သျှမ်းပြည်တဝှမ်း ယနေ့ (ဇွန်၁)ရက်ကျောင်းဖွင့်ရက်တွင် စစ်တပ်လုံခြုံရေး အပြည့် စောင့်ပြီး၊ ကျောင်းလာတက်သူအများစုသည် စစ်တပ်မိသားစုဝင်များသာဖြစ်ကြောင်း စုံစမ်းသိရသည်။
ယနေ့ ဇွန် (၁) ရက်တွင် စစ်ကောင်စီ ၏ အမိန့်အရ မြန်မာနိုင်ငံတဝှမ်း ကျောင်းဖွင့်လှစ်ကာ ကျောင်းလာတက်သည့် သူများသည် တပ်မိသားစုဝင် အများစုဖြစ်ကြသည်။
“ကျောင်းလာတက်တဲ့သူ သိပ်မများဘူး။ စစ်တပ်က ကလေးတွေပဲ ရှိတယ်။ သေနတ်ကိုင်ထားတဲ့ စစ်သား (၃) (၄) ယောက်လောက် လုံခြုံရေးချထားတာတွေ့ရတယ်” ဟု သျှမ်းပြည်မြောက်ပိုင်း မိုင်းရယ်ဒေသခံ တစ်ဦးကပြောသည်။
သျှမ်းပြည်တောင်ပိုင်း တွင် ကျောင်းလာအပ်ထားသည့် ကျောင်းသားများ ကျောင်းမလာတက်ကြကြောင်း၊ တချို့ မြို့နယ်တွင် ပညာရေးဝန်ထမ်းများ အဖြူ၊ အစိမ်း မဝတ်ဘဲ ကျောင်းသို့လာကြောင်း သျှမ်းတောင် ပြည်သူလူထုများက ပြောသည်။
“လာအပ်တဲ့ ကျောင်းသားတွေတောင် အကုန်ကျောင်းမတက်ကြဘူး။ စစ်တပ်လုံခြုံရေးချထားတယ်” မိုင်းကိုင် ဒေသခံ တစ်ဦးကပြောသည်။
အလားတူ “ပင်လုံမှာ လာတက်တဲ့သူက စစ်တပ်မိသားစုတွေ များကြတယ်။ နတလ ကျောင်းသားတွေ များတယ်။ တစ်ချို့ကျောင်းဆို ဆရာမတွေ အဖြူအစိမ်း မဝတ်လာရဲဘူး” ဟု ပင်လုံဒေသခံ တစ်ဦးကပြောသည်။
သျှမ်းရှေ့ ကျိုင်းတုံတွင်လည်း ကျောင်းလာတက်သည့်သူများသည် စစ်တပ်အသိုင်းအဝန်း နှင့် ဝန်ထမ်းသား၊သမီးများသာဖြစ်ကြောင်း၊ လက်ရှိမှာ ကိုဗစ်-၁၉ ပြန်လည်ဖြစ်နေသဖြင့် မိဘများက ကလေးများကို ကျောင်းမပို့ကြကြောင်းသိရသည်။
ထို့အပြင် သျှမ်းမြောက်ပိုင်း မူဆယ်မြို့ရှိ တချို့စာသင်ကျောင်းများသည် ကျောင်းလာအပ်သူ နှင့် ကျောင်းလာတက်သူ (၁၀)ဦး မပြည့်ကြောင်းသိရသည်။
“မူဆယ်ဘက်လည်း လာတက်တဲ့သူ သိပ်မရှိဘူး။ တစ်ချို့ကျောင်းဆို လာအပ်တဲ့ ကလေး ၃ ယောက်လောက်ပဲရှိတယ်။” ဟု မူဆယ် ဒေသခံ တစ်ဦး ကပြောသည်။
၂၀၂၀-၂၀၂၁ ပညာသင်နှစ်တွင် မြန်မာနိုင်ငံသည် ကိုဗစ်-၁၉ ကြောင့် အခြေခံ ပညာကျောင်းများ ပိတ်ထားခဲ့ရပြီး ယခုနှစ် ၂၀၂၁-၂၀၂၂ ပညာသင်နှစ်သည် စစ်အစိုးရ အုပ်ချုပ်သည်ကို ပြည်သူများ လက်မခံသဖြင့် ဆရာ ဆရာမများလည်း (CDM) ပါဝင်လာပြီး ကျောင်းသား မိဘများ စစ်အာဏာရှင်ကို အလိုမရှိသည့်အတွက် ကျောင်းမအပ်ခဲ့ကြောင်း သတင်းရရှိသည်။
