နမ္မတူမြို့နယ် ပန်လုံ တိုက်ပွဲရပ်တန့်သော်လည်း ကျေးရွာအတွင်း လက်နက်ကိုင်ရှိနေဆဲ

0

သျှမ်းပြည်မြောက်ပိုင်း နမ္မတူမြို့နယ် ပန်လုံကျေးရွာအုပ်စုအတွင်း တိုက်ပွဲရပ်နားထားသော်လည်း လက်နက်ကိုင်များ ကျေးရွာထဲတွင် ရှိနေသေးသဖြင့် ဒေသခံများ စိုးရိမ်နေကြကြောင်း စုံစမ်းသိရသည်။

သျှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် မြောက်ပိုင်းမဟာမိတ်တို့ တိုက်ပွဲကြောင့် ပန်လုံကျေးရွာအုပ်စုရှိ ဒေသခံများ လားရှိုးဘုန်းကြီးကျောင်းသို့ (၁) လနီးပါး ထွက်ပြေးတိမ်းပြေးတိမ်းရှောင်ခဲ့ရကြောင်း သတင်းရရှိသည်။

“ တိုက်ပွဲကတော့ တိတ်သွားပြီ။ ကျနော်တို့ နေရပ်ပြန်ပေမယ့် ကြောက်တော့ကြောက်နေရသေးတယ်။ရွာထဲမှာ လက်နက်ကိုင် အဖွဲ့တွေကတော့ ရွာထဲမှာ သွားလာနေသေးတယ်” ဟု အသက် (၆၀)အရွယ်ရှိ ပန်ဟတ်ကျေးရွာ ဒေသခံတဦး က သျှမ်းသ့တော်ဆင့်ကို ပြောသည်။

ကျေးရွာထဲသို့တိုင်းရင်းသားလက်နက်ကိုင်အုပ်စု သွားလာလှုပ်ရှားမှုရှိနေသေးပြီး၊ မသင်္ကာသည့်အိမ်များကိုဝင်ရောက် စစ်ဆေးမှု ပြုလုပ်ကြောင်း၊ ပန်ဟတ်ကျေးရွာရှိ နေအိမ် (၂)လုံး ဝင်ရောက်စစ်ဆေးခံရကြောင်းလည်း ၎င်း အမျိုးသားက ပြောသည်။

“ မသင်္ကာတဲ့အိမ်တွေ ဝင်စစ်တယ်။ ပန်ဟတ်ဒေသခံက ၂ အိမ်လောက် ဝင်စစ်ပြီး အကုန်ဝင်ရှာဖွေသွားတယ်။ အိမ်ပြတင်းပေါက်တွေ အကုန်ပျက်တယ်။ တခြားအိမ်တွေလည်း ဝင်စစ်တာရှိတယ်။ TNLA လို့ ပြောတယ်” ဟု အထက်ပါ ပုဂ္ဂိုလ် ကဆိုသည်။

နမ္မတူမြို့နယ် ပန်လုံကျေးရွာအတွင် မြောက်ပိုင်းမဟာမိတ် တပ်ဖွဲ့ များ သွားလာလှုပ်ရှားနေသည်ဟုလည်း ဒေသခံများက ပြောသည်။

ထို့အပြင် နမ္မတူမြို့နယ်အတွင်း တိုင်းရင်းသားအချင်းချင်းဖြစ်ပွားနေသည့် တိုက်ပွဲရပ်တန့်နေသော်လည်း ဒေသခံများအနေဖြင့် တိုက်ပွဲအတွင်း ထောင်ထားသည့် မိုင်းကို နင်းမိမှာကို စိုးရိမ်သဖြင့် တောင်ယာကို မသွားရဲသေးကြောင်းလည်း ပန်လုံကျေးရွာတွင်နေထိုင်သည့် အမျိုးသားတစ်ဦး ကပြောသည်။

“ သေနတ်သံ တိတ်သွားပေမယ့် ရွာထဲ လှုပ်ရှားနေတာတော့ ရှိသေးတယ်။ တောင်ယာတွေ သွားတဲ့ချိန်မှာ ကျနော်တု့ိ မိုင်းတွေ သွားနင်းမိမှာ စိုးရိမ်ကြတယ်။ အသွားအလာလည်း စိုးရိမ်ရတယ်” ဟု ၎င်း အမျိုးသားက ဆိုသည်။

TNLA အနေဖြင့် လုံခြုံရေးအရ ဝင်ရောက်စစ်ဆေးမှုရှိကြောင်း၊ ဝင်ရောက်စစ်ဆေးမှုများကို မပြုလုပ်ခင်တွင် သက်ဆိုင်သူများကို ခွင့်တောင်းပြီးမှဝင်ရောက်စစ်ဆေးလျက်ရှိကြောင်း ဇွန် (၂)ရက်တွင် TNLA ပြန်ကြားရေး ဗိုလ်မှူး မိုင်းအိုက်ကျော်က သျှမ်းသံတော်ဆင့်ကို တရားဝင်ဖြေဆိုခဲ့သည်။

သို့သော် ယနေ့သတင်းနှင့် ပတ်သက်ပြီး ဗိုလ်မှူး မိုင်းအိုက်ကျော်ကို သျှမ်းသံတော်ဆင့်မှ အကြိမ်ကြိမ်ဆက်သွယ်မေးမြန်းခဲ့သော်လည်း မရရှိခဲ့ပေ။

Leave a Comments