ထိုင်းနိုင်ငံသို့ တရားမဝင် ဝင်ရောက်လာသည့် မြန်မာနိုင်ငံသား (၁၀၁) ကို ယနေ့ (မေ ၁၇)ရက် မနက် (၈)နာရီကျော်တွင် မြန်မာနိုင်ငံဘက်သို့ ပြန်လည်လွှဲပြောင်းပေးခဲ့ပြီး ထိုထဲတွင် ကိုဗစ်-၁၉ ပိုးတွေ့ရှိသူ (၄)ဦးရှိကြောင်း သိရသည်။
ထိုင်းနိုင်ငံဘက်တွင် အကြောင်းအမျိုးမျိုးကြောင့် တရားမဝင် ဝင်ရောက်လာသည့် မြန်မာနိုင်ငံသား (၁၀၁)ဦးထဲတွင် အမျိုးသား (၅၁)ဦးနှင့် အမျိုးသမီး (၅၀)ဦးရှိကြောင်း၊ ထိုသူများကို ကိုဗစ်-၁၉ ပိုးတွေ့သူ ၄ဦး ကို တာချီလိတ်ဆေးရုံသို့ ပို့ဆောင်ထားသည်။
ထိုပြန်ပို့ခံရသည့်သူများသည် ထိုင်းနိုင်ငံ အသီးသီမှ ပြစ်ဒဏ်ကျကာ ပြစ်ဒဏ်ရက်စေ့ပြီး ပြန်လွှတ်လာသူများ ဖြစ်ကြောင်း သိရသည်။
“ထိုင်းဘက်က လွှဲပြောင်းလာတဲ့ တရားမဝင် နိုင်ငံသားတွေကို ကျနော်တို့ လက်ခံပြီးတော့ သက်ဆိုင်ရာ ပြည်နယ်/တိုင်းဒေသ တွေကို ပြန်လွှဲပြောင်းပေးမယ်။ကုန်ကျစရိတ်ကတော့ ကိုယ့်ဘာသာကိုယ်ပေးရမယ်” ဟု အဆိုပါ ကော်မတီ တစ်ဦးကပြောသည်။
ကိုဗစ်-၁၉ ကူးစက်မှုနှုန်းမြင့်တက်နေသေးသည့် အတွက် ထိုင်းနိုင်ငံတွင် လုံခြုံရေး တင်းကြပ်နေသေးပြီး၊ နယ်စပ်မျဉ်းတွင် သံဆူးကြိုးများ ကားထားကာ အစောင့်များလည်း ချထားကြောင်း သိရသည်။
ထိုင်းနိုင်ငံတွင် ကိုဗစ်-၁၉ တတိယလှိုင်းဖြစ်လာသော်လည်း နယ်စပ်လုံခြုံရေးများ တင်းကြပ်စွာ ချထားကြောင်း သိရသည်။
နယ်စပ်ဘက်မှ လုံခြုံရေး တင်းကြပ်စွာ ရှိထားပေမယ့် ထိုင်းဘက်သို့ တရားမဝင် ဝင်ရောက်သည့် မြန်မာနိုင်ငံသားများ လည်း နေ့စဉ်နှင့်အမျှ ဖမ်းဆီးရမိခဲ့သည်။
ဖေဖော်ဝါရီ (၁) ရက်နေ့မှ စတင်ပြီး မြန်မာနိုင်ငံတွင်း စစ်တပ်က အာဏာသိမ်းပြီးနောက် ပြည်သူအများအပြား အလုပ်အကိုင် အခွင့်အလမ်း ထိခိုက်သဖြင့် ထိုင်းနိုင်ငံသို့ နယ်စပ်မှ တစ်ဆင့် တရားမဝင် ဝင်ရောက်လာသူ များပြားလာသည်။
ယနေ့ မေ (၁၇) ရက် နေ့လည် ၁၂ နာရီခွဲ ဒေသစံတော်ချိန်အရ ထိုင်းနိုင်ငံတွင် ကိုဗစ်-၁၉ ကူးစက်ခံရသူ စုစုပေါင်း (၁၁၁ ၀၈၂) ဦး၊ ယနေ့ လူနာအသစ် (၉၆၃၅) ဦး ဦးရှိကြောင်း ထိုင်းသတင်းမှာ ဖော်ပြထားသည်။
