သျှမ်းမြောက် နောင်ချိုမြို့နယ် မှ အာဏာဖီဆန်ရေး (CDM) လုပ်ဆောင်နေသည့် ပညာရေးဝန်ထမ်းများကို ပညာရေးမှူး မှ လာရောက်ခြိမ်းခြောက်ကာ Non-CDM ပြန်လုပ်ခိုင်းကြောင်း နောင်ချို ပညာရေးဝန်ထမ်းများထံ စုံစမ်းသိရသည်။
ယခုရက်ပိုင်း CDM ပြုလုပ်နေသည့် ပညာရေးဝန်ထမ်းများကို စာရင်းလိုက်ကောက်နေပြီး CDM ဆက်လုပ်ပါက လစာ ပေးတော့မည် မဟုတ်ကြောင်း၊ Non-CDM ပြန်လုပ်ရန် ခြိမ်းခြောက်နေကြောင်းလည်း နောင်ချို မှ ကျောင်းဆရာမ တဦး က သျှမ်းသံတော်ဆင့် ကို ပြောသည်။
“ အခု CDM လုပ်နေတဲ့ ဆရာမတွေရဲ့ အိမ်တွေကို တအိမ်တက် တအိမ်ဆင်းနဲ့ စာရင်းကောက် လက်မှတ်ထိုးခိုင်းတယ်။ CDM လုပ်ရင် ဧပြီလစာ ကစ မရတော့ဘူး။ Non-CDM ပြန်လုပ်ဖို့ ပြောလာတယ်” ဟု အထက်တန်းကျောင်း ဆရာမ တဦး ကသျှမ်သံတော်ဆင့် ကို ပြောသည်။
CDM ပြုလုပ်နေသည့် ဆရာမ လစာမရ တော့ပါက အခက်အခဲများရှိနိုင်ကြောင်း၊ လက်ရှိမှာ CDM စာရင်းကောက် သွားသဖြင့် ဖမ်းဆီးမှု ရှိလာနိုင်ကြောင်း လည်း နောင်ချိုပညာရေး ဝန်ထမ်းများက ပြောသည်။
“ လစာမရရင် ကျမတို့ က ဘာမှ မဖြစ်ဘူး။ ခက်ခဲပေမယ့် အဆုံးထိတိုက်ဖို့ လုပ်ထားပြီးသားပါ။ အလုပ်ဖြုတ်ရင်လည်း ဖြုတ်ခံမယ်။ ဒါပေမယ့် အဖမ်းအဆီးတွေရှိရင်တော့ အခက်အခဲရှိမယ်” ဟု ၎င်း ဆရာမ က ဆိုသည်။
CDM စတင်လုပ်ဆောင်ကတည်းက စစ်အာဏာရှင်ကို အဆုံးထိဖြုတ်ချဖို့ ဆုံးဖြတ်ပြီးကြောင်း၊ စစ်အာဏာရှင် လက်အောက်တွင် တာဝန်မထမ်းဆောင်ခြင်းသဖြင့် CDM ပြုလုပ်ရကြောင်း၊ ဖိအားခြိမ်းခြောက်မှုကြားက CDM ဆက်လက် လုပ်ဆောင်သွားမည် ဖြစ်ကြောင်းလည်း နောင်ချို ဆရာမများက ပြောဆိုလိုက်သည်။
မကြာမီ စစ်အာဏာရှင်များမှ ကျောင်းများပြန်ဖွင့်နိုင်ရန် စီစဉ်ဆောင်ရွက်နေကြသည့်အတွက် ပညာရေးဝန်ထမ်းများ ဖိအားပိုပြီး ပေးလာနိုင်ကြောင်း၊ ဖမ်းဆီးမှုရှိလာနိုင်ကြောင်းလည်း သျှမ်းပြည်လူထုများက ပြောဆိုသည်။
Leave a Comments