သျှမ်းပြည်မြောက်ပိုင်း လားရှိုးမြို့နယ် ဟူးမွန်အုပ်စု ခေးခမ်းရွာသားတွေရဲ့ တပ်မြေအဖြစ် အသိမ်းခံရ လယ်ယာမြေတွေဟာ လယ်ယာမြေပိုင်ဆိုင်မှုပြဖို့မရှိတဲ့အတွက် ပြန်လည်စွန့်လွှတ်ပေးနိုင်ခြင်းမရှိဘူးလို့ အမျိုးသားလွှတ်တော်အစည်းအဝေးမှာ ကာကွယ်ရေးဝန်ကြီးက ပြောဆိုလိုက်ပါတယ်။
ဇွန်လ ၂၀ ရက်နေ့ကကျင်းပတဲ့ ဒုတိယအကြိမ်အမျိုးသားလွှတ်တော် အဌမပုံမှန်အစည်းအဝေး ၁၈ ရက် မြောက်အစီအစဉ်မှာ လားရှိုးခရိုင်အမျိုးသားလွှတ်တော်ကိုယ်စားလှယ်စိုင်းဝမ်းလှိုင်းခမ်းက – တပ်ပိုင်မြေအဖြစ် အသိမ်းခံရ ဟူးမွန်အုပ်စု ခေးခမ်းရွာသား ၄၆ ဦးပိုင်တဲ့လယ်ယာမြေ တွေကိုပြန်လည် စွန့်လွှတ်ပေးရန် အစီအစဉ်ရှိ- မရှိ- ဆိုတဲ့ မေးမြန်းတင်ပြချက်ကို ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ်မြင့်နွယ်က – တောင်သူ ၄၆ ဦးရဲ့ မြေယာဆိုတာ ပိုင်ဆိုင်မှုအထောက်အထားပြနိုင်ခြင်းမရှိတာကြောင့် ပြန်လည်စွန့်လွှတ်ပေးရန် အစီအစဉ်မရှိ လို့ပြန်လည်ဖြေကြားခဲ့ကြောင်းသိရပါတယ်။
“ကာကွယ်ရေးဝန်ကြီးအနေနဲ့ တောင်သူများအနေနဲ့ မြေယာပိုင်ဆိုင်မှု အထောက်အထားမရှိဘူး၊ အဆိုပါ မြေဟာ တပ်ပိုင်မြေဖြစ်တယ် ဒါကြောင့် စွန့်လွှတ်ရန်မရှိဆိုတာကို ထုုံးစံအတိုင်း ဖြေကြားသွားပါတယ်။ တပ်မတော်တပ်ရင်း မလာခင်ကတည်းက ဘိုးစဉ်ဘောင်ဆက် လုပ်လာတဲ့မြေက အထောက်အထား မရှိဘူးဆိုတာကတော့ ဒေသခံတောင်သူများနဲ့မဆိုင်ဘူးလို့ထင်ပါတယ်။ အစိုးရအဆက်ဆက်က တောင် သူများ ပိုင်ဆိုင်ဖို့ အထောက်အထားကိုမှ ပြုလုပ်မပေးခဲ့တာလေ။ တောင်သူများ မြေယာပိုင်ဆိုင်မှု အထောက်အထားမရှိဘူးလို့ပြောတာဟာ တောင်သူများအခွင့်အရေးအပြည့်အဝ မရတာတွေကို လျစ်လျူရှုရာရောက်ပါတယ်။ ”- လို့ စိုင်းဝမ်းလှိုင်းခမ်းက သျှမ်းသံတော်ဆင့်ကိုပြောဆိုပါတယ်။
ကာကွယ်ရေး ဒုဝန်ကြီးရဲ့အဖြေမှာ – အမှတ် ရ၀၀၅ သံချပ်ကာတပ်ရင်းရဲ့ တပ်ပိုင်မြေတွေဖြစ်ပြီး သံချပ်ကာတပ်ရင်း ကားမောင်းလေ့ကျင့်တဲ့မြေနေရာတွေဖြစ်တဲ့အတွက်လုံခြုံရေးအရ ပြန်လည်စွန့်လွှတ်ဖို့မဖြစ်နိုင်ဘူး- လို့ပါရှိပါတယ်။
”တပ်မတော်အနေနဲ့လည်း လုံခြံုရေးအတွက် အဲဒီမြေကို ရယူထားတယ်ဆိုတော့ အဲဒီလုံခြံုရေးလုပ်တာ ဘယ်သူအတွက်လည်းလို့ မေးခွန်းထုတ်စရာဖြစ်လာပါတယ်။ အဲဒီမြေကို အမှီပြုပြီး လုပ်စားလာခဲ့တဲ့ ဒေသခံတောင်သူတွေ အခုတော့ နည်းနည်းမှ သူတို့အတွက် မြေမကျန်တော့ပဲ အားလုံးဆုံးရှုံးသွားရင် အတိဒုက္ခရောက်ပြီး အငတ်ဘေးရင်ဆိုင်ရဖွယ်ရှိကာ ပြည်သူများရဲ့အသက်အိုးအိိမ်လုံုခြံုခြင်းမရှိမှု ဖြစ်လာမှာကတော့ အသေအချာပါပဲ။ ဒါကြောင့် လက်ရှိအစိုးရအနေနဲ့ အဲသလို မြေယာဆုံးရှုံးပြီး အသက်အိုးအိမ်လုံခြံုမှုမရှိတော့တဲ့ ဒေသခံတောင်သူလယ်သမားများအတွက် အမြန်ဆုံး တစ်စုံတစ်ခု ဖြည့်ဆည်းဆောင်ရွက်ပေးဖို့လိုအပ်နေပြီလို့ ပြောလိုပါတယ်။” – လို့စိုင်းဝမ်းလှိုင်းခမ်း ကပြောပါတယ်။
လားရှိုးမြို့နယ် ဟူးမွန်အုပ်စု ခေးခမ်းကျေးရွာ သားတွေရဲ့ ယာမြေ ဧကပေါင်း ၄၀၀ ကျော်ကို အမှတ် ရ၀၀၅ သံချပ်ကာ တပ်ရင်းက တပ်ပိုင်မြေအဖြစ် အပိုင်သိမ်းယူခြံခတ်ခဲ့တဲ့အတွက် ရွာသားတွေစိုက်ပျိုးမြေမရှိဖြစ် နေရတဲ့အပေါ် ပြန်လည်စွန့်ပေးနိုင်ခြင်းရှိ-မရှိ ကြယ်ပွင့်ပြမေးခွန်းအဖြစ် ဇွန်လ ၂၀ ရက်နေ့လွှတ်တော်အစည်း အဝေးမှာ မေးမြန်းလိုက်တာဖြစ်ပါတယ်။
“အခုလည်း လွှတ်တော်မှာ တပ်နဲ့ ပတ်သက်တဲ့မြေယာကိစ္စ သိပ်ပြီး မေးမြန်းဆွေးနွေးမှု မရှိတော့ အောက်ခြေမှာ ပြည်သူများ ဘယ်လောက်ထိ အတိဒုက္ခရောက်နေသလဲ ကျနော်တို့ လွှတ်တော်ကိုယ်စားလှယ်များအနေနဲ့လည်း တတ်နိုင်တဲ့ဘက်ကနေ တောင်သူများမြေယာပြန်လည်ရရှိရေး ဘယ်လိုကြိုးစားဆောင်ရွက်နေသလဲဆိုတာကို သိရှိစေဖို့အတွက် ရည်ရွယ်ပြီးတော့လည်း ဒီကြယ်ပွင့်ပြမေးခွန်းကို လွှတ်တော်မှာ မေးမြန်းခြင်းဖြစ်ပါတယ်။” – လို့ သူက ပြောပါတယ်။
ဒီလယ်ယာမြေတွေကို ပြီးခဲ့တဲ့ ၂၀၀၅ ခုနှစ်က တပ်ကသိမ်းလိုက်တာဖြစ်ပါတယ်။ တချို့တဝက်ကို ဂေါက်ကလပ်အဖြစ် ပြုလုပ်လိုက်ပြီး ကျန်နေတဲ့တဝက်ကိုတော့ ထပ်မံခြံခတ်လိုက်တဲ့အတွက် ယာပိုင်ရှင်တွေဟာ လယ်ယာစိုက်ပျိုးဖို့မြေနေရာအခက်အခဲဖြစ်နေကြောင်းသိရပါတယ်။
