သျှမ်းပြည်မြောက်ပိုင်း လားရှိုး မြို့မဈေး တွင် ကိုဗစ်-၁၉ ပိုးတွေ့ရှိမှုကြောင့် အရေးပေါ်ပိတ်သွားမည် ဖြစ်ကြောင်း သိရသည်။
လားရှိုးမြို့မဈေး မှ ဈေးသည်တချို့တွင် ကိုဗစ်-၁၉ ရောဂါပိုး တွေ့ရှိရသဖြင့် မြို့မဈေးကြီးကို ဇွန် (၁၈)မှ စတင်ကာ ဇူလိုင် (၂)ရက်ထိ ပိတ်သွားမည် ဟု အရေးပေါ် ပိတ်လိုက်ရကြောင်း ဈေးတာဝန်ခံတစ်ဦး က သျှမ်းသံတော်ဆင့် ကို ပြောသည်။
“ဈေးထဲမှာ ကိုဗစ်-၁၉ တွေ့ရှိလို့ ပိတ်လိုက်တာပါ၊ မနက်ဖြန် ၁၈ ရက်နေ့ ကနေ စပြီး နောက်လ (ဇူလိုင်လ) ၂ ရက်နေ့ထိ ပိတ်မယ်လို့ လျာထားပါတယ်” ဟု ဈေးတာဝန်ခံတစ်ဦးက သျှမ်းသံတောိဆင့်ကိုပြောသည်။
ထို့အပြင် မြို့မဈေးကြီးနှင့် ဆက်လျက်ရှိသည့် ကုန်စိမ်းဈေးရုံများရောင်းချသည့် ဆိုင်ခန်းပေါင်း (၄၀၀) ကျော်ကိုလည်း ပိတ်မည်ဖြစ်ကြောင်း သိရသည်။
“ဒီမြို့မဈေးနဲ့ မြို့မဈေး အနီးတစ်ဝိုက် ဆိုင်ခန်းတွေအားလုံးကို ဇွန်လ ၁၈ ရက် ကနေ ဇူလိုင် လ ၂ ရက်နေ့အထိ ပိတ်ထားခိုင်းတယ်လို့ ကြားတယ်” ဟု လားရှိုးမြို့ ဒေသခံတစ်ဦးက သျှမ်းသံတော်ဆင့်ကိုပြောသည်။
လားရှိုးမြို့မှာ ဒီနေ့ နေ့လယ် ၃ နာရီအထိ ကိုဗစ် ပိုးတွေ့ရှိသူ (၁၃)ဦး စစ်ဆေးတွေ့ရှိပြီးနောက် မြို့မဈေးကြီးကို အရေးပေါ်ပိတ်လိုက်ခြင်း ဖြစ်ကြောင်းသိရသည်။
Leave a Comments