သျှမ်းပြည်တောင်ပိုင်း အေးသာယာမြို့နေ အမျိုးသားဒီမိုကရေစီ အဖွဲ့ချုပ် (NLD) ၏ တောင်ကြီးမြို့နယ် မြို့နယ်အလုပ် အမှုဆောင် ကော်မတီ အဖွဲ့ဝင် တစ်ဦးကို စစ်ကောင်စီမှ လာရာက်ဖမ်းဆီး ခေါ်ဆောင်သွားကြောင်းသိရသည်။
ယမန်နေ့က ဇွန်လ ၆ ရက်နေ့ ည ၁၁ ခွဲဝန်းကျင်တွင် အေးသာယာမြို့နေ ရပ်ကွက် (၅) နေ ဦးတင်မြင့် (ဦးမော်စီ) အား ၎င်း၏နေအိမ်တွင် စစ်ကောင်စီ တပ်ဖွဲ့ဝင်များက ကားသေး ၅စီး ကားကြီး ၁စီး ယူနီဖောင်း၊ လက်နက် အပြည့်ဖြင့် လာရောက်ဖမ်းဆီးသွားခဲ့ကြောင်း ဦးတင်မြင့် (ဦးမော်စီ) နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“သူက ရွေးကောက်ပွဲမှာကတည်းက ပါတီအောင်နိုင်ရေးကို တစ်စိုက်မတ်မတ်လုပ်လာတဲ့သူဆိုတော့ အာဏာစ သိမ်းကတည်းက စစ်ကောင် သူ့ကိုမဲနေတာ၊ မနေ့ညမှာ သူတစ်ယောက် တည်းဖမ်းဖို့အတွက် လက်နက်အပြည့် အစုံနဲ့ စစ်သားတွေ၊ ရဲတွေက ရောက်လာတယ်၊ သူ့ကို ဝိုင်းထားပြီးတော့ သူ့ကို အကြမ်းဖက် ဖမ်းဆီးသွားတာ၊ ရိုက်နှက်တာလည်း ရှိတယ်” လို့ ဦးတင်မြင့်(ဦးမော်စီ) နှင့် နီးစပ်သူက သျှမ်းသံတော်ဆင့်ကို ပြောသည်။
ဦးတင်မြင့် (ဦးမော်စီ) သည် NLD တွင် မြို့နယ်အလုပ်အမှုဆောင်ကော်မတီ အဖွဲ့ဝင်တစ်ဦး ဖြစ်ပြီး ပါတီအောင်နိုင်ရေးကို တစိုက်မတ်မတ် လုပ်ဆောင်ခဲ့သူဖြစ်သည့်အတွက် အာဏာသိမ်းကတည်းက ထွက်ပြေးတိမ်းရှောင်နေခဲ့ပြီး နေအိမ်ကိုခဏပြန်လာစဉ် ယခုလိုဖမ်းဆီးခံရခြင်းဖြစ်ကြောင်းလည်း သိရသည်။
မည်သည့်နေရာခေါ်ဆောင်သွားသည်ကို ယခုချိန်ထိ မိသားစုဝင်များ မသိရသေးကြောင်းလည်း၎င်းက ဆက်ပြော သည်။