သျှမ်းပြည်မြောက်ပိုင်း နမ္မတူမြို့နယ်အတွင်း ယမန်နေ့ (ဧပြီ ၂၁)ရက် တွင် တိုင်းရင်းသား လက်နက်ကိုင်အချင်းချင်း တိုက်ပွဲဖြစ်ပွားမှုကြောင့် အရပ်သားနေအိမ်များ မီးထပ်မံလောင်မှုဖြစ်ပွားခဲ့ကြောင်းသိရသည်။
ဧပြီ (၂၁) ရက်တွင် နမ္မတူမြို့နယ်အတွင်းရှိ ပန်လုံကျေးရွာ၊ ရေအိုးကျေးရွာ နှင့် မန်ဆာ ကျေးရွာတို့မှာ တိုက်ပွဲဖြစ်ပွားမှု ကြောင့် ဒေသခံ နေအိမ် ခန့်မှန်းခြေ (၇)လုံးခန့် မီးလောင်ပျက်စီးခဲ့ကြောင်း နမ္မတူစစ်ရှောင် ကူညီနေသည့် သူများက ပြောသည်။
“မနေ့ က မနက်ကနေ နေ့လည်လောက် တိုက်ပွဲတွေဖြစ်ကြတယ်။ နေအိမ်တွေ မီးလောင်သွားပြီး ဘယ်သူ့အိမ် ဆိုတာတော့ တိတိကျကျ အတည်ပြုလို့တော့ မရသေးဘူး။ ခန့်မှန်းခြေက (၆)အိမ်၊ (၇)အိမ်ရှိတယ်။ ဒေသခံတွေကတော့ ထွက်ပြေးနေရတယ်” ဟု နမ္မတူစစ်ဘေးရှောင်ကော်မတီ အဖွဲ့ဝင် တစ်ဦးက သျှမ်းသံတော်ဆင့် ကိုပြောသည်။
ဧပြီ (၄) ရက်နေ့ နှင့် မတ်လ (၂၈) ရက်နေ့က ဖြစ်ပွားခဲ့သည့် တိုက်ပွဲကြောင့် ပန်လုံကျေးရွာတွင် နေအိမ် (၂၈) လုံး မီးလောင် ပျက်ဆီးခဲ့ရကြောင်း၊ ထိုမီးလောင်ပျက်စီးပျက်စီးသွားသည့် ကျေးရွာများတွင်နေထိုင်သည့် ဒေသခံများ ထွက်ပြေးနေရကြောင်း သိရသည်။
“ဒေသခံတွေ ထွက်ပြေးကြတာ ရွာတောင်ပျက်တယ်။ နမ့်ဆန်၊ သီပေါ၊ မန်စံ တွေ ဘက် ပြေးကုန်ကြပြီ။” ဟု ဒေသခံ တစ်ဦး ကပြောသည်။
ရှမ်းပြည်ပြန်လည်ထူထောင်ရေးကောင်စီ၊ရှမ်းပြည်တပ်မတော်(RCSS/SSA) နှင့် မြောက်ပိုင်းမဟာမိတ်အဖွဲ့ တို့ တိုက်ပွဲကြောင့် နမတူမြို့နယ်အတွင်းရှိ စစ်ရှောင်များ (၂၀၀၀) ခန့် ရှိနေပြီး ၎င်းတို့သည် စားနပ်ရိကာအတွက် အခက်ခဲဖြစ်နေကြောင်းလည်း သိရသည်။
Leave a Comments