သျှမ်းပြည်မြောက်ပိုင်း ကွက်ခိုင်မြို့ တွင် (၃)ရက်ကြာပျောက်ဆုံးခဲ့သည့် ဘာသာရေးဆရာ တစ်ဦး၏ ရုပ်အလောင်းကို ယမန်နေ့ (ဇွန် ၂၁)ရက် တွင် ပြန်လည်တွေ့ခဲ့ကြောင် ဟု သတင်းရရှိသည်။
ကွတ်ခိုင်မြို့ မှ ဘာသာရေး ဆရာ L.ခွန်ဇော်လွမ်သည် ဇွန် (၁၈) ရက် ညနေ (၃)နာရီတွင် ဆိုင်ကယ်ဖြင့် နေအိမ်မှသွားပြီး (၃)ရက်ကြာပျောက်ဆုံးခဲ့ရာ ဇွန် (၂၁) ရက်တွင် ၎င်း၏ ရုပ်အလောင်းကို ကွတ်ခိုင်မြို့ရပ်ကွက် (၇)ရှိ နမ့်ဟူးပလောင်သင်္ချိုင်း ယူကလစ်ပင်အောက်တွင် ပြန်တေ့ွခဲ့သည်။
ဆရာ L.ခွန်ဇော်လွမ်၏ ရုပ်အလောင်းတွင် လက်(၂)ဖက်ကို လက်ထိပ်ခတ်ထားပြီး၊ ခန္ဓာကိုယ်တခုလုံး ရိုက်နှက်ထားသည့် ဒဏ်ရာ များတွေ့ရပြီး၊ ဦးခေါင်းတွင်လည်း သေနတ်ဒဏ်ရာ (၂) ချက်ဖြင့် သေဆုံးနေကြောင်း မိသားစုဝင်များက သျှမ်းသံတော်ဆင့်ကို ပြောသည်။
“ သူ့(ဆရာL.ခွန်ဇော်လွမ်)ရဲ့ အလောင်းကို နွားကျောင်းသား တစ်ဦးက တွေ့ခဲ့တာ။ လက်(၂)ဖက်လည်း လက်ထိပ်ခတ်ထားတယ်။ တကိုယ်လုံးလည်း ညိုမဲဒဏ်ရာတွေနဲ့ သေနတ်ဒဏ်ရာ (၂)ချက်လည်းတွေ့ရတယ်” ဟု မိသားစုဝင် တစ်ဦးက ဆိုသည်။
အသတ်ခံရသည့် ဆရာL. ခွန်ဇော်လွမ် နေအိမ်မှ ပါသွားသည့် ဆိုင်ကယ်နှင့် ငွေကျပ် (၃)သိန်းကို ကျန်ရှိခဲ့ကြောင်း၊ ထို့ကြောင့် လုယက်မှုဖြင့် သတ်ခံရခြင်းမဖြစ်နိုင်ကြောင်း၊ မည်သည့် လက်နက်ကိုင် သတ်လိုက်သည်ကို မသိရှိကြောင်းလည်း မိသားစုဝင်များက ပြောသည်။
“ သူက အနေအေးတယ်။ လူမှားတာပြီးသတ်တာဖြစ်မှာ။ နိုင်ငံရေးကလည်း ရှုပ်နေတယ်။ လူတွေကပေါက်ကရ လျှောက်လုပ်ကြ။ လုယက်မှု မဖြစ်နိုင်ဘူး။ သူပါသွားတဲ့ ဆိုင်ကယ်လည်း မယူသွားဘူး။ ပိုက်ဆံ (၃)သိန်းလည်း ရှိတယ်။ စဉ်းစားစရာပဲ” ဟု ၎င်း က ထပ်လောင်းပြောသည်။
ထို့အပြင် ဆရာL.ခွန်ဇော်လွမ် ၏ ရုပ်အလောင်းတွင်ဝတ်ဆင်ထားသည့် ပျောက်ကြားအင်္ကျီ အဝတ်အစားနှင့် အနားရှိ ဦးထုတ်သည် နေအိမ်မှ ထွက်ခွာသွားစဉ်ဝတ်ဆင်ထားသည့် အဝတ်မဟုတ်ကြောင်းလည်း မိသားစုဝင် တစ်ဦး က ပြောပြသည်။
လက်ရှိအသတ်ခံရသည့်ကိစ္စနှင့်ပတ်သက်ပြီး မည်သည့်အဖွဲ့အစည်း၊ ရဲမှ တာဝန်ယူဖြေရှင်းပေးမှုမရှိသည့်အတွက် ၎င်း၏ ရုပ်အလောင်းကို ဇွန် ၂၁ရက်တွင် သဂြိုလ်လိုက်ကြောင်းသိရသည်။
အသတ်ခံရပြီး သေဆုံးသွားသည့် သူသည် ကချင်တိုင်းရင်းသား တစ်ဦးဖြစ်ပြီး အသက် (၄၂) နှစ် သာရှိသေးကာ အမျိုးသမီးနှင့် မူကြိုတက်မည့် အရွယ် ကလေးတစ်ယောက် ကျန်ခဲ့ကြောင်း သိရသည်။
ကွက်ခိုင်မြို့တွင် တိုင်းရင်းသားလက်နက်ကိုင်များ များစွာ လှုပ်ရှားသည့် နယ်မြေ တစ်ခုဖြစ်ပြီး၊ မကြာခဏ လူ့အခွင့်အရေး ချိုးဖောက်ခံရသည့်နေရာဖြစ်သည်။
