သျှမ်းပြည်မြောက်ပိုင်း မူဆယ်မြို့ ယနေ့ (မေ၂၆) ရက် မနက်ပိုင်း ၁၀ နာရီဝန်းကျင်တွင် စစ်ရှောင်များအတွက် အလှူငွေကောက်ခံပေးနေသည့် လူငယ် (၅) ဦး ကို စစ်ကောင်စီနှင့် ပြည်သူ့စစ် တို့ ဖမ်းဆီးခေါ်ဆောင် သွားကြောင်း သတင်းရရှိသည်။
ယနေ့ မနက်ပိုင်းတွင် စစ်ဘေးရှောင်များအတွက် မူဆယ်လူငယ်များသည် အမှတ် ၂ ဈေးအတွင်း အလှူငွေကောက်ခံ ပေးနေစဉ် စစ်ကောင်စီ နှင့် ပြည်သူ့စစ် ပူးပေါင်းကာ လာရောက်ဖြိုခွင်းပြီး ဖမ်းဆီးသွားခဲ့ကြောင်း သိရသည်။
“လူငယ်တွေ စစ်ဘေးရှောင်အတွက် အလှူငွေကောက်ခံနေတာ။ အဲ့ဒါကို စစ်ကောင်စီနဲ့ ရဲတွေက ဖြိုခွင်းပြီးတော့ ဖမ်းသွားတာ။ မိန်းကလေး ၄ ယောက်နဲ့ ယောကျားလေး (၁) ယောက်ပါသွားတယ်” ဟု မူဆယ်မြို့ဒေသခံ အမျိုးသမီး ကပြောသည်။
ဖမ်းဆီးခံရသောသူများသည် အသက်မပြည့်သေးသည့် လူငယ်တစ်ဦးပါဝင်ကြောင်းသိရသည်။
အဆိုပါ ဖမ်းဆီးခံရသူများသည် မပြည့်ပြည့်(၃၂)နှစ်၊ မငြိမ်းသီတာ (၂၈) နှစ်၊ မစိုးစုလှိုင်(၂၄) နှစ်၊ မထက်ယမင်းနွယ်(၂၀) နှင့် မောင်စွမ်ဝင်း (၁၇) နှစ် တို့ကိုဖမ်းဆီးသွားကြောင်းသိရသည်။
လက်ရှိတွင် ဖမ်းဆီးခံရသူများကို မည်သည့်နေရာယူဆောင်သွားသည်ကို မသိရှိရသေးကြောင်း၊ လူငယ်များ အလှူငွေကောက်ခံရသည့် ပိုက်ဆံကျပ်ငွေ (၁၀)သိန်းကို စစ်ကောင်စီမှ ယူဆောင်သွားကြောင်းသိရသည်။
“ ဟုတ်ပါတယ်။ အသက်မပြည့်တဲ့လူငယ်တစ်ယောက်ပါတယ်။ အခု မိသားစုဝင်တွေက ရဲစခန်းကို သွားမေးတော့ ရဲစခန်းမှာ မဖမ်းထားဘူးလို့ပြောတယ်။ ဘယ်နေရာခေါ်သွားလည်းမသိဘူး။ အလှူငွေရတဲ့ပိုက်ဆံလည်းယူသွားတယ်။ ခန့်မှန်းခြေတော့ ၁၀ သိန်းဝန်းကျင်လောက်ရှိမယ်။” ဟု အလှူငွေကောက်ခံရာတွင်လိုက်ပါခဲ့သည့် လူငယ်တစ်ဦး က သျှမ်းသံတော်ဆင့်ကိုပြောသည်။
အဆိုပါ အလှူငွေကောက်ခံပေးနေသည့် လူငယ်များကို အာဏာသိမ်းစစ်ကောင်စီ၊ ပြည်သူစစ် တို့ပူပေါင်းပြီး အကြမ်းဖက် ဖြိုခွင်းပြီးဖမ်းဆီးသွားခဲ့ကြောင်း သိရသည်။
သျှမ်းသံတော်ဆင့် သတင်းဌာနမှ အတည်ပြုချက်အရ မူဆယ်မြို့တွင်စစ်ကောင်စီမှ ဖမ်းဆီခံထားရသူ စုစုပေါင်း ၄၁ ရှိပြီးဖြစ်ကြောင်းသိရသည်။
Leave a Comments