သျှမ်းမြောက် မူဆယ်မြို့ တွင် ယနေ့ (မေ ၂၆)ရက် ညနေ ၃နာရီခွဲဝန်းကျင်မှ စတင်ကာ ဗုံး (၃)လုံးပေါက်ကွဲမှု ဖြစ်ပွားခဲ့ကြောင်း သတင်းရရှိသည်။
“ ဗုံးက ညနေ (၃)နာရီခွဲ ကနေ (၄)နာရီကြားမှာ (၃)လုံးပေါက်သွားတယ်။ ဆေးရုံရှေ့ က ထ-(၃) ကျောင်းဘေး မှာ တလုံး၊ စရဖ ရုံးနားမှာ တလုံး ၊ နောက်တလုံးကတော့ နေရာမသိသေးဘူး။ လူထိခိုက်မှုကတော့ မသိရသေးဘူး” ဟု မူဆယ်မြို့ ဒေသခံတဦး က သျှမ်းသံတော်ဆင့် ကို ပြောသည်။
မူဆယ်မြို့ ယနေ့ ပေါက်ကွဲသည့် ဗုံး(၃)လုံးသည် မည်သည့် အဖွဲ့ အစည်းမှ လာရောက်ပေါက်ကွဲသည်ကို မသိရှိရသေးကြောင်း ဒေသခံက ပြောသည်။
ယနေ့ (မေ ၂၆)ရက် မနက်ပိုင်း တွင်လည်း စစ်ရှောင်များအတွက် အလှူခံပေးနေသည့် မူဆယ်လူငယ် (၅)ဦးကို စစ်ကောင်စီ နှင့် ပြည်သူ့စစ် ပူးပေါင်းကာ ဖမ်းဆီးသွားခဲ့ပြီး၊ ထိုလူငယ်များကို မည်သည့်နေရာခေါ်ဆောင်သွားသည်ကို မသိရှိသေးပေ။
သျှမ်းသံတော်ဆင့် သတင်းဌာနမှ အတည်ပြုချက်အရ မူဆယ်မြို့တွင်စစ်ကောင်စီမှ ဖမ်းဆီခံထားရသူ စုစုပေါင်း ၄၁ ရှိပြီးဖြစ်ကြောင်းသိရသည်။
Leave a Comments