သျှမ်းပြည် မြောက်ပိုင်း သီပေါမြို့တွင် စစ်အာဏာရှင် အလိုမရှိကြောင်း ဆန္ဒပြလူငယ် (၄)ဦး ဖမ်းဆီးခံရပြီး ရာဇာသတ်ကြီး ပုဒ်မ (၅၀၅-က)ဖြင့် တရားစွဲဆို အမှုဖွင့်ထားသည်။

ထိုဖမ်းခံရသူ (၄)ဦးသည် မေ ၉ ရက် ညပိုင်းတွင် စစ်ကောင်စီမှ နေအိမ်ထဲထိ ဝင်ရောက်ကာ ဖမ်းဆီးသွားပြီး၊ မေ (၁၁)ရက်တွင် ရာဇာသတ်ကြီး ပုဒ်မ (၅၀၅-က)ဖြင့် တရားရုံးထုတ်ခဲ့ကြောင်း သီပေါလူငယ်တဦး က သျှမ်းသံတော်ဆင့် ကို ပြောသည်။

“ ဖမ်းတာက ညက လာဖမ်းသွားတာ။ သီပေါက ဒလံ အကြီးက သတင်းပေးလမ်းပြလို့ ကျနော်တို့ ပြည်သူ ၄ ဦးက ဖမ်းဆီးခံရတာ။ သူတို့က ၂၁ ရက်နေ့ကျရင် ရုံးထုတ်စစ်ဆေးအုံးမှာ။ ခုတော့ သီပေါအကျဉ်းထောင်ထဲမှာ ပဲရှိနေသေးတယ်။” ဟု သီပေါမြို့ ဒေသခံအမျိုးသားတစ်ဦးက‌ သျှမ်းသံတော်ဆင့်ကို ပြောသည်။

အဆိုပါ ဖမ်းဆီးခံရသူများသည် လက်ဖက်ရည်ဆိုင်ဝန်းတွင် အိမ်ငှားနေထိုင်သူတစ်ဦး၊ ဖမ်းဝရမ်းထုတ်ခံရသူ တစ်ဦး၊ ကျန်နှစ်ဦးမှာ ဂွ၊ဓား၊ ဒိုင်ကားများ ပြုလုပ်ခြင်းကြောင့် ဖမ်းဆီးခံရကြောင်း၊ ထိုဖမ်းခံရသူများကိုလည်း အမြန်ပြန် လွှတ်ပေးရန် သီပေါလူငယ်များက ပြောသည်။

လက်ရှိ သီပေါမြို့တွင် ညအချိန်မတော်ဝင်ဖမ်းခံရသည့် လူငယ်များသည် စစ်ကောင်စီ အုပ်စုမှ ဖမ်းဝရမ်ထုတ်ပြန်ထားသည့် လူမဟုတ်ကြောင်း၊ ယခုနောက်ပိုင်း ဖမ်းဝရမ်း မထုတ်ဘဲ ဝင်ရောက်ဖမ်းဆီးမှုပြုလုပ်နေသဖြင့် လူငယ်များ စိုးရိမ်မှုရှိ နေကြကြောင်း သီပေါလူငယ်များက ပြောဆိုလိုက်သည်။

“ အရင်ကတော့ ဖမ်းဝရမ်းစာရင်းကိုသိရတယ်။ ရှောင်ပုန်းနေလို့ရတယ်။ အခုတော့ ထုတ်ဖော်တာမရှိဘဲ တခါတည်းဖမ်းသွားမယ်လို့ ကြားရတယ်။ လူငယ်တစ်ချို့ကတော့ ရှောင်နေကြရပါတယ်။ မထင်တဲ့သူတွေကို ဝင်ဆွဲနေတာ ခက်တယ်” ဟု သီပေါမြို့ ဒေသခံတစ်ဦးက ပြောသည်။

တချို့ မူးယစ်ဆေးဝါး ကြောင့် ဖမ်းခံရသည့်သူကိုလည်း (၅၀၅ -က)ဖြင့် တရားစွဲဆိုထားကြောင်း သိရသည်။

သီပေါမြို့တွင် စစ်အာဏာသိမ်းပြီးနောက်ပိုင်း ဖမ်းဆီးခံရသူ စုစုပေါင်း ၈ ဦးရှိကြောင်းသိရသည်။