သျှမ်းပြည်မြောက်ပိုင်း နမ္မတူမြို့နယ်အတွင်း တိုင်းရင်းသားအချင်းချင်း ဖြစ်ပွားသည့် တိုက်ပွဲ သည် ယနေ့ချိန်ထိ စစ်ရေး တင်မာနေသေးသဖြင့် စစ်ရှောင်များ နေရပ်မပြန်နိုင်သေးကြောင်းသိရသည်။
ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော် (RCSS/SSA) နှင့် မြောက်ပိုင်း မဟာမိတ်တို့ သည် (၂) လကျော်ကြာ တိုက်ပွဲဖြစ်ပွားပြီး ယမန်နေ့ မေ (၁၇) ရက်တွင်လည်း တိုက်ပွဲဖြစ်ပွားခဲ့ကြောင်း ဒေသခံများထံမှ စုံစမ်းသိရှိရသည်။
“နှစ်ဖက်တပ်က ပစ်ခတ်နေသေးတဲ့အတွက် ကျနော်တို့ အိမ်ပြန်လို့မရသေးဘူး။ အရမ်းပြန်ချင်နေပြီ။ စိုက်ပျိုးရာသီလည်း ရောက်ပြီဆိုတော့ စပါးတွေ၊ ပြောင်းတွေ ပြန်စိုက်ရတော့မယ်” ဟု မန်စံစစ်ရှောင်စခန်းမှာ ရောက်ရှိသည့် အမျိုးသားတဦး က သျှမ်းသံတော်ဆင့် ကိုပြောသည်။
လက်ရှိ အချိန်သည် စိုက်ပျိုးရာသီဖြစ်ပြီး ၊ လယ်ယာစိုက်ပျိုးမှု မရပါက နောင်နှစ်အတွက် စားဝတ်နေရေး ခက်ခဲနိုင်ကြောင်း၊ ထို့ကြောင့် စစ်ရှောင်များသည့် မိမိနေရပ်သို့ ပြန်ကာ လယ်ယာစိုက်ပျိုးမှုကို ပြုလုပ်ခြင်နေကြောင်း မန်စံရောက်စစ်ရှောင်က ဆိုသည်။
“ ဒီရာသီ စိုက်ပျိုးထားမှ နောက်နှစ် အတွက် ငွေရမယ်။ စိုက်ပျိုးရေးမရှိရင် ကျနော်တို့ ဘဝ စားသောက်ခက်ခဲမယ်။ အခု စစ်ရှောင်ရတာတောင် အရမ်းခက်ခဲနေပြီ၊ သူများလာလှူဒါန်းတာပဲ စားနေရတယ်” ဟု ၎င်း စစ်ရှောင် ကဆိုသည်။
သျှမ်းမြောက် နမ္မတူမြို့နယ်အတွင်း တိုက်ပွဲများ ရပ်တန့်သွားပါက ပြည်သူများအနေဖြင့် မြေမြုပ်မိုင်း အန္တရာယ်ကို စိုးရိမ်နေရသေးကြောင်း၊ မြေမြုပ်မိုင်းကြောင့် အသက်ဆုံးရှုံးနေရသူများရှိနေကြောင်းလည်း မန်စံ စစ်ရှောင်ကူညီပေးနေသူတဦး ကပြောသည်။
“ တိုက်ပွဲတွေ ငြိမ်ရင်တောင် မြေမြုပ်မိုင်း က ရှိနေသေးတယ်။ သူတို့တွေက မိုင်းနင်းမိမှာကြောက်နေကြတယ်။ ဒါတွေကြောင့်လည်း သူတို့မပြန်ရဲကြဘူး” ဟု စစ်ရှောင်ကူညီသူကပြောသည်။
ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်အဖွဲ့တို့ တိုက်ပွဲကြောင့် နမတူမြို့နယ်အတွင်း စစ်ရှောင် (၁၀၀၀)ကျော် နေရပ်သို့ မပြန်နိုင်သေးကြောင်း သိရသည်။
နှစ်ဖက်တိုက်ပွဲကြောင့် ဒေသခံ ပြည်သူ၏ နေအိမ်များ၊ မီးလောင်ဆုံးရှုံးခဲ့ရခြင်း လက်နက်ကြီးကြောင့် သေဆုံးသူများလည်း ရှိခဲ့သည်။
