သျှမ်းပြည် ကျောက်မဲမြို့ကို စစ်ကောင်စီတပ်က လေကြောင်းဖြင့် ထပ်မံဗုံးကြဲတိုက်ခိုက်ခဲ့ကြောင်း စုံစမ်းသိရသည်။
ယနေ့ (ဇန်နဝါရီလ ၂၅ ရက်) နေ့လယ် ၁ နာရီခွဲခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့ပေါ် စစ်ကောင်စီတပ်မှ ဂျက်ဖိုက်တာဖြင့် ဗုံးနှစ်လုံး ကြဲချတိုက်ခိုက်ခဲ့ရာ ပြည်သူ့ဆေးရုံရှိ သားဖွားဆောင်နှင့် ရဲစခန်းအနီးသို့ ကျရောက်ပေါက်ကွဲကြောင်း ဒေသခံများက ပြောသည်။
“ခုနလေးတင် ဂျက်ဖိုက်တာနဲ့ ဗုံးလာကြဲသွားတယ်။ တချို့လည်း ဆေးရုံနဲ့ ရဲစခန်းဘက်လို့ ပြောတယ်။ တချို့လည်း ဆေးရုံကြီး သားဖွားဆောင်ဘက် ၂ လုံးကြဲတယ် အဲ့လိုပြောနေကြတာ၊ အထိအခိုက်တော့ သွားမကြည့်ရသေးတော့ မသိသေးဘူး”ဟု ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့ပေါ် ပြည်သူ့ဆေးရုံ လေကြောင်းဗုံးကြဲခံရမှုနှင့် ပတ်သက်၍ ထိခိုက်ဒဏ်ရာရရှိမှုကို သျှမ်းသံတော်ဆင့်မှ အသေးစိတ် ဆက်လက်စုံစမ်းနေသည်။
အလားတူ ပြီးခဲ့သည့် ဇန်နဝါရီလ ၁၃ ရက် ညပိုင်းကလည်း ကျောက်မဲမြို့နယ်တွင် တိုက်ပွဲဖြစ်ပွားခြင်း မရှိဘဲ ပန်ပေါင်းဘက်ရှိ တိုးဂိတ်အနီးသို့ စစ်ကောင်စီဘက်မှ လေကြောင်းဗုံးကြဲတိုက်ခိုက်ခဲ့သည်။
ကိုးကန့်တပ်ဖွဲ့ MNDAA နှင့် စစ်ကောင်စီတို့ ဇန်နဝါရီ (၁၈) ရက်မှ စတင်ပြီး တရားဝင် အပစ်အခတ် ရပ်စဲကြောင်း တရုတ်နိုင်ငံဘက်မှ ထုတ်ဖော်ပြောကြားခဲ့ပြီးနောက် စစ်ကောင်စီနှင့် TNLA အကြား အပစ်အခတ် ရပ်စဲနိုင်ရန် တရုတ်နိုင်ငံ၏ ကြားဝင်စေ့စပ်မှုဖြင့် ထပ်မံတွေ့ဆုံ ဆွေးနွေးနိုင်ကြောင်း နိုင်ငံရေးလေ့လာသုံးသပ်သူများက ပြောဆိုသည်။
အခြားတစ်ဘက်တွင် ညီနောင်မဟာမိတ်ဖြစ်သည့် TNLA ထိန်းချုပ် နောင်ချိုမြို့နှင့် ကျောက်မဲမြို့သို့ ယခုရက်ပိုင်းအတွင်း စစ်ကောင်စီက လေကြောင်းဖြင့် ပြန်လည်ထိုးစစ်ဆင် တိုက်ခိုက်လာခြင်းကြောင့် လူအစုလိုက်အပြုံလိုက် သေဆုံးခြင်းများအထိ ရှိလာသည်။
Leave a Comments