ကချင်ပြည် မိုးမောက်မြို့နယ်တွင် စစ်ကောင်စီ နှင့် ကချင်တပ်မတော်(KIA) တို့ တိုက်ပွဲကြောင့် စစ်ဘေးရှောင်များအတွက် အမိုးအကာများ ချက်ပြုတ်ရန်အတွက် ထင်းများ လိုအပ်လာကြောင်း စုံစမ်းသိရှိရသည်။
ထိုတိုက်ပွဲကြောင့် စစ်ဘေးရှောင် (၄၈၀၀) ကျော် ရှိပြီး ၎င်းတို့အထဲတွင် သျှမ်းလူမျိုးများ နေထိုင်သည့် ကျေးရွာ (၅၀) ကျော် ရွာလုံးကျွတ်သည် ဗန်းမော်မြို့နယ်ရှိ စစ်ရှောင်စခန်းများ၊ ဘုန်းကြီးကျောင်းများ၊ ကျေးရွာများ၊ စသည့် နေရာများသို့ စစ်ရှောင်များ လာရောက်နေထိုင်ကြကြောင်း စုံစမ်းသိရှိရသည်။
စစ်ဘေးရှောင်များအတွက် အလှူရှင်များမှ စားနပ်ရိက္ခာများ ငွေများ လှူတန်းသည်ထက် ရေရှည်အတွက် ချက်ပြုတ်ရေးမှာ မရှိမဖြစ် ထင်းများလည်း လိုအပ်လာကြောင်း နှင့် အမိုးအကာများ လည်း လိုအပ်ကြောင်း စစ်ရှောင်ကော်မတီ တစ်ဦး က သျှမ်းသံတော်ဆင့် ကိုပြောသည်။
“စစ်ရှောင်တွေများလာပြီဆိုရင်စားနပ်ရိက္ခာတွေ သွားလှူကြတယ်။ ဒါပေမယ့် သူတို့ ချက်ပြုတ်စားသောက်ဖို့ ထင်းတွေကဘယ်သူမှ မလှူကြဘူး။ ၁၀ ရက်အတွင်းကတော့ အဆင်ပြေပေမယ့် လနဲ့ချီလာရင် ထင်းတွေလည်း ရှားပါးလာမယ်။နောက်မိုးရွာသီရောက်ပြီဆိုတော့ အမိုးအကာတွေလိုမယ်” ဟု စစ်ရှောင်ကော်မတီဝင် တစ်ဦး က သျှမ်းသံတော်ဆင့် ကိုပြောသည်။
တိုက်ပွဲများ ဆက်လက်ဖြစ်ပွားနေသေးသဖြင့် စစ်ဘေးရှောင်များနေအိမ်သို့ပြန်ရန် အဆင်မပြေသေးကြောင်း၊ စစ်ဘေးရှောင်စခန်းတွင် ဆက်လက်နေထိုင်ရမည်ဖြစ်သဖြင့် စစ်ဘေးရှောင်များအတွက် ရေရှည်လိုအပ်ချက်ကို ကူညီပေးရန် စစ်ရှောင်ကော်မတီက တောင်းဆိုလိုက်သည်။
“လွန်ခဲ့တဲ့ (၂) ရက်က အသံတွေ ငြိမ်သွားတော့ စစ်ရှောင်တွေ အနည်းအကျဉ်း အိမ်ပြန်သွားကြတယ်။ မနေ့က ပစ်ခတ်သံ ပြန်ရှိတော့ ပြန်ပြေးလာကြရတယ်။ ခုထိ စစ်ကတော့ ဖြစ်နေတုန်းပဲ” ဟု ကော်မတီ တစ်ဦးကပြောသည်။
မိုးရာသီရောက်လာပြီဖြစ်သည့်အတွက် ကျန်းမာရေးအပိုင်းလည်း လိုအပ်သလို ကလေးများအတွက် ပညာရေးအပိုင်း လည်း လိုအပ်လာကြောင်း စစ်ရှောင်ကော်မတီအဖွဲ့ဝင် တဦး ကပြောသည်။
“မိုးရာသီရောက်လာပြီဆိုရင် ခြင်တွေလည်း များလာမယ်။ ကလေးရော လူကြီးရော ကျန်းမာရေးအတွက်လဲ လိုအပ်တယ်။ အဲ့ဒီအပိုင်းတွေလည်း စဉ်းစားပြီးတော့ လှူဒါန်းပေစေချင်တယ်။” ဟု ၎င်းကပြောသည်။
ဖေဖော်ဝါရီ နောက်ဆုံးပတ်မှ စတင်ပြီး မိုးမောက်မြို့နယ်တွင် တိုက်ပွဲဖြစ်ပွားကြသည့်အတွက် စစ်ရှောင်များ နေရပ်သို့ ၁ လကျော်ကြာ စစ်ဘေးရှောင်နေကြရသည်။
“ပညာရေးအပိုင်း ကလေးတွေက စစ်ရှောင်နေရတဲ့အချိန်မှာ သူတို့တွေက စာမသင်ရဘူး ဒီတိုင်းပဲ နေ့တိုင်း ထ မယ် ကစားမယ် အိပ်မယ်ဆိုတော့ ပညာရေးအပိုင်းမှာလည်း နှောင့်နှေးလာတော့ လှူတန်းတဲ့ အပိုင်း မှာလည်း ကလေးတွေ အတွက် ဖတ်စရာ စာအုပ်တွေ အနည်းဆုံးတော့ သူတို့ ပုံဆွဲချင်လည်းဆွဲမယ်” ဟု စစ်ဘေးရှောင် ကော်မတီ ဝင်တဦး ကဆိုသည်။
မိုးမောက်မြို့နယ်တွင် စစ်ရေးပြင်းထန်နေလျက်ရှိပြီး အကြမ်းဖက် စစ်ကောင်စီမှ ရဟတ်ယာဉ်သုံးကာ လေကြောင်းလိုင်းဖြင့် ပစ်ခတ်မှုများကြောင့် အရပ်သားနေအိမ်များစွာ ပျက်စီးခဲ့ရသည်။
မေ(၃) ရက်နေ့တွက် မိုးမောက်မြို့နယ် ကုန်းလောက်ကျေးရွာအနီး စစ်ကောင်စီ၏ တိုက်ခိုက်ရေး ရဟတ်ယာဉ်ကို KIA မှ ပစ်ချလိုက်နိုင်ပြီး တိုက်ပွဲဖြစ်ပွားကာ ကုန်းလောကျေးရွာမှ ဘုန်းကြီးတစ်ပါး ပျံလွန်ခဲ့ရပြီး ဒေသခံ (၃) ဦး လက်နက်ကြီးထိမှန် သေဆုံးခဲ့ရသည်။
Leave a Comments