သျှမ်းတောင် မိုးဗြဲ နှင့် ဖယ်ခုံမြို့တွင် ယနေ့ (မေ ၁၂)ရက် မနက် (၂)နာရီ လာဘ်စားမှုဖြင့် နာမည်ကြီးသည့် ပညာရေးဝန်ထမ်းနေအိမ်များတွင် ပေါက်ကွဲမှုဖြစ်ပွားခဲ့ကြောင်း သတင်းရရှိသည်။
မိုးဗြဲမြို့ နှင့် ဖယ်ခုံမြို့နယ်အတွင်းရှိ လာဘ်စားမှုဖြင့် နာမည်ကြီးနေသည့် ပညာရေးမှူးရုံးဝန်ထမ်းအိမ်များ ရှေ့ဆင့် နောက်ဆင့် ပေါက်ကွဲမှုဖြစ်ပွားခဲ့ကြောင်း၊ ထို့ပြင် စစ်ကောင်စီ သတင်းပေး ဒလန်နေအိမ်ကိုလည်း လက်လုပ်မိုင်းဖြင့် ပစ်ခဲ့ကြောင်း မိုးဗြဲမြို့ဒေသခံ တဦး က ပြောသည်။
“ လာဘ်စားတဲ့ ဝန်ထမ်းနေအိမ်ပါ။ CDM လည်း မလုပ်ဘူး။ နောက်ပြီး စစ်တပ် သတင်းပေး အိမ်တွေ ဆက်တိုက်ပဲ ပေါက်ကွဲတယ်။ ထိခိုက်မှုတော့ အရမ်းမရှိဘူး” ဟု မိုးဗြဲ ဒေသခံက ဆိုသည်။
ထိုပေါက်ကွဲမှု ပြုလုပ်ခြင်းသည် စစ်ကောင်စီ နှင့် မပူးပေါင်းရန် ပြည်သူများဘက်မှ ရပ်တည်ပေးရန် ပညာပေးလိုက်ခြင်း သာဖြစ်ကြောင်း၊ သတိပေးနေသည့်ကြား ဆက်လက်ပြီး လာဘ်စားမှုများပြုလုပ်နေခြင်း၊ စစ်ကောင်စီသတင်းပေး ဒလန် အဖြစ် ဆက်လက်ရပ်တည်မည်ဆိုပါက ထပ်မံ ပြုလုပ်သွားမည် ဟုလည်း သိရသည်။
ပေါက်ကွဲမှုပြီးနောက် ယနေ့ (မေ ၁၂)ရက် တွင် စစ်ကောင်စီ မှ နေရာအနှံ့ လုံခြုံရေးယူထားကြောင်း၊ လမ်းသွားလမ်းလာများ စစ်ဆေးမှု တင်းကြပ်နေကြောင်း သတင်းရရှိသည်။
