ယနေ့ (မေ ၂၁)ရက် နေပြည်တော်တွင် ပြုလုပ်သည့် စစ်ကောင်စီလက်အောက်ခံ ပြည်ထောင်စု ရွေးကောက်ပွဲကော်မရှင် UEC နှင့် နိုင်ငံရေးပါတီ ၆၂ ပါတီတို့တွေ့ဆုံခဲ့ကြသည်။

ထိုတွေ့ဆုံရာတွင် ရှမ်းတိုင်းရင်းသားများ ဒီမိုကရက်တစ်ပါတီ (SNDP) ကျားဖြူပါတီ လည်း ပါဝင်ခဲ့သည်။ ၎င်းနှင့်ပတ်သက်ပြီး ကျားဖြူပါတီ ဥက္ကဌ စိုင်းအိုက်ပေါင်း အား သျှမ်းသံတော်ဆင့် မှ ဆက်သွယ်မေးမြန်းခဲ့သည်။

မေး ။ ။ စစ်ကောင်စီက အသစ်ဖွဲ့စည်းထားတဲ့ ရွေးကောက်ပွဲကော်မရှင်ကဖိတ်ခေါ်တဲ့အစည်းအဝေး ဘာကြောင့်သွားတက်သလဲရှင့်။

ဖြေ ။ ။ ဘယ်အဖွဲ့က ဖွဲ့စည်းထားတဲ့ကော်မရှင်ပဲ ဖြစ်ဖြစ် ကော်မရှင်အနေနဲ့ တရားဝင်ပါတီအနေနဲ့တော့ တရားဝင် ပြည်ထောင်စု ရွေးကောက်ပွဲကော်မရှင်က ဖိတ်တော့ သွားတက်ရမယ်လေ။

မေး ။ ။ ဘာတွေ ဆွေးနွေးဆုံးဖြတ်ခဲ့ကြပါသလဲရှင့်။

ဖြေ ။ ။ ဘာတွေ ဆွေးနွေးဆုံးဖြတ်ခဲ့သလဲဆိုရင် လာမယ့်ရွေးကောက်ပွဲမှာ (PR)စနစ် အချိုးကျ ကိုယ်စားပြုမှု ရွေးကောက်ပွဲစနစ်နဲ့ လုပ်မယ်ဆိုတာ အဲ့ဒါပါပဲ။

မေး ။ ။ ကျားဖြူပါတီ အနေနဲ့ စစ်ကောင်စီက အသစ်ပြန်လည်ပြုလုပ်မယ့်ရွေးကောက်ပွဲကိုတော့ ထောက်ခံကြိုဆိုတယ်လို့ ပြောလို့ရတာလား။

ဖြေ ။ ။ အဲ့လို ထောက်ခံတယ်လို့ မပြောရဘူးလေ။ ထောက်ခံတယ် မထောက်ခံဘူးဆိုတာ ဘယ်အစိုးရ ဘယ်ပါတီက ရွေးကောက်ပွဲ ကော်မရှင်ပဲ ဖြစ်ဖြစ်တရားဝင် ရပ်တည်နေတဲ့ ပါတီတစ်ခုဟာ ကော်မရှင်ဖိတ်ရင် NLD ကော်မရှင်တုန်း ကလည်း အန်ကယ်တို့ တက်တယ်။အခုလက်ရှိ နစက အစိုးရဖွဲ့တဲ့ ကော်မရှင်လည်း အန်ကယ်တို့တက်တယ်။

ဦးသိန်းစိန် အစိုးရလက်ထက်တုန်းက ဖွဲ့စည်းထားတဲ့ ကော်မရှင်လည်း အန်ကယ်တို့ တက်တယ်။

ဘယ်အစိုးရက ဖွဲ့စည်းထားတဲ့ ရွေးကောက်ပွဲ ကော်မရှင် ဖြစ်ဖြစ် အန်ကယ်တို့ တရားဝင် ပါတီတစ်ခုအနေနဲ့ သူတို့ဆီမှာ မှတ်ပုံတင်ထားတဲ့အတွက်ကြောင့် မှတ်ပုံတင် အမှတ် ၁၅ အနေနဲ့ အန်ကယ်တို့က သွားတက်ရမှာပဲ။

NLD ဖွဲ့တဲ့ ကော်မရှင်ပဲ ဖြစ်ဖြစ် ဦးသိန်းစိန် ကော်မရှင်ပဲဖြစ်ဖြစ် နစက နိုင်ငံတော် စီမံအုပ်ချုပ်ရေးကောင်စီက ဖွဲ့စည်းထားတဲ့ ကော်မရှင်ပဲဖြစ်ဖြစ် နောင်ဘယ်အစိုးရက ဖွဲ့စည်းထားတဲ့ ကော်မရှင်ပဲ ဖြစ်ဖြစ် အန်ကယ်တို့ တရားဝင် ပါတီအနေနဲ့ သွားတက်ရမယ်။

သူတို့ အသိအမှတ်ပြုထားတဲ့ ပါတီတစ်ခုအနေနဲ့ သွားတက်ရမှာပဲလေ။ ဖိတ်ရမယ့် တာဝန် သူတို့တာဝန် တက်ရမယ့် တာဝန်က အန်ကယ်တို့ တာဝန်။

စစ်ကောင်စီဆိုတာ နိုင်ငံတော် စီမံအုပ်ချုပ်ရေး ကောင်စီက တကယ်တမ်းကျတော့ စစ်ကောင်စီ အစစ်မဟုတ်ဘူး။

အရပ်သားကောင်စီ နစက နိုင်ငံတော် စီမံအုပ်ချုပ်ရေးကောင်စီထဲမှာ အရပ်သားက အရာရှိတွေထက် ပိုများတယ်။ ဒီဟာက စစ်ကောင်စီမဟုတ်ဘူး။

နိုင်ငံတော် စီမံအုပ်ချုပ်ရေးကောင်စီ အရပ်သား တစ်ဝက်ကျော်နဲ့ အရာရှိတွေ တစ်ဝက်နီးပါး ပူးပေါင်းထားတဲ့ အုပ်ချုပ်ရေးအဖွဲ့။ တကယ်လို့ မဲခွဲတယ်ဆိုလို့ရှိရင် အရပ်သားတွေက မဲနိုင်တယ်။

အရင်တုန်းက အဲ့လိုသာ အာဏာသိမ်းဆိုရင် အရပ်သား တစ်ယောက်မှ မပါဘူး။ တိုင်းမှူးတွေကပဲ အုပ်ချုပ်တယ်။

ခုတိုင်းမှူးတွေက မဆိုင်ဘူး။ ဒီအရပ်သားတွေကပဲ အုပ်ချုပ်တယ်။ ဆိုလိုတဲ့အကြောင်းက အရှိတရားကို မြင်တတ်ဖို့တော့ လိုပါတယ်။

အန်ကယ်တို့လည်း စစ်အုပ်ချုပ်ရေးကို မထောက်ခံဘူး။ တစ်ပါတီ အာဏာရှင်ကိုလည်း မထောက်ခံဘူး။ ပြည်သူလူထု လိုလားတဲ့ ဖက်ဒရယ် ဒီမိုကရေစီကိုပဲ အန်ကယ်တို့ ကျားဖြူပါတီက လိုလားချင်တယ်။

တိုင်းပြည်ဖွံ့ဖြိုးစေချင်တယ်။ သျှမ်းပြည်ကြီး ဖွံ့ဖြိုးတိုးတက်စေချင်တယ်။ ငြိမ်းချမ်းချင်တယ်။ သျှမ်းအချင်းချင်း တိုက်ခိုက်တာလဲ အန်ကယ်တို့ မလိုချင်ဘူး။

အန်ကယ်တို့ မတိုက်ခိုက်ဖို့ဆိုလည်း Statement လည်း ထုတ်ခဲ့ပြီးပြီ။ တိုင်းရင်းသား အချင်းချင်းလည်း မတိုက်ပါနဲ့။ တိုင်းရင်းသား နဲ့ စစ်တပ်လည်းမတိုက်ပါနဲ့ သျှမ်းပြည်က နှစ်ပေါင်း (၆၀) ကျော်ရှိပြီ။

စစ်ဘေးစစ်ဒဏ်ကို ခံရလို့ စစ်ဘေးရှောင် ဒုက္ခသည်တွေအနေနဲ့ ဘုန်းကြီးကျောင်းတွေမှာ သွားသွားပြီးတော့ နေရတဲ့အတွက်ကြောင့်မလို့ သျှမ်းပြည်သူလူထုက အရမ်းဒုက္ခရောက်တယ်။
သျှမ်းပါတီ စစ်စစ် တစ်ဖွဲ့အနေနဲ့ သျှမ်းပြည်သူလူထုကို အရမ်းသနားတယ်။ ပြည်သူတွေကို ဒုက္ခမရောက်စေချင်ဘူး။

အေးအေးချမ်းချမ်း တည်တည်ငြိမ်ငြိမ်နဲ့ လုပ်ကိုင်စားသောက်စေချင်တယ်။ ဖွံ့ဖြိုးတိုးတက်စေချင်တယ်။ ကြီးပွားချမ်းသာ စေချင်တယ်။

လူငယ်တွေလည်း ပညာတတ်ပြီးတော့ ကျောင်းပညာကောင်းကောင်းသင်နိုင်အောင် ဖြစ်စေချင်တယ်။ အန်ကယ်တို့ နိုင်ငံရေးလုပ်တာ ဒီရည်ရွယ်ချက် နဲ့ လုပ်တာပါ။

မေး ။ ။ အန်ကယ်အနေနဲ့ လက်ရှိနိုင်ငံရေး ပြဿနာကိုဘယ်လိုဖြစ်စေချင်လဲ။ ဘာများ ဖြည့်စွက်ပြောချင်ပါသလဲ။

ဖြေ ။ ။ အန်ကယ်တို့က သျှမ်းတိုင်းရင်းသားအပါအဝင် တိုင်းရင်းသားတွေ အားလုံးက ဖက်ဒရယ်ပြည်ထောင်စုကို လိုချင်တယ်။

ဒီမိုကရေစီတစ်ခုတည်းနဲ့ ငြိမ်းချမ်းရေး ပြဿနာ မဖြေရှင်းနိုင်ဘူး။ ဒီမိုကရေစီ တစ်ခုတည်း လုပ်မယ်ဆိုလို့ရှိရင် ပြည်ထောင်စု မြန်မာနိုင်ငံမှာ ဗမာတိုင်းရင်းသားက ၅၀ ရာခိုင်နှုန်းကျော်တယ်။

ကျနော်တို့ တိုင်းရင်းသားတွေက ဘယ်လိုမှ သူတို့ကို မကျော်နိုင်ဘူး။ မကျော်နိုင်တော့ အန်ကယ်တို့က ဘာလိုချင်လဲဆိုတော့ ရှင်းရှင်းပြောမယ်ဆိုလို့ရှိရင် ပင်လုံစာချုပ် စာပိုဒ် အပိုဒ် (၅) နဲ့ အပိုဒ် (၇) အရ ဒို့သျှမ်းပြည်နယ်က သျှမ်းပြည်သူလုထုကပဲ အုပ်ချုပ်ရမယ်။

တခြားပြည်နယ်က ပုဂ္ဂိုလ်လာအုပ်ချုပ်တာ အန်ကယ်တို့ မကြိုက်ဘူး။ အန်ကယ်တို့ ဘာလိုချင်လဲ ကိုယ့်ပြည်နယ်ကို အုပ်ချုပ်ချင်တယ်။ Power Sharing အာဏာခွဲဝေမှု အပြည့်အဝလိုချင်တယ်။ သယံဇာတခွဲဝေမှု အပြည့်အဝ လိုချင်တယ်။ နောက်ပြီးတော့ အခွန်အခတွေ ခွဲဝေမှု လိုချင်တယ်။

အန်ကယ်တို့ သျှမ်းပြည်နယ် အစိုးရအဖွဲ့ ဖြစ်စဉ်အခါတုန်းက အခြေခံ ဥပဒေ ပြင်ဆင်ရေးဆိုပြီးတော့ ဦးသိန်းစိန် အစိုးရ လက်ထက်ကတည်းက ဘာတွေ ဘယ်လို ဖြစ်စေချင်သလဲဆိုပြီးတော့ ဒို့သျှမ်းပြည်နယ်အစိုးရကို မေးလာတယ် မေးခွန်း။ မေးလာတဲ့ခါ အန်ကယ်တို့ ကက်ပိနက် အစည်းအဝေးထဲမှာ ဘယ်လိုဆုံးဖြတ်ထားလဲဆိုတော့ အန်ကယ်ပဲ စာတမ်းရေးပြီးတော့ တင်လိုက်တယ်။

တိုင်းဒေသကြီး နဲ့ ပြည်နယ်မှာ ထွက်ရှိတဲ့ မြေပေါ်မြေအောက် သယံဇာတများအားလုံး အခွန်အခများအားလုံး အခွန်အခဆိုတာ နယ်စပ်ဒေသရော ပြည်နယ်တွေမှာရော ရရှိတဲ့ အခွန်အခတွေအားလုံး ဒီသယံဇာတတွေအားလုံး အခွန်ခတွေအားလုံး ရရှိတဲ့ဟာတွေ အားလုံးက ပြည်နယ်အစိုးရတွေမှာ ၇၀ ရာခိုင်နှုန်း ရ ရမယ်။

ပြည်ထောင်စု အစိုးရက (၃၀) ရာခိုင်နှုန်းပဲ ရရမယ်လို့ အန်ကယ်တို့က တင်ခဲ့တယ်။ အန်ကယ်တို့ ဘာကြောင့် ဒီလိုပြောလဲဆိုတော့ အန်ကယ်တို့က ဖက်ဒရယ်ပြည်ထောင်စုပဲ လိုချင်တယ်။ ဒီမိုကရေစီဖက်ဒရယ်မဟုတ်ဘူး။။ ဖက်ဒရယ် ဒီမိုကရေစီ လိုချင်တယ်။ အဲ့ဒါပါပဲ။

စိတ်ရှည်လက်ရှည်ဖြေကြားပေးတဲ့အတွက် SNDP ပါတီ ဥက္ကဌ စိုင်းအိုက်ပေါင်းကို သျှမ်းသံတော်ဆင့်က ကျေးဇူးအထူးတင်ရှိပါတယ်။