သျှမ်းပြည်မြောက်ပိုင်း သီပေါမြို့နယ် နားမခေါ်ကျေးရွာ နေထိုင်ပြီး ပရဟိတ လူငယ် တစ်ဦးသည် ယနေ့ (ဇွန် ၁၈)ရက် မနက် ၂နာရီတွင် သေနတ်ပစ်သတ်ခံရကြောင်း စုံစမ်းသိရသည်။
ယနေ့ မနက် (၂)နာရီတွင် အမည်မသိ လက်နက်ကိုင်တပ်ဖွဲ့ တခုက ပရဟိတ လုပ်ဆောင်သေနတ်ပစ်သတ်ခံရသည့် အသက် (၃၀)အရွယ်ရှိ စိုင်းလောဝ် ၏ နေအိမ်ကို လာရောက်ခေါ်ဆောင်ပြီး၊ လမ်းခုလပ်တွင် သေနတ်ပစ်သတ်ခဲ့ကြောင်း ၎င်း၏ မိသားစုဝင်များက သျှမ်းသံတော်ဆင့်ကိုပြောသည်။
“ ဒီနေ့မနက် ၂ နာရီမှာလာခေါ်သွားတယ်။ ဘယ်အဖွဲ့စည်းကလာခေါ်တာလဲတော့ ကျနော်တို့မသိဘူး။ အိမ်နဲ့ နည်းနည်းဝေးတဲ့နေရာကိုခေါ်သွားပြီး သတ်ပစ်လိုက်တာပါ။ သူက နားမခေါ်ကျေးရွာမှာ နားရေးအသင်းဝင်ထားတယ်။ ဘာကြောင့်လာသတ်တာလဲတော့ မသိဘူး” ဟု စိုင်းလောဝ်၏ မိသားစုဝင် တစ်ဦးက ပြောသည်။
စိုင်းလောဝ် သေနတ်ထိမှန်ခံရသည့် ဒဏ်ရာများမှာ ရင်ဘတ်အောက်တွင်တနေရာ၊ လက်မောင်း နှင့် မျက်နှာ တွင် လည်း ကျည်ထိမှန်ပြီး သေဆုံးခဲ့ကြောင်း မိသားစုဝင် တစ်ဦးက ပြောသည်။
“ သေနတ်ဒဏ်ရာက ရင်ဘတ်အောက်မှာ တနေရာ၊ လက်မောင်းမှာ တနေရာ၊ပြီးတော့ ခေါင်း ရိုက်ခံထားရတာ တွေရှိတယ်။ မျက်နှာတွေမှာလည်း သွေးတွေနဲ့ ” ဟု ၎င်း ကပြောသည်။
စိုင်းလောဝ်ကို သေနတ်ပစ်သတ်သွားသည့် လက်နက်ကိုင်အုပ်စုသည် မည်သည့်အုပ်စုဖြစ်သည်ကိုတော့ မသိရှိရသေးကြောင်း လည်း မိသားစုဝင်များက ပြောပြသည်။
သေဆုံးသွားသည့် စိုင်းလောဝ်ကို ယနေ့ ( ဇွန် ၁၈) နေ့လည့် ၁၁ နာရီတွင် သဂြိုလ်သွားမည် ဟု သိရသည်။
သျှမ်းမြောက် သီပေါမြို့နယ်အတွင်း စစ်ကောင်စီ၏ လက်နက်ကိုင်တပ်ဖွဲ့နှင့် တိုင်းရင်းသားလက်နက်ကိုင်တပ်ဖွဲ့များ လှုပ်ရှားသည့်နေရာဖြစ်ပြီး၊ မကြာခဏ သေနတ်ပစ်သတ်ခံရနေရသည့် ဒေသတခုလည်းဖြစ်သည်။
ထို့ကြောင့် သီပေါမြို့နယ် အတွင်းနေထိုင်သည့် ပြည်သူများအနေဖြင့် လက်နက်ကိုင် အုပ်စုများကို ကြောက်လန့်ရသည့် အခြေအနေ ဖြစ်နေကြောင်း သိရသည်။
