သျှမ်းပြည် မြောက်ပိုင်း ကျောက်မဲမြို့တွင် အာဏာသိမ်း စစ်ကောင်စီ မှ လူငယ်(၂)ဦးကို ဖမ်းဆီးခေါ်ဆောင်သွားရာ ယနေ့ အချိန်ထိ သတင်း တစုံတရာမကြားသည့်အပြင် မိသားစုဝင်များနှင့် အဆက်အသွယ်မရသေးကြောင်း စုံစမ်းသိရသည်။
စစ်ကောင်စီ ဖမ်းဆီးသွားသည့် သူများမှာ အသက် (၁၇)နှစ်အရွယ် ရဲမင်းပိုင်း နှင့် အသက် (၂၇)နှစ်အရွယ် ကျော်ဇင်ဗိုလ် တို့ ဖြစ်ကြောင်း သိရသည်။
ထို လူငယ် (၂)ဦးကို (မေ ၅)ရက် ည ၁၁နာရီ ဝန်းကျင် တွင် စစ်ကောင်စီ အုပ်စု က နေအိမ်ထဲသို့ ဝင်ရောက်ဖမ်းဆီး ခေါ်ဆောင်သွားပြီး၊ ယနေ့အချိန်ထိ မည်သည့်နေရာခေါ်ဆောင်သွားသည်ကို မသိရှိသေးကာ မိသားစုဝင်များနှင့်လည်း တွေ့ခွင့်မရသေးသဖြင့် စိုးရိမ်နေကြကြောင်း ကျောက်မဲမြို့ ဒေသခံများ က ပြောသည်။
ကမ္ဘာ့လုံးဆိုင်ရာ နွေဦးတော်လှန်ရေး နေ့ မေ ၂ရက်တွင် စစ်ကောင်စီ အုပ်စုက ဆန္ဒပြ လူငယ်များကြား ဓာတ်ပုံလိုက်လံရိုက်ယူပြီး၊ ထိုဓာတ်ပုံထဲတွင် ပါဝင်သည့် လူငယ်များ၏ ပုံကို လိုက်လံဖမ်းဆီးနေခြင်းဖြစ်ကြောင်း သိရသည်။
“ စစ်ကောင်စီ အုပ်စုက ဆန္ဒပြ လူငယ်တွေရဲ့ပုံကို လိုက်ရိုက်တယ်။ အဲ့နေ့က လူငယ်တွေ ဓာတ်ပုံမရိုက်ဖို့ ပြောတယ် ထိုးကြိတ်မှုတောင်ဖြစ်ခဲ့တယ်။ ဒီ လူငယ် (၂)ဦးက ဓာတ်ပုံထဲပါတော့ လိုက်စုံစမ်းပြီးဖမ်းလိုက်တာပဲ ထင်တယ်” ဟု ကျောက်မဲ ဒေသခံ တဦးက သျှမ်းသံတော်ဆင့် ကို ပြောသည်။
ဖမ်းဆီးခံရသည့် လူငယ်(၂)ဦးသည် လက်ရှိ အချိန်ထိ မိသားစုဝင်များနှင့် အဆက်အသွယ်မရသေးသဖြင့် ကျောက်မဲဒေသခံများက စိုးရိမ်နေကြကြောင်း၊ လူငယ် (၂)ဦးဖမ်းခံပြီးနောက် စစ်အာဏာဆန့်ကျင်ရေး ဆက်လက် လုပ်ဆာင်နေသော်လည်း လုံခြုံရေးအရ ယခင်ကထက် ပိုပြီးစိုရိမ်နေကြသည် ဟု ဆန္ဒပြ လူငယ်များက ပြောသည်။
“ သူတို့ ခုလိုမျိုးဖမ်းဆီးသွားတာတော့ လုံးဝစိတ်မကောင်းပါဘူး။သူတို့(စစ်ကောင်စီ )နဲ့ ပြဿနာဖြစ် ထားတော့ ပိုပြီးစိတ်ပူရပါတယ်။ သူတို့ အကြောင်းကိုလည်းလိုက်စုံစမ်းနေတာ။ ဘာသတင်းမှ မရသေးဘူး။ သူတို့ဘယ်ကို ခေါ်သွား လဲမသိရဘူး” ဟု ၎င်းဒေသခံ က ထပ်လောင်း ပြောသည်။
ဖေဖော်ဝါရီ ၁ ရက်နေ့မှ စစ်အာဏာသိမ်းယူပြီးနောက် ကျောက်မဲမြို့တွင် ပြည်သူ ၆ ဦးဖမ်းဆီးခံရပြီး၊ ညအမိန့် မထွက်ရဖြင့် ညပိုင်းတွင်စစ်ကောင်စီ သေနတ်လက်ချက်ဖြင့် ၁ ဦးသေဆုံးသွားခဲ့ရသည်။
ထို့အပြင် ကျောက်မဲဒေသခံ(၄)ဦး မည်သည့် နေရာရောက်ရှိနေသည်ကို မသိရှိ ပျောက်ဆုံးနေကြောင်း သိရသည်။
Leave a Comments