ကချင်ပြည် မိုးမောက်မြို့နယ်အတွင်း ကချင်တပ်မတော်(KIA) နှင့် အကြမ်းဖက် စစ်ကောင်စီတို့ တိုက်ပွဲ နေ့ည ဆက်တိုက်ဖြစ်ပွားမှုကြောင့် စစ်ဘေးရှောင် ဦးရေတိုးလာကာ နေရာထိုင်ခင်း နှင့် စောင်များ လိုအပ်ကြောင်း စုံစမ်းသိရှိရသည်။
ပထမအကြိမ် ရယူထားသည့် စစ်ဘေးရှောင် စာရင်းများအရ (၃၁၂၈) ဦးရှိပြီး လက်ရှိတွင် စာရင်းအပြောင်းအလဲရှိကြောင်း ပရဟိတ သျှမ်းလူငယ် တစ်ဦးကပြောသည်။
“အခုထပ်ပြီးတော့ တိုးလာတယ် update လုပ်နေတယ်။ မပြီးသေးဘူး။ ကျမတို့ ရွာထဲ သွားတဲ့အချိန် ပစ်ခတ်နေတဲ့ အသံတွေ ကြားနေရသေးတယ်။ တိုက်ပွဲက မနက်ရော ညရောဖြစ်နေတယ်။နေ့တိုင်း အချိန်တိုင်း ပြောင်းရွှေ့လာတာတော့ တွေ့ရတယ်။ စောင်တွေ အခင်းတွေ မလုံလောက်တာ ပိုတွေ့ရတယ်”ဟု ပရဟိတ လူငယ်တစ်ဦးက သျှမ်းသံတော်ဆင့် ကိုပြောသည်။
မိုးမောက်မြို့နယ်သည် သျှမ်းတိုင်းရင်းသားလူမျိုးများ အများဆုံးနေထိုင်သည့် ဒေသဖြစ်ပြီး လက်ရှိ စစ်ရှောင်များသည် ဗန်းမော်ဘက်သို့ စစ်ဘေးရှောင်လာပြီး စာသင်ကျောင်းများ၊ ဘုန်းကြီးကျောင်းများ၊သီလရှင်ကျောင်းများ စသည့် (၂၉) နေရာခန့် လာရောက်ခိုလှုံနေထိုင်ကြသည်။
“ကျမတို့ သျှမ်းတွေရဲ့ အားနည်းချက်က တခြားသော စစ်ရှောင်တွေလို camp တွေမရှိထားဘူး။အဲ့ဒီတော့ ရပ်ကွက်မှာရှောင်နေတဲ့သူတွေ ၊ ကျေးရွာမှာ ရှောင်နေတဲ့သူတွေ ဘုန်းကြီးကျောင်းတွေ စတဲ့ နေရာ (၂၉) ခုလောလက် ရှိထားကြတယ်” ဟု စေတနာ့ ဝန်ထမ်း တစ်ဦးက သျှမ်းသံတော်ဆင့် ကိုပြောသည်။
စစ်ရှောင်များသည် နန်းအီကျေးရွာသို့ အိမ်ထောင်စုပေါင်း (၃၅) စုခန့် ကျေးရွာတွင်း သွားရောက်ခိုလှုံသည့် စစ်ဘေးရှောင်များအတွက် အထောက်အပံ့သွားရောက်ပေးရာ ရွာသူကြီးမှ လက်မခံကြောင်း သိရသည်။
“ကျမတို့ မနေ့ ကြားရတာကတော့ နန်းအီကျေးရွာမှာအိမ်ထောင်စု (၃၅) လောက်ရှိတယ်။ သူတို့ကို သွားကူညီပေးချင်တယ်။ ရွာလူကြီးက လက်မခံဘူး အုပ်စုမှူးက ခွင့်မပြုဘူး အလှူအတန်းတွေ သွားပေးလို့မရဘူး အခုထိလည်း ဆက်သွယ်လို့မရဘူး ရွာလူကြီးက ခွင့်မပြုရင် သွားကူလို့မရဘူး” ဟု ဒေသခံ တစ်ဦးကပြောသည်။
KIA နှင့် အကြမ်းဖက်စစ်ကောင်စီသို့ မိုးမောက်မြို့နယ်တွင် စစ်ရေး ပြင်းထန်လျက်ရှိကြောင်း၊ အကြမ်းဖက် စစ်ကောင်စီမှ ရဟတ်ယာဉ်သုံးကာ လေကြောင်းလိုင်းဖြင့် ပစ်ခတ်မှုကြောင့် မိုးမောက်မြို့နယ်အတွင်း အရပ်သားနေအိမ်များစွာ ပျက်စီးခဲ့ရသည်။
ဖေဖော်ဝါရီ (၁) ရက်မှ စတင်ပြီး စစ်ကောင်စီမှ အာဏာသိမ်းပြီးနောက် တိုင်းရင်းသား လက်နက်ကိုင်များ နှင့် တိုက်ပွဲပြင်းထန်လာလျက်ရှိကြောင်း သိရသည်။
Leave a Comments