“၁၀၂၇ စစ်ဆင်ရေး”အတွင်း သိမ်းပိုက်ထိန်းချုပ်ထားသည့် မြို့(၇)မြို့မှ ပြစ်မှုကျူးလွန်သည်ဟု သံသယရှိသည့် Non-CDM ဝန်ထမ်းများကို အပြစ်ပေး အရေးယူခြင်းများ ပြုလုပ်သွားမည်ဖြစ်ကြောင်း TNLA တပ်ဖွဲ့က ထုတ်ပြန်လိုက်သည်။

ယနေ့ (မေလ ၁၅ ရက်) ရက်စွဲဖြင့် တအာင်း(ပလောင်) အမျိုးသားလွတ်မြောက်ရေး တပ်မတော် TNLA က ထိန်းချုပ်မြို့များရှိ Non-CDM ဝန်ထမ်းများအပေါ် အချက်(၃) ချက် ပါဝင်သည့် ရှင်းလင်းချက်တစ်စောင် ထုတ်ပြန်လာခဲ့သည်။

၎င်းထုတ်ပြန်ချက်ထဲတွင် တအာင်း(ပလောင်)တပ်ဖွဲ့ TNLA က သိမ်းပိုက်ထိန်းချုပ်ထားသည့် (၇)မြို့ရှိ စစ်ကောင်စီလက်အောက်တွင် ပုံစံမျိုးစုံဖြင့် တာဝန်ထမ်းဆောင်ခဲ့သည့် Non-CDM ဝန်ထမ်းများအားလုံးကို လုပ်ငန်းတာဝန်များ ရပ်ဆိုင်းလိုက်ပြီဖြစ်ကြောင်း TNLA က ကြေညာခဲ့သည်။

“စစ်ကောင်စီ ဝန်ထမ်းတွေ မူဆယ်မှာ စာသွားသင်ပြီး နမ့်ခမ်းကို ပြန်တာမျိုးဆိုရင် သူလျှိုလို့ သတ်မှတ်ပြီး အချိန်မရွေး ဖမ်းနိုင်တယ်ဆိုပြီးတော့ TNLA က ခြိမ်းခြောက်တာရှိတယ်။ နောက်ပြီးတော့ မူဆယ်ကို ပြောင်းမယ်ဆိုရင်လည်း အိုးအိမ်တွေလည်း အကုန်ပြောင်းသွားဖို့ ပြောတာပေါ့”ဟု နမ့်ခမ်းမြို့ ပညာရေးအသိုင်းအဝိုင်းနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

ထို့အပြင် သတ်မှတ်ချက်အရ ပြစ်မှုကျူးလွန်သည်ဟု သံသယရှိသည့် Non-CDM ဝန်ထမ်းများကို အရေးယူနိုင်ရန် သက်ဆိုင်ရာမှ ဖမ်းဆီးအရေးယူခြင်း၊ တိုင်ကြားမှုအရ ဖမ်းဆီးပြီး အဆင့်ဆင့် စစ်ဆေးအရေးယူခြင်းများနှင့် သတ်မှတ်သည့် စီမံချက်အရ အပြစ်ပေး အရေးယူခြင်းများ ပြုလုပ်သွားမည်ဟုလည်း ထုတ်ပြန်ချက်တွင် ဆိုထားသည်။

အလားတူ TNLA က ထိန်းချုပ်ထားသည့် မြို့များတွင် ဆက်လက်နေထိုင်သည့် Non-CDM ဝန်ထမ်းများသည် စစ်ကောင်စီထံမှ လစာထုတ်ယူခြင်း၊ လုပ်ငန်းအစီရင်ခံစာ ပေးပို့ခြင်း စသည့် ပူးပေါင်းဆောင်ရွက်မှုများ တွေ့ရှိပါက အပြစ်ပေး အရေးယူသွားမည်ဟု ထုတ်ပြန်ရှင်းလင်းထားသည်။

ပြီးခဲ့သည့် ဇန်နဝါရီလအတွင်းကလည်း TNLA ဒု-ဥက္ကဋ္ဌဖြစ်သူ ဗိုလ်ချုပ် တားဂျုတ်ဂျား မှ CDM
ဝန်ထမ်းများနှင့်သာ လက်တွဲအလုပ်လုပ်မည်ဖြစ်ကြောင်း ရှင်းလင်းပြောကြားခဲ့ဖူးသည်။

တအာင်း(ပလောင်)တပ်ဖွဲ့ TNLA အနေဖြင့် “၁၀၂၇ စစ်ဆင်ရေး”အတွင်း နမ့်ဆန်၊ နမ္မတူ၊ မန်တုံ၊ ကွတ်ခိုင်၊ နမ့်ခမ်း၊ မိုင်းငေါ့နှင့် မိုင်းလုံမြို့များကို သိမ်းပိုက်ထိန်းချုပ်ထားပြီး ၎င်းမြို့များတွင် အုပ်ချုပ်ရေးလုပ်ငန်းများကို အကောင်အထည်ဖော် ဆောင်ရွက်နေကြောင်း ပြောဆိုထားသည်။