သျှမ်းပြည်တောင်ပိုင်း မိုင်းကိုင်မြို့တွင် ကျောင်းလာအပ်သည့် ကျောင်းသားများမှာ ဝန်ထမ်းတပ်မိသားစုဝင်များ သာဖြစ်ကြောင်း စုံစမ်းသိရသည်။
မေ (၂၄) ရက်တွင် မှစတင်ပြီး စစ်ကောင်စီမှ ဖွင့်လှစ်မည့် အခြေခံ ပညာကျောင်းများကို ကျောင်းလာအပ်သည့် ကျောင်းသား ကျောင်းသူမှာ စစ်တပ်အသိုင်းအဝိုင်း နှင့် ဝန်ထမ်းမိသားစုများသာ ဖြစ်ကြောင်း စုံစမ်းသိရှိရသည်။
“ဒီလို နိုင်ငံရေး အခြေနေ ရှုပ်ထွေးနေတဲ့အချိန်မှာ ကျနော်တို့လည်း ကိုယ့်သား သမီးတွေကို ကျောင်းမသွားစေချင် သေးဘူး။ ဗုံးလည်း ပေါက်တော့ လုံခြုံမှု မရှိဘူးလို့ ခံစားရတယ်။ အိမ်က ကလေး ကျောင်း တစ်နှစ်အောက်ထားလည်း ဘာမှ မဖြစ်ဘူး။ဒီလို အခြေနေနဲ့ ကျောင်းသွားရင် မိဘဖြစ်သူတွေလည်း စိတ်ပူရတယ်။” ဟု မိုင်းကိုင်ဒေသခံ တစ်ဦး က သျှမ်းသံတော်ဆင့် ကိုပြောသည်။
ယနေ့ မေ (၂၈) ရက်ထိ မိုင်းကိုင်မြို့ရှိ အခြေခံပညာ အထက်တန်းကျောင်း အထက တွင် ကျောင်းလာအပ်သည့် ကျောင်းသား ကျောင်းသူ (၆၀) ရှိပြီး၊ အထက (ခွဲ) မဟတ် တွင် ကျောင်းသား (၈၀) ခန့်သာ ကျောင်းလာ အပ်နှံကြောင်း စုံစမ်းသိရှိသည်။
ယမန်နေ့ မေ (၂၇) ရက်ည (၈း၁၆) မိနစ်ခန့်က မိုင်းကိုင်မြို့ ပညာရေးမှူးရုံးတွင် ဗုံးပေါက်ကွဲမှု ဖြစ်ပွားခဲ့သဖြင့် ယနေ့ ကျောင်းလာအပ်သည့် ကျောင်းသား (၃) ဦးသာ ရှိကြောင်း သိရသည်။
“ဒီနေ့ အထက ကျောင်းမှာ ကျောင်းလာအပ်တဲ့ ကလေး (၃) ယောက်ပဲရှိတယ်။ တစ်ချို့ ဆရာ ၊ ဆရာမ တွေ နေရပ်ပြန်သွားကြပြီ။ ကြောက်လို့ထင်တယ်” ဟု မိုင်းကိုင်ဒေသခံ အမျိုးသား တစ်ဦး ကပြောသည်။
မိုင်းကိုင်မြို့ရှိ ပညာရေးဝန်ထမ်းများလည်း စစ်အာဏာသိမ်းပြီးနောက် (CDM) ဘက်ပါဝင်လာသည်ကို တွေ့ရကြောင်း ဒေသခံများက ပြောဆိုကြသည်။
“ဆရာ ဆရာတွေတောင် CDM လုပ်ကြတာပဲ။ ကျမတို့လည်း ကိုယ့်သား သမီးတွေကို ကျောင်းမအပ်ခြင်းဖြင့် CDM လုပ်တဲ့ ဆရာ ဆရာမ တွေကို ထောက်ခံတယ်။ ပြီးတော့ စစ်ကောင်စီ က ဖွင့်မယ့် ပညာရေးကိုလည်း ကျမတို့ အလိုမရှိဘူး။” ဟု မိုင်းကိုင်ဒေသခံ ကျောင်းသား မိခင် တစ်ဦး ကပြောသည်။
ယခုရက်ပိုင်းတွင် သျှမ်းပြည်တွင်းရှိ စာသင်ကျောင်းများ ပညာရေးမှူးရုံးများ အနီးတွင် ဗုံးများ ဆက်တိုက် ပေါက်ကွဲမှု ဖြစ်ပွားခဲ့ပြီး ကျောင်းလာအပ်သည့် ကျောင်းသား ကျောင်းသူ များလည်းမတွေ့ရကြောင်း နည်းပါးလာကြောင်း သိရသည်။
ဖေဖော်ဝါရီ ၁ ရက်မှ စတင်ပြီး စစ်အာဏာသိမ်းပြီးနောက် မြန်မာတဝှမ်းလုံးရှိ ပညာရေးဝန်ထမ်းများ စစ်အာဏာ ဖီဆန်ရေး လှုပ်ရှားမှု (CDM) ပါဝင်နေကြောင်း သိရသည်။
Leave a Comments