သျှမ်းပြည်နယ်မှ စိုက်ပျိုးရေးနှင့်ပတ်သက်၍ တောင်သူများ ကြုံတွေ့နေရသော ပြဿနာများကို သျှမ်းပြည်နယ် စိုက်ပျိုးရေး ဦးစီးဌာနမှ ကွင်းဆင်းကူညီဆောင်ရွက်ပေးသွားမည်ဖြစ်ကြောင်း သိရသည်။

စိုက်ပျိုးရေးလုပ်ငန်းတွင်တောင်သူများ၏ အခက်အခဲများကို ဖြေရှင်းနိုင်ရန် သျှမ်းတောင် (၅) မြို့နယ်မှ တောင်သူများနှင့် စိုက်ပျိုးရေးဦးစီးဌာနမှ တာဝန်ရှိသူများက ဇွန် (၂၂)ရက်နေ့တွင် Taunggyi City Hotel တွင် တွေ့ဆုံခဲ့ကြရာ သျှမ်းပြည်နယ် စိုက်ပျိုးရေး ဦးစီးဌာန ဒု ညွှန်ကြားရေးမှူး ဦးချိုနိုင်ထွန်းကထိုသို့ပြောကြားလိုက်သည်။

“သက်ဆိုင်ရာကျေးရွာတွေမှာ ကြံုတွေ့နေရတဲ့စိုက်ပျိုးရေးပြဿနာတွေကို ကွင်းဆင်းပြီး ကျနော်တို့စိုက်ပျိုးရေးနည်းပညာဝန်ထမ်းများ ၊ပညာ ရှင်များနဲ့ လာရောက်ဖြေရှင်းဆောင်ရွက်ပေးပါ့မယ်လို့ ဒီပွဲမှာပဲ ကတိကဝတ်ပြုထားတယ်။ ကျနော်တို့ဆီကို တိုက်ရိုက် စာရေးတင် ပြလာတာဖြစ်စေ အရပ်ဖက်လူမှုအဖွဲ့ အစည်းမှတစ်ဆင့်ဖြစ်စေ ဆက်သွယ်အကူအညီတောင်းနိုင်ပါတယ် ” ဟု ၄င်းက သျှမ်းတောင် (၅) မြို့နယ်မှ တောင်သူများနှင့် စိုက်ပျိုးရေးဦးစီးဌာနမှ တာဝန်ရှိသူများတွေ့ဆုံပွဲ တွင် ယင်းသို့ ပြောလိုက်ခြင်းဖြစ်သည် ။

သျှမ်းပြည်နယ်တောင်ပိုင်း၊တောင်သူများအနေဖြင့် အများဆုံးတွေ့ကြံုရသည့် ပြဿနာများမှာ စိုက်ပျိုးရေးနည်းပညာနည်းစနစ်၊ မျိုးကောင်းမျိုးသန့်၊ ပိုးသတ်ဆေး ပေါင်းသတ်ဆေးအသုံးပြုခြင်း နည်းပညာ၊ စျေးကွက်ပြဿနာနှင့် မျိုးစေ့အတုထွက်ပေါ်ခြင်း၊ သွင်းအားစု ဓာတ်မြေသြဇာအတုတွေ့ကြံုရခြင်း များ ကြံုတွေ့နေရကြောင်း သိရသည် ။

“တောင်သူတွေရဲ့ စိုက်ပျိုးရေး အခက်အခဲတွေကိုစိုက်ပျိုးရေးရုံးမှာ အကူအညီတောင်းလို့ရတယ် ၊ စိုက်ပျိုးရေးနည်းပညာသင်တန်း နဲ့ စိုက်ပျိုးရေးနည်းစနစ်တွေကို လိုအပ်ရင် အစိုးရကိုအကူအ ညီတောင်းလို့ရတယ်ဆိုတာ တောင်သူတွေသိသွားဖို့ လိုအပ်တယ် ။ ” ဟု အဆိုပာ တွေ့ဆုံပွဲကိုစီစဉ်ကျင်းပပေးသည့် ကောင်ရွေလူမှုတရားမျှတမှုနှင့် ဖွဲ့ဖြိုးရေးအဖွဲ့မှ ဒါရိုက်တာ ခွန်မျိုးက ကပြောသည်။

တောင်သူများအနေဖြင့် သီးနှံများကို အရည်အသွေး မြင့်မြင့်မှန်မှန် ဖြင့် ထုတ်လုပ်နိုင်ပါက နိုင်ငံခြားစျေးကွက်အထိ ချိတ်ဆက်ပေးနိုင်ကြောင်း၊ အဆင့်မှီမှီ နည်းစနစ်ကျကျ စိုက်ပျိုးရေးနည်းပညာကိုလည်း အရပ်ဖက်လူမှုအဖွဲ့ အစည်းများ ထံမှတစ်ဆင့်ဖြစ်စေ တောင်သူများကိုယ်တိုင်ဖြစ်စေ လာရောက်ဆက်သွယ်ပါကစိုက်ပျိုးရေးဦးစီးဌာနမှ ကျေးရွာအထိ ကွင်းဆင်းသင်ပြပေးမည်ဖြစ်ကြောင်း ဆက်လက်သိရှိရသည်။