သျှမ်းမြောက် သီပေါမြို့နယ် နမ်လန်မြို့ ဝမ်စိမ်းကျေးရွာတွင် ထွက်ပြေးတိမ်းရှောင်သည့် စစ်ရှောင် (၂၅၀၀)ကျော် အတွက် စားနပ်ရိက္ခာ အကူအညီလိုအပ်နေကြောင်း စုံစမ်းသိရသည်။
နမ့်လန်မြို့ ဝမ်စိမ်းကျေးရွာအနီး တွင် ယမန်နေ့ (မေ ၁၉ )ရက် မနက်(၅)နာရီ မှစတင်ကာ RCSS/SSA နှင့် SSPP/SSA တို့ တိုက်ပွဲဖြစ်ပွားခဲ့ပြီး၊ ယနေ့ချိန်ထိ စစ်ရေး တင်းမာနေကြောင်း သိရသည်။
တိုက်ပွဲကြောင့် နမ့်လန်မြို့ဝမ်စိမ်းကျေးရွာ အုပ်စု ဝမ်စိမ်းဘုန်းကြီးကျောင်းသို့ ရောက်ရှိလာသည့် စစ်ရှောင် (၂၅၁၀)ဦး သည် ကောင်းခမ်းရွာ၊ ပန်ဆိမ်ရွာ၊ စံကားရွာ၊ ကုံးမုံရွာ၊ ဟိုနမ့်ရွာ၊ ဝမ်တပ်ရွာ၊ ကုံးရုံးရွာ၊ နှင့် ကုံးညုရွာ မှ ဒေသခံများဖြစ်ကြောင်း သိရသည်။
“ စစ်ရှောင်တော်တော်များများရောက်လာတယ်။ အခက်အခဲကတော့ အများကြီးပဲ။ အစားအသောက်တွေလိုတယ်။ ဆေးဝါးတွေလည်းလိုတယ်” ဟု စစ်ဘေးရှောင်ကို ကူညီပေးနေသည့် အမျိုးသမီး တစ်ဦးက သျှမ်းသံတော်ဆင့် ကို ပြောသည်။
စစ်ဘေးရှောင်များအတွက် စားနပ်ရိက္ခာ၊ ဆေးဝါး၊ တကိုယ်ရေသုံးပစ္စည်းများနှင့် အမျိုးသမီး လစဉ်သုံးပစ္စည်းများကို အဓိက လိုအပ်နေကြောင်းသိရသည်။
“ ထွက်ပြေးလာတဲ့သူတွေ က တချို့ ဘာမှ မရလာတာရှိတယ်။ တချို့တော့လည်း ပါလာပေမယ့် ရက်ရှည်အတွက် ခက်ခဲတယ်။ တိုက်ပွဲ ရက်မရှည်ဖို့ပဲလိုတယ်” ဟု စစ်ရှောင်များကို ကူညီနေသည့် အမျိုးသမီးက ပြောသည်။
လက်ရှိ စစ်ရှောင်(၂၅၁၀)ဦးရှိနေသဖြင့် ဝမ်စိမ်းဘုန်းကြီးကျောင်းတွင် မဆံ့သဖြင့် တချို့ မိသားစုဝင်များသည် မိမိပါလာသည့် ထော်လဂျီပေါ်တွင် နေထိုင်ရကြောင်း လည်း ၎င်း ကပြောသည်။
တိုင်းရင်းသားအချင်းချင်းဖြစ်ပွားသည့် တိုက်ပွဲရပ်တန့်ပေးရန်လိုအပ်ကြောင်း၊ စိုက်ပျိုးသည့် အချိန်ဖြစ်သဖြင့် လက်နက်ကိုင်များ အချင်းချင်း တွေ့ဆုံဆွေးနွေးပြီး တိုက်ပွဲ အမြန်ရပ်ပေးရန်စေလိုကြောင်း စစ်ဘေးရှောင်များက ပြောဆိုလိုက်သည်။
“ ဒီချိန်ကာလ တိုက်ပွဲမဖြစ်စေချင်ဘူး။ စစ်ရေးက ၂ဖက်လုံးအချိန်မရွေးဖြစ်နိုင်တယ်။ စစ်ရေး တင်းမာမှု မရှိရင်တော့ ကျနော်တို့နေရပ်ပြန်ပြီး တောင်ယာအေးချမ်းလုပ်ချင်တယ်” ဟု စစ်ဘေးရှောင်လာသူ တဦး က ပြောသည်။
သီပေါမြို့နယ်အတွင်း တိုင်းရင်းသားလက်နက်ကိုင်အချင်းချင်းတိုက်ပွဲဖြစ်ပွားမှုကြောင့် ထွက်ပြေးတိမ်းရှောင်နေရသည့် စစ်ဘေးရှောင် ( ၃၀၀၀) ကျော်ရှိကြောင်း သိရသည်။
