သျှမ်းပြည် မြို့တော် တောင်ကြီးမြို့တွင် ယနေ့ (ဇွန် ၃)ရက် နေ့လည် (၁၁ )နာရီဝန်းကျင်၌ စစ်ကောင်စီ အုပ်စု မှ အလှဓာတ်ပုံဆရာ တစ်ဦး၏ ကင်မရာ နှင့် ဖုန်းကို သိမ်းယူသွားကြောင်း စုံစမ်းသိရသည်။
စစ်ကောင်စီ တပ်သားတို့က တောင်ကြီး-ဟိုပုံးမြို့အထွက် လေးမိုင် စစ်ဆေးရေးဂိတ်(တပ် ပေါင်းစုဂိတ်) တွင် မင်္ဂလာဆောင်ဓာတ်ပုံသွားရိုက်ပြီး ပြန်လာသော ဓါတ်ပုံဆရာဆိုင်ကယ်ကို တားမြစ်စစ်ဆေးပြီး ကင်မရာ နှင့် ဖုန်းကိုသိမ်းသွားကြောင်း ဓာတ်ပုံဆရာက သျှမ်းသံတော်ဆင့်ကို ပြောသည်။
“ကျနော် ဟိုပုံးမှာ မင်္ဂလာဆောင်ဓါတ်ပုံ သွားရိုက်ခဲ့ပြီး အပြန် လေးမိုင်နားကဂိတ်ရောက်တော့ ကျနော်ရဲ့ အိတ်ကို စစ်တယ်၊ ကင်မရာကိုတွေ့တော့ ကျနော့်ကို ဒူးထောက်ခိုင်းတယ်။ ပြီးတော့ ကျနော်ရဲ့ ဖုန်းကိုတောင်းပြီးယူသွားတာ၊ ပြန်မပေးဘူး” ဟု ဓာတ်ပုံဆရာက သျှမ်းသံတော်ဆင့်ကိုပြောသည်။
စစ်ကောင်စီ မှ အလှဓာတ်ပုံရိုက်ဆရာကို ဒူးထောက်ခိုင်းပြီး ဖုန်းနှင့် ကင်မရာကို သိမ်းယူသွားကြောင်း၊ စစ်ကောင်စီ ဘက်မှ ရိုက်နှက်ခြင်းမရှိကြောင်းလည်း ၎င်းဓာတ်ပုံဆရာက ပြောသည်။
စစ်ကောင်စီမှ နိုင်ငံတော်အာဏာ သိမ်းပြီနောက် ဓာတ်ပုံသတင်းသမားများ ဖမ်းဆီးခံရသည့် အပြင် အလှဓာတ်ပုံရိုက်ကူးနေသော ဓာတ်ပုံဆရာများသည်လည်း အကြောင်းမဲ့ဖမ်းဆီးနေကြောင်း သိရသည်။
