စစ်အုပ်ချုပ်မှုရက် (၁၀၀) အတွင်း ကျိုင်းတုံတွင် လောင်းကစားရုံ ဖွင့်ခွင့်ပေး

0

သျှမ်းပြည်အရှေ့ပိုင်း ကျိုင်းတုံမြို့နယ်ရှိ ကျေးရွာအုပ်စုများတွင် စစ်ကောင်စီ အုပ်ချုပ်သည့် ရက်(၁၀၀) အတွင်း လောင်းကစားရုံများ ဖွင့်ခွင့်ပြုပေးထားကြောင်း သတင်းရရှိသည်။

ယနေ့ (မေ ၁၀) သည် စစ်အာဏာသိမ်းမှု ရက်(၁၀၀)ပြည့်သည့်နေရက်ဖြစ်ပြီး၊ ထို ရက် ၁၀၀ အတွင်း စစ်ကောင်စီ မှ ကျိုင်းတုံမြို့နယ် တွင် လောင်းကစားရုံများ ဖွင့်ခွင့်ပြုလိုက်သဖြင့် ကျိုင်းတုံပြည်သူများက စိုးရိမ်မှုများစွာ ရှိနေသည် ဟု သိရသည်။

လောင်းကစားဖွင့်ခွင့်ပြုထားသည့် နေရာများမှာ ကျိုင်းတုံမြို့နယ် ကတ်ဖှကျေးရွာအုပ်စု၊ ယန်းကိန်ကျေးရွာအုပ်စု၊ မိုင်းလန်းကျေးရွာအုပ်စု၊ ကတ်တောက်ကျေးရွာအုပ်စု၊ ဝပ်ဆောင်းကျေးရွာအုပ်စု၊ ကတ်ထိုင်းကျေးရွာအုပ်စု နှင့် လွယ်လုံကျေးရွာ အုပ်စု ဖြစ်သည်။

ထိုလောင်းကစားနေရာကို ကျေးရွာတွင် နေထိုင်သည့် လူငယ်အများအပြား သွားရောက် ကာ လောင်းကစား ပြုလုပ်ကြကြောင်း ကျိုင်းတုံဒေသခံ အသက် (၃၅)နှစ် အရွယ် အမျိုးသား တဦး ကပြောသည်။

“သျှမ်းတိုင်းရင်းသားတွေက လောင်းကစားကြိုက်တော့ လောင်းကစားပေးလုပ်ရင် အာဏာဖီဆန်တာတွေ မရှိတော့ဘူးဆိုတာ စစ်ကောင်စီတွေက သိထားတဲ့အတွက်ကြောင့် လောင်းကစားတွေ ပေးလုပ်တယ်လို့ပဲ မြင်တယ် ” ဟု ကျိုင်းတုံ အမျိုးသား ကပြောသည်။

စစ်ကောင်စီ သည် သျှမ်းလူငယ်များ နိုင်ငံရေး စိတ်မဝင်စားရန် နှင့် သျှမ်းလူငယ်ဘဝ ပျက်စီးရန် ရည်ရွယ်ပြီး လောင်းကစားရုံကို ဖွင့်လှစ်လိုက်ခြင်းဖြစ်ကြောင်း၊ လောင်းကစားရုံ၏ နောက်ကွယ်တွင်လည်း စစ်ကောင်စီ လက်နက်ကိုင်များရှိနေသဖြင့် မည်သူတဦးတယောက်မှ ကန့်ကွက်မှု မပြုလုပ်ရဲကြောင်းလည်း ကျိုင်းတုံဒေသခံပြည်သူများက ပြောသည်။

“ဒီလိုလောင်းကစားလုပ်တာက လူငယ်တွေ အကျင့်ပျက်စားပြီး အိမ်ထောင်ရေး ပြသာနာတွေများလာနိုင်တယ်။ လောင်းကစားများရင် မူးယစ်ဆေးဝါးတွေလည်း ပေါများလာမယ်။ ဒါ တမြင်လုပ်တဲ့သဘောပါပဲ”ဟု ကျိုင်းတုံဒေသခံ တစ်ဦး ကသျှမ်းသံတော်ဆင့် ကိုပြောသည်။

စစ်ကောင်စီ တပ်ဖွဲ့ နှင့် ရဲများက ကျေးရွာအုပ်စုမှ အုပ်ချုပ်ရေးမှူးတို့ကို ပူးပေါင်းပြီး ရာသီပွဲတော်များမှာ လောင်းကစားဖွင့်လှစ်ခြင်း၊ ကျေးရွာ တစ်နေရာမှ တစ်နေရာသို့ လှည့်ပတ်ပြီး ပြုလုပ်လေ့ရှိကြောင်း ကျိုင်းတုံဒေသခံများက ပြောဆိုကြသည်။

“ လောင်းကစားမှာ သွားရောက်ကစားတဲ့သူတွေ တအားများတယ်။ ပြီးခဲ့တဲ့ ရက်ပိုင်းကပဲ ကတ်တောက်ကျေးရွာအုပ်စုက လူငယ်တစ်ယောက် သွားကစားတာ သိန်း (၄၀၀) လောက် ရှုံးတယ်လို့ ကြားရတယ်။ ဒါက ကျနော်တို့ ကြားသိရသလောက်ပဲရှိသေးတယ်။ မူးယစ်ဆေးဝါးလည်း များလာတယ်” ဟု ကျိုင်းတုံဒေသခံ တစ်ဦး ကပြောသည်။

စစ်ကောက်စီကို အာဏာဖီဆန်သည့် အများစုသည် လူငယ်ပိုင်း လူလတ်ပိုင်းများ ဖြစ်ကြသည့်အတွက် အာဏာဖီဆန်မှုမရှိစေရန်အတွက် လောင်းကစားခွင့်ပြုမိန့်ကို ပေးထားခြင်းဖြစ်နိုင်ကြောင်းလည်း ကျိုင်းတုံဒေသခံများကပြောဆိုကြသည်။

လောင်းကစားပွဲထဲတွင် လေးကောင်ကင်များ၊ ဖဲဝိုင်းများ၊ ကုံးကင်းများ ၊ ၃၆ ကောင်များ၊ လောင်းကစားမျိုးစုံရှိပြီး ကြက်တိုက်လည်းရှိ သိရသည်။

Leave a Comments