သျှမ်းပြည် အတွင်း စစ်ကောင်စီမှ ကျောင်းလာအပ်ရန်အတွက် မိဘများကို နည်းမျိုးစုံ တိုက်တွန်းနေကြောင်း စုံစမ်းသိရှိရသည်။
စစ်ကောင်စီမှ မိဘများကို ကျောင်းစရိတ်ထောက်ပံ့မည် ဖြစ်ကြောင်း၊ ကျောင်းအတွင်း လုံခြုံရေး ယူပေးမည် ဖြစ်ကြောင်း နည်းမျိုးစုံ ဖြင့် ကျောင်းလာအပ်ရန် မြူဆွယ်နေကြောင်း သျှမ်းပြည်သူများက ပြောသည်။
“ ရွာက ကလေးတွေ စစ်ကောင်စီက ကျောင်းစရိတ်ထောက်ပံ့ပေးမယ်ပြောပြီး ကျောင်းလာအပ်ခိုင်းတယ်။ ရွာကသူတွေက မြို့ထဲအခြေနေမသိတော့ အဖြူအစိမ်းတွေ စာအုပ်တွေလာဝယ်တာရှိတယ်။ တစ်ချို့ရွာတွေကတော့ ကျောင်းသွားအပ်ကြတယ်” ဟု သီပေါမြို့ ဒေသခံတစ်ဦးက ပြောသည်။
စစ်ကောင်စီမှ ယနေ့ မေ ၂၅ ရက် မှစတင်ပြီး ကျောင်းအပ်လက်ခံသော်လည်း သျှမ်းပြည်တွင် ကျောင်းသွားအပ်သူ နည်းပါးကြောင်းသိရသည်။
အလားတူ သျှမ်းပြည်နယ်တောင်းပိုင်း ပင်လုံမြို့ နှင့် သျှမ်းမြောက် နမ္မတူမြို့ တွင်လည်း စစ်ကောင်စီမှ ကျောင်းရှေ့တွင် ရေးထားသည့် “ စစ်ကျွန်ပညာရေးစနစ်အလိုမရှိ” စာသားများကို ယနေ့ မနက်တွင် စစ်ကောင်စီ အုပ်စု မှ လိုက်လံ ဖျက်နေကြောင်း သိရသည်။
“ မနေ့ညမှ သွားရေးထားတာ။ ဒီနေ့မနက်တော့ ပြန်လာကြည့်တာ သူတို့ဖျက်လိုက်ပြီး။ ကျောင်းအပ်တဲ့သူတွေသိပ်မရှိဘူး။ ထ ၂ ကျောင်း စစ်တပ်ကျောင်းကတော့ အပ်တဲ့သူရှိတယ်။တစ်ချို့ကျောင်းတွေတော့ မအပ်ကြဘူး။” ဟု ပင်လုံမြို့ ဒေသခံတစ်ဦးက သျှမ်းသံတော်ဆင့်ကိုပြောသည်။
ဆက်လက်ပြီး နမ္မတူမြို့ အမှတ်(၂) အထက်တန်းကျောင်းရှေ့ တွင် လူငယ်များ ရေးသားထားသည့် “ စစ်ကျွန်ပညာရေး စနစ် အလိုမရှိ” စာသားများကို စစ်ကောင်စီ အုပ်စုက လိုက်လံဖျက်ဆီးနေပြီး၊ နမ္မတူ အထက(၂)တွင် ကျောင်းသား (၆)ဦးသာ ကျောင်းလာအပ်ကြောင်း သိရသည်။
ကျောင်းအပ်လက်ခံသည့် NON -CDM ဆရာ၊ ဆရာမများသည် ကျောင်းဝတ်စုံ မဝတ်ဆင်ရဲကြဘဲ အရပ်ဝတ်ဖြင့်သာ ဝတ်ဆင်ပြီး ကျောင်းအပ်လက်ခံနေကြသည်။
မေလ ၂၄ မှ ၃၁ ရက်နေ့အထိ ကျောင်းများအပ်နှံကြရန် စစ်ကောင်စီက ကြေညာထားပြီး ဇွန်လတွင်ကျောင်းပြန်ဖွင့် မည် ဟု သိရသည်။
ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း မြန်မာတဝှမ်းလုံးရှိ ပညာရေးဝန်ထမ်းများ စစ်အာဏာဖီဆန်ရေး လှုပ်ရှားမှု (CDM)ပါဝင်နေကြသည်။
CDM ပြုလုပ်ထားသည့် ပညာရေးဝန်ထမ်းများကို စစ်ကောင်စီ အုပ်စုမှ ဖမ်းဝရမ်းထုတ်ထားပြီး လက်ရှိ ကျောင်းပြန်ဖွင့်ချိန်တွင် စာသင်ပေးမည့် ပညာရေးဝန်ထမ်းများ မရှိသလောက်နည်းပါးနေကြောင်း သိရသည်။
Leave a Comments