှိ ဝမ်လီဘုန်းတော်ကြီးကျောင်းမှ စစ်ဘေးရှောင် (၂၀၀) ကျော်ရှိနေကြောင်းသိရသည်။
သျှမ်းပြည်မြောက်ပိုင်းတွင် သျှမ်းလက်နက်ကိုင် တပ်ဖွဲ့ ၂ ဖွဲ့ အချင်းချင်း တိုက်ပွဲမကြာခဏ ဖြစ်ပွားသည့် အပြင် အခြားသော တိုင်းရင်းသားလက်နက်ကိုင်များနှင့် စစ်ကောင်စီတပ်တို့ကလည်း မကြာခဏ တိုက်ပွဲဖြစ်ပွားနေသည့် အတွက် ဒုက္ခရောက်နေရသည့် စစ်ဘေးရှောင်ပြည်သူများ ရှိနေကြောင်း သိရသည်။
Leave a Comments