သျှမ်းပြည်တောင်ပိုင်း လင်းခေးခရိုင် လင်းခေးမြို့နယ်တွင် ခရိုင်ဆေးရုံအတွက် ဆရာဝန် အထူးလိုအပ် နေကြောင်းဒေသခံများပြောပြချက်အရ သိရသည်။
လင်းခေးဆေးရုံတွင်လူနာများပြည့်နှက်နေပုံ ( Photo by Ying Hark)
“ဆရာဝန်ပြောင်းသွားတာက ပြီးခဲ့တဲ့ နှစ် အောက်တိုဘာလ ကတည်းကဘဲ။ အခုတော့ လင်းခေးမှာ လက်ထောက်ဆရာဝန်တယောက်တည်းနဲ့ အလုပ်လုပ်နေရတယ်။ တုပ်ကွေးရာသီလေ။ လူနာကများတော့ ဆရာဝန်အထူးလိုအပ်နေပါတယ်။ အဲတာကို သက်ဆိုင်ရာဝန်ကြီးဌာနကနေ ဆရာဝန်အမြန်ဆုံးချပေးဖို့ ကျမတို့လင်းခေးလူထုက အထူးတောင်းချင်ပါတယ်” – ဟု လင်းခေးဒေသခံ ယိင်းဟတ် ကပြောသည်။
လင်းခေးခရိုင်ဆေးရုံကြီးတွင် ခရိုင်အတွင်းရှိ ၄ မြို့နယ် (လင်းခေး၊ မိုးနဲ၊မိုင်းပန်၊မောက်မယ်)တို့မှ လူနာများ လာရောက်ဆေးကုသသဖြင့် ဆေးရုံတွင်လူနာများပြည့်နှက်နေပြီး ဆရာဝန်အထူးလိုအပ်နေခြင်းဖြစ် ကြောင်းသိရသည်။
SNLD ပါတီ၏ လင်းခေးမြို့နယ် ပြည်သူ့လွှတ်တော်ကိုယ်စားလှယ် ဦးစိုင်းဘသိန်းက – “ဆရာဝန်ပြောင်းသွားပြီးနောက်မကြာခင်မှာဘဲ ဆရာဝန်အသစ်မရောက်လာလို့ကျနော် လွှတ်တော်ထဲမှာ တင်ပြတောင်းဆိုခဲ့ပါတယ်။ ကျန်းမာရေးဝန်ကြီးဌာနက – အမြန်ဆုံးစီစဉ်ဆောင်ရွက်ပေးမယ် -လို့ဘဲဖြေပါတယ်။ဆရာဝန်က ခုထိမရောက်လာသေးဘူး။ ၆ လ ရ လ ထဲဝင်လာပြီ။ ကျနော် မနေ့တနေ့ကဘဲ ဖုန်းထပ်ဆက်တယ်။ ပြည်ထောင်စုကျန်းမာရေးဝန်ကြီးဌာနဆီကို။ ဒီ ၁ လ ၂ လ အတွင်း အမြန်ဆုံးထပ်မံလွှတ်ပေးနိုင်အောင် စီစဉ်ပေးမယ် – လို့တော့ပြောတယ် ”- ဟု သျှမ်းသံတော်ဆင့်အားပြောသည်။
ပြီးခဲ့သည့်နှစ်အောက်တိုဘာလက လင်းခေးဆေးရုံတွင် တာဝန်ကျသည့် ဆရာဝန် မှာ စဉ့်ကိုင်မြို့သို့ပြောင်းရွှေ့ရပြီးနောက် ဆရာဝန်သစ်တစုံကို ကျန်းမာရေးဝန်ကြီးဌာနကချပေးကြောင်း၊ သို့သော် ပုဂ္ဂိုလ်ရေးပြသနာကြောင့် ယနေ့တိုင် လင်းခေးဆေးရုံသို့ မရောက်လာကြောင်း ၀န်ကြီးက ပြောသည်ဟု ၄င်းကဖြည့်စွက်ပြောကြားသည်။
လင်းခေးခရိုင် လင်းခေးမြို့နယ်ပြည်သူ့ဆေးရုံတွင် ဖွဲ့စည်းပုံအရ မြို့နယ်ဆရာဝန် ၁ ဦးနှင့် လက်ထောက်ဆရာဝန် ၆ ဦး စုစုပေါင်း ရ ဦးရှိရမည်ဖြစ်သော်လည်း လက်ရှိခန့်ထားမှုတွင်မြို့နယ်ဆရာဝန် ၁ ဦးနှင့်လက်ထောက်ဆရာဝန် ၁ ဦး စုစုပေါင်း ၂ ဦးသာရှိနေကြောင်း၊ လက်တွေ့တွင်လည်း လက်ထောက်ဆရာ ၀န် ၁ ဦးတည်းကသာ အလုပ်လုပ်နေကြောင်း လင်းခေးမြို့နယ် ပြည်သူ့လွှတ်တော်ကိုယ်စားလှယ်ကြီး၏ ဆရာဝန်ခန့်ထားပေးနိုင်ရေး တင်ပြတောင်းဆိုသည့်စာတွင် ဖော်ပြထားသည်ကိုတွေ့ရသည်။
“ကျနော်တို့လွှတ်တော်ကိုယ်စားလှယ်တွေဆိုတာကလဲ လူထဘဲလေနော်။ ဒါကြောင့် လင်းခေးခရိုင်ထဲက လူထုအနေနဲ့ ဆရာဝန်ကိုတကယ်ကိုလိုအပ်နေပါတယ်။ ဆရာဝန်ကြီးမရှိလို့ အရမ်းကိုအခက်အခဲဖြစ်နေရ ပါတယ်လို့ပြောချင်ပါတယ်။ ” ဟု စိုင်းဘသိန်း ကပြောသည်။
လက်ရှိတွင် တနိုင်ငံလုံးအတိုင်းအတာအရ လက်ထောက်ဆရာဝန်အင်အား နည်းပါးနေပြီး ၊ လက်ထောက် ဆရာဝန်များ ဆေးပညာမဟာသိပ္ပံဘွဲ့လွန်ဝင်ခွင့် အောင်မြင်သော လက်ထောက်ဆရာဝန်များ သင်တန်း တက်ရောက်ပြီးချိန်တွင် ကျန်ရှိသော လုပ်သက်ရ လက်ထောက်ဆရာဝန်များအား လုပ်ငန်း လိုအပ်ချက် ရှိသောမြို့နယ်- တိုက်နယ်ဆေးရုံးများသို့ အချိုးကျခွဲဝေခန့်ထားဖြည့်တင်းပေးမည်ဖြစ်ကြောင်း ပြည်ထောင်စုဝန်ကြီး ကျန်းမာရေးနှင့်အားကစားဝန်ကြီး ဌာနက လွှတ်တော်ကိုယ်စားလှယ်ကြီးအား ပြန်လည်ဖြေကြားခဲ့ကြောင်းသိရပါသည်။
