ကွတ်ခိုင်-သိန္နီ လမ်းမကြီးပေါ် စစ်ကောင်စီ လက်နက်ကြီးဖြင့် ရမ်းသမ်းပစ်ခတ်

0

သျှမ်းပြည်မြောက်ပိုင်း ကွက်ခိုင်- သိန္နီ လမ်းမပေါ် သိန္နီမြို့ အဝင် ယနေ့ (ဇွန် ၁၀)ရက် မနက် ၉ နာရီကျော်တွင် စစ်ကောင်စီမှ လက်နက်ကြီးဖြင့် တဖက်သတ်ပစ်ခတ်နေကြောင်း သတင်းရရှိသည်။

စစ်ကောင်စီ မှ ယနေ့ မနက် (၉ )နာရီကျော်မှ (၁၀)နာရီခွဲကျော်ထိ လက်နက်ကြီး၊ လက်နက်ငယ်ဖြင့် တဖက်သတ် ပစ်ခတ်ခဲ့ကြောင်း၊ ထိုပစ်ခတ်သည့်အချိန် ကားလမ်းယာယီပိတ်ထားကြောင်း ကွတ်ခိုင်ဒေသခံ တစ်ဦးက သျှမ်းသံတော်ဆင့် က ပြောသည်။

“ တစ်ဖက်အသံပဲကြားရတယ်။ သူတို့လမ်းပေါ်နေပြီး မှန်းပြီးပစ်နေတာ။ ဘယ်သူ့ကို ထိချင်ထိအဲ့လို ပစ်သွားတာ။ သူများ သူတို့ကို ချောင်းပစ်တယ်လို့ပြောတယ်။ ကားလမ်းတော့ ခဏပိတ်လိုက်ရတယ်” ဟု ကွက်ခိုင် ဒေသခံ တစ်ဦး က ပြောသည်။

ကွတ်ခိုင်မြို့နယ် အတွင်း ယနေ့ရမ်းသတ်ပစ်ခတ်သည့် တပ်သည် စစ်ကောင်စီ ၏ တပ်မ (၉၉) ဖြစ်ကြောင်း၊ ပစ်ခတ်သည့် အချိန်တွင် ကားလမ်းများ အတက်အဆင်း များ ပိတ်ထားကြောင်း သိရသည်။

“လမ်းတွေလည်း ပိတ်ထားတယ်။ သူတို့ပစ်ပစ်ပြီး ကားလမ်းတွေ ပြန်ဖွင့်ပေးတယ်။ သူတို့ပစ်တဲ့ အနီးနားရွာတွေက တော့ စိုးရိမ်ကြတယ်။ သူတို့က ရမ်းသမ်းပစ်တော့ ပြည်သူတွေကို ထိမှာကို ဂရုမစိုက်ဘူး။” ဟု ၎င်း က ဆိုသည်။

ကွက်ခိုင်မြို့နယ်တွင် စစ်ကောင် နှင့် တိုင်းရင်းသားလက်နက်ကိုင် တပ်ဖွဲ့များနှင့် မကြာခဏ တိုက်ပွဲများ ဖြစ်ပွားခဲ့ကြောင်း သိရသည်။ အဆိုပါ တိုင်းရင်းသားလက်နက်ကိုင်များသည် ကိုးကန့် (MNDAA)၊ တအာင်း(ပလောင်) TNLA နှင့် ကချင်လွတ်မြောက်ရေးတပ်မတော် (KIA) တို့ လှုပ်ရှားသည့် နယ်မြေဖြစ်သည်။

Leave a Comments