ကယားပြည် (ကရင်နီပြည်) ဒီးမော့ဆိုမြို့တွင် ယေန့( မေ ၂၁ ရက်) မနက် ၈နာရီခွဲကျော် တွင် ဒီးမော့ဆိုပြည်သူ့ကာကွယ်ရေးတပ်နှင့် စစ်ကောင်စီတို့ကြား တိုက်ပွဲဖြစ်ပွား ကြောင်း သတင်းရရှိသည်။
အဆိုပါ တိုက်ပွဲသည် ဒီးမော့ဆို ဒေါငံခါးရပ်ကွက်နှင့် မြို့မရပ်ကွက် ၊ မားနာပလော့ ရပ်ကွက်တို့ တွင် တိုက်ပွဲဖြစ်ပွားခဲ့ ကာ ပြည်သူများ ထွက်ပြေး တိမ်းရှောင်နေရကြောင်း ဒီးမော့ဆို ဒေသခံများ ပြောပြချက်အရသိရသည်။
စစ်ကောင်စီ တပ်မှ စစ် အင်အားအများအပြားဖြင့် နယ်မြေအတွင်းကျူးကျော်လာပြီး ပြည်သူများကို ပစ်ခတ်ဖမ်းဆီးမှု ပြုုလုပ်နေသည့်အတွက် ဒီးမော့ဆိုပြည်သူ့ကာကွယ်ရေးတပ်က ပြန်လည် ခုခံကာကွယ်ရခြင်းဖြစ်ကြောင်းလည်း ဒီးမော့ဆို ဒေသခံတစ်ဦးက သျှမ်းသံတော်ဆင့် ကို ပြောသည်။
“စစ်ကောင်စီ အုပ်စုတွေ အင်အားထပ်ဖြည့်လာတယ်။ နောက် နယ်မြေ ကျူးလွန်လာတယ်။ တိုက်ပွဲက တော့ အခုထိ ဖြစ်နေတုန်းပါ။ ကြားရတာတော့ အရပ်သား တဦးကျဆုံးသွားတယ်လို့ ပြောတယ် ” ဟု ၎င်း က ဆိုသည်။
လက်ရှိ အချိန်ထိ စစ်ကောင်စီ တပ်ဖွဲ့ မှ လက်နက်ကြီး၊ လက်နက်ငယ်ဖြင့် ဆက်တိုက် ပစ်ခတ်မှုကြောင့် ဒေသခံ အမျိုးသမီး၊ ကလေးနှင့် သက်ကြီးရွယ်အိုတို့က ဘေးလွတ်ကင်းရန်နေရာမှာရှောင်ပုန်းနေရကြောင်း သိရသည်။
စစ်ကောင်စီ အုပ်စုဘက်မှစစ်အင်အား အလုံးအရင်း ဖြည့်တင်းနေပြီး၊ တိုက်ပွဲကြောင့် ထိခိုက်ဒဏ်ရာရရှိမှု အတိအကျကို လက်ရှိ မသိရှိရသေးကြောင်း လည်း ဒီးမော့ဆို ပြည်သူများက ပြောသည်။
