သျှမ်းပြည်တောင်ပိုင်း ဟိုပုံးမြို့တွင် Non-CDM ကျောင်းဆရာမ(၂)ဦးထံ ကိုဗစ်-၁၉ပိုးတွေ့ရှိကြောင်း စုံစမ်းသိရသည်။

ယမန်နေ့( ဇွန် ၁၁)ရက် ဟိုပုံးမြို့မှ Non- CDM ကျောင်းဆရာမတစ်ဦး၏ မိသားစု နေမကောင်း ဖြစ်ပြီး အနံ့ပျောက်သဖြင့်ဆေးရုံသို့ လာရောက်ပြသရာ ဆရာမနှင့် အတူ အိမ်သား(၂) ယောက်လည်း ကိုဗစ်-၁၉ ရောဂါပိုးကူးစက်ပိုးတွေ့ရှိပြီး၊ ယနေ့တွင်လည်း ၎င်းဆရာမနှင့်နေအိမ် အဝင်၊အထွက်ရှိသည့် Non-CDM ဆရာမ တစ်ဦးကို ထပ်မံ တွေ့ရှိကြောင်း ဟိုပုံးမြို့ ဆေးရုံမှ ကျန်းမာရေးဝန်ထမ်းတစ်ဦးက သျှမ်းသံတော် ဆင့်ကို ပြောသည်။

“ဟိုပုံးမြို့ အမက ၄ မှာ တာဝန်ထမ်းဆောင်နေတဲ့ ဆရာမမိသားစုပါ၊ မနေ့က (ဇွန် ၁၁) ထိ ဆရာမကကျောင်း တက်သေးတယ်တဲ့၊ မနေ့ညက ညနေပိုင်းမှာ အနံ့မရတော့ဘူးဆိုပြီး ဆေးရုံကို ရောက်လာတော့ RTK နဲ့ စစ် ကြည့်တာ သုံးဦးက ပိုးတွေ့တယ်။ ဒီနေ့လည်း အဲ့ဆရာမနဲ့ အဆက် ကျောင်းဆရာမ နောက်တဦး ထပ်တွေ့တယ် ” ဟု ဟိုပုံးဆေးရုံမှ ကျန်းမာရေးဝန်ထမ်း တစ်ဦးက ဆိုသည်။

ဆက်လက်ပြီး ဒီကနေ့ ဇွန်လ ၁၂ ရက်နေ့မှာ ၎င်းဆရာမနှင့် နေအိမ်အဝင်အထွက်ရှိသည့် အလုပ်တူ နောက်ထပ် NON CDM ဆရာမတစ်ဦးကိုလည်း Rapid Test Kit ဖြင့် ဟိုပုံးဆေးရုံမှာ စစ်ဆေးရာ ကိုဗစ်ပိုးကူးစက်မှု တွေ့ရှိရကြောင်း သိရသည်။

ဟိုပုံးမြို့ တွင်နေထိုင်သူ NON -CDM ကျောင်းဆရာမတို့သည် မိသားစုဝင် ၅ ဦးရှိသည့်အနက် ဆရာမနှင့် အတူ၎င်း၏အမျိုးသားနှင့် ညီမတို့ကိုပါ ကိုဗစ်ကူးစက် ရောဂါပိုးစစ်ဆေးတွေ့ရှိရကြောင်း သိရသည်။

လက်ရှိတွင် ဆရာမတို့ နေထိုင်ရာအိမ်ရာကို သက်ဆိုင်ရာတာဝန်ရှိသူများနှင့် ရပ်ကွက်လူကြီးများမှ အသွား အလာ ကန့်သတ်ထားပြီး၊ ဝင်/ထွက်ခွင့်ပါ ပိတ်ထားကြောင်း ဟိုပုံးမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

“အခုတော့ သူတို့နဲ့ သူတို့အိမ်ဝန်းဖက် အသွားအလာ ကန့်သတ်လိုက်ပါပြီ၊ ဒါပေမယ့် မနေ့ကထိ ကျောင်းတက် သေးတယ်ဆိုတော့ ကလေးတွေအတွက်လည်း ပူရပြီ၊ အခုလို တွေ့တာတောင် ကျောင်းကမပိတ်ပေးသေးဘူး လေ” ဟု ဒေသခံတစ်ဦးက သျှမ်းသံတော်ဆင့်ကို ပြောသည်။

စစ်တပ်မှ နိုင်ငံတော်အာဏာကို သိမ်းယူပြီးနောက်ပိုင်း ကိုဗစ်-၁၉ ကူးစက်ရောဂါပျံ့နှံမှုသည် တစ်နေ့ထက်တစ် နေ့ ပိုမိုတိုးပွားလာပြီး တချို့သောမြို့နယ်များတွင် ပိတ်ထားသည့် ကွာရန်တင်းစင်တာများကို ပြန်လည်ဖွင့်လှစ် ထားရကြောင်း သိရသည်။