သျှမ်းပြည်မြောက်ပိုင်း နမ္မတူမြို့နယ် ပန်လုံးကျေးရွာရှိ ဘုန်းကြီးကျောင်းကို တအောင်း(ပလောင်) အမျိုးသား လွတ်မြောက်ရေး တပ်မတော် ( TNLA) မှ သော့ဖျက်ပြီး ဝင်ရောက်စစ်ဆေးမှု ပြုလုပ်ခဲ့ကြောင်း စုံစမ်းသိရသည်။

မေ (၃၀) ရက် ညနေ (၃)နာရီအချိန်တွင် TNLA တပ်သားများသည် လက်နက်အပြည့်အစုံကိုင်ဆောင်ပြီး နမ္မတူမြို့နယ် ပန်လုံကျေးရွာ ဘုန်းကြီးကျောင်းကို အတင်းအဓမ္မဝင်ရောက်လာပြီး ကျောင်းဆောင်တချို့ကို သော့ဖျက်ကာ ဝင်ရောက်စစ်ဆေး ရှာဖွေမှု ပြုလုပ်ခဲ့ကြောင်း သတင်းရရှိသည်။

“ TNLA တပ်သားတွေက လက်နက်အပြည့်နဲ့ ဘုန်းကြီးကျောင်းထဲဝင်လာတယ်။ နောက် ဟိုရှာ ဒီရှာလုပ်တယ်။ နောက် ကျောင်းဆောင်တချို့ ကိုလည်း သော့ဖျက်ပြီး ဝင်ရှာတာရှိတယ်။ ဘာရှာလဲတော့ မသိဘူး” ဟု ထို ဘုန်းကြီးကျောင်း၏ ကျောင်းထိုင်ဆရာတော် က မိန့်ကြားသည်။

TNLA အနေဖြင့် ဘုန်းကြီးကျောင်းဝန်းထဲသို့မည်သည့် အရာကို လာရောက်စစ်ဆေး ရှာဖွေမှုပြုလုပ်သည်ကို မသိရှိကြောင်း၊ ဘုန်းကြီးကျောင်းဝင်ရောက် စစ်ဆေးရန် ငြင်းဆိုခဲ့သော်လည်း အဓမ္မဝင်ရောက်လာခြင်းဖြစ်ကြောင်း ဆရာတော် က မိန့်သည်။

“ ကျောင်းထဲမှာသူတို့ အကုန်စစ်ဆေးတယ်။ ဘုန်းကြီးနားနေဆောင်ထဲကိုလည်း သော့ဖျတ်ပြီးဝင်သွားတယ်။ သူတို့လာစစ်တဲ့ချိန် ဆရာတော်က ကျောင်းမှာမရှိဘူး။ ကျောင်းမှ အိပ်ယာခင်းတွေဘဲရှိတယ်လို့ပြောပြတာကို သူတို့က မရမချင်းဝင်ရောက်စစ်ဆေးသွားတယ်” ဟု ဆရာတော်က ထပ်မံမိန့်သည်။

TNLA အနေဖြင့် ဘုန်းကြီးကျောင်းကို ဝင်ရောက်စစ်ဆေးရခြင်းသည် လုံခြုံးရေးအရ ဝင်ရောက်စစ်ဆေးခြင်း သာဖြစ်ကြောင်း၊ ဘုန်းကြီးကျောင်းဆောင် တံခါးဖျက်ဆီးခြင်း ဝင်ရောက်မွှေနှောက်ခြင်းမရှိကြောင်းလည်း TNLA ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က သျှမ်းသံတော်ဆင့် ကို ပြောသည်။

“ အဲဖက်မှာက အရင်က RCSS တို့နဲ့တိုက်ပွဲဖြစ်ပွားတာရှိတယ်။ RCSS ကလည်း ပြည်သူတွေ မရှိတဲ့အချိန် ရွာထဲမှာနေထားတယ်။ တစ်ချို့နေရာမှ ကျနော်တို့က လုံခြုံရေးအရ ဝင်ရောက်ရှာဖွေစစ်ဆေးတာတော့ရှိတယ်။ ဟိုမွှေဒီမွှေ ဝင်ရောက်ဖျက်ဆီးတာတော့ မဟုတ်ဘူး” ဟု မိုင်းအိုက်ကျော် က ဆိုသည်။

ထိုသို့ ဝင်ရောက်စစ်ဆေးမှုများကို မပြုလုပ်ခင်တွင် သက်ဆိုင်သူများကို ခွင့်တောင်းပြီးမှဝင်ရောက်စစ်ဆေးလျက်ရှိကြောင်း၊ သို့သော် ဘုန်းကြီးကျောင်းကို ဝင်ရောက်စစ်ဆေးရာတွင် ခွင့်တောင်းခြင်ရှိ မရှိကို အသေးစိတ်မသိရှိရသေးကြောင်း မိုင်အိုက်ကျော်က ဆက်လက် ပြောသည်။

နမ္မတူမြို့နယ် ပန်လုံကျေးရွာတွင် RCSS/SSA နှင့် မြောက်ပိုင်းမဟာမိတ်တို့ တိုက်ပွဲဖြစ်ပွားခဲ့သည့်နေရာတခုဖြစ်သည်။