သျှမ်းပြည်မြောက်ပိုင်း နောင်ချိုမြို့ စစ်အာဏာဖီဆန်ရေး လှုပ်ရှားမှု CDM ပါဝင်သည့် ကျောင်းဆရာမတဦး ကို စစ်ကောင်စီမှ ဖမ်းဆီးခေါ်ဆောင်သွားပြီး၊ လက်ရှိအချိန်ထိ မိသားစုဝင်များနှင့် အဆက်အသွယ်မရသေးကြောင်း စုံစမ်းသိရသည်။
နောင်ချိုမြို့ အာဏာဖီဆန်ရေး လှုပ်ရှားရေး (CDM) ပါဝင်သည့် ကျောင်းဆရာ၊ဆရာမ များကို စစ်ကောင်စီ က ရာဇာသတ်ကြီး ပုဒ်မ( ၅၀၅)ဖြင့် စတင်အမှုဖွင့်ဆောင်ရွက်လာကြောင်း သိရသည်။
လက်ရှိဖမ်းဆီးခံရသည့် ဆရာမ ဒေါ်စန္ဒာမော်ကို စစ်ကောင်စီ က မေ (၉ )ရက် ညနေပိုင်း ၄နာရီတွင် ဖမ်းဆီးခေါ်ဆောင်ခဲ့ပြီး ရာဇာသတ်ကြီး ပုဒ်မ ၅၀၅(က)ဖြင့် အမှုဖွင့်အရေးယူထားကြောင်း နောင်ချို ဒေသခံ တဦး က သျှမ်းသံတော်ဆင့်ကို ပြောသည်။
“ ပထမကတော့ အိမ်မှာလာစစ်တာ။ အိမ်မှာလက်နက်တွေ ရှိတယ်ဆိုပြီး ဝင်စစ်ကြတာ။ ဝင်စစ်တော့ ဘာမှမတွေ့ဘူးဗျ။ ဆရာမက ဈေးကနေရောက်လာတော့ စကားပြောစရာရှိလို့ဆိုပြီး စခန်း ကိုခေါ်သွားတာ။ နောက်ကျမှ ၅၀၅ နဲ့ တရားစွဲ ထားလိုက်ပြီဆိုတာ သိရတယ်” ဟု နောင်ချိုမြို့ ဒေသခံတဦး က ဆိုသည်။
လက်ရှိအချိန်ထိ ဖမ်းဆီးခံထားရသော ဆရာမကို မည့်သည့်နေရာသို့ ပို့ဆောင်ထားကြောင်း မသိရှိရသေး ကြောင်း သိရသည်။
စစ်ကောင်စီ မှ နောင်ချိုမြို့ CDM တွင်ပါဝင်သော ပညာရေးဝန်ထမ်းများကို စတင်ဖမ်းဆီးမှု ပြုလာသည့်အတွက် ပညာရေးဝန်ထမ်းများလည်း နောင်ချိုတွင် မနေရဲတော့ဘဲ လွှတ်မြောက်ရာသို့ ထွက်ပြေးတိမ်းရှောင်နေရကြောင်း CDM ဆရာမတဦးက ပြောသည်။
“ ကျမအိမ်ကို ၅ ရက်နေ့က လာစစ်တာ။ အဲနေ့တော့ အိမ်မှာမရှိဘူး။ လာရှာတယ်လို့သိရတာနဲ့ ကျမလည်း ရှောင်ထွက်လာလိုက်တာ။ တစ်ချို့ကလည်းရှောင်ထွက်လာတယ်။ တစ်ချို့ကလည်း အိမ်မှာနေသေးတယ်။” ဟု နောင်ချိုမြို့ CDM ဆရာမ တဦးက သျှမ်းသံတော်ဆင့်ကိုပြောသည်။
လက်ရှိနောင်ချိုမြို့တွင် CDM ဆရာမများသည် နောင်ချိုမြို့မှ ထွက်ခွာလာသူ ၅ ဦးရှိကြောင်းသိရသည်။
“ နောင်ချိုကနေထွက်လာတာကတော့ ၅ ယောက်လောက်တော့ရှိမယ်။ တိကျတော့ မမှတ်မိဘူး။ ကျမပြောချင်တာက အလုပ်ထုတ်ရင်လည်း ထုတ်လိုက်တော့။ ဒီလို အမှုနဲ့ ဖမ်းဝရမ် းထုတ် မနေနဲ့တော့လေ။ ကျမတို့ကတော့ CDM မှာပဲ ဆက်ပြီးတောင့်ခံသွားမယ်။ အဆုံးထိတိုက်သွားမယ်” ဟု အထက်ပါ ဆရာမ ကပြောသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းပြီးနောက်ပိုင်း စစ်ကောင်စီမှ ဖမ်းဆီးထားသောသူ ၈ ယောက်ရှိပြီး CDM တွင် ပါဝင်သူ တစ်ဦး ဖမ်းဆီးခံထားရကြောင်းသိရသည်။ ဖမ်းဆီးခံထားရသူများသည် မိသားစု များနှင့် အဆက်သွယ် မရရှိသေးကြောင်းသိရသည်။
ယမန့်နေ့ (မေ ၁၀)ရက် ညနက် သန်းခေါင်ယံ လူခြေတိတ်ချိန်တွင် နောင်ချိုမြို့တွင် စစ်ကောင်စီ အုပ်စုက သေနတ်သံများအဆက်မပြတ် ဖောက်နေကြောင်းလည်းသိရသည်။
