ကချင်ပြည် မိုးမောက်မြို့နယ် သျှမ်းလူမျိုးများနေထိုင်သည့် စီဟက်ရွာ တွင် အကြမ်းဖက်စစ်ကောင်စီမှ တပ်ဆွဲထားပြီး ပြည်သူများကို ခြိမ်းခြောက်နေကြောင်း စုံစမ်းသိရသည်။
ဧပြီ ၁၉ ရက် ညနေပိုင်း မှစတင်ကာ အကြမ်းဖက် စစ်ကောင်စီ က စီဟက်ကျေးရွာ အတွင်း တပ်ဆွဲထားပြီး၊ ရွာသားများကို သေနတ်ဖောက်ကာ ခြိမ်းခြောက်မှု ပြုလုပ်ခဲ့ကြောင်း ကချင်ပြည်နယ် ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD)မှ စိုင်းကျော်သီဟ က သျှမ်းသံတော်ဆင့်ကိုပြောသည်။
စီဟက်ရွာတွင် သျှမ်းတိုင်းရင်းသားများနေထိုင်သည့် အိမ်ခြေ ၄၀၀ ကျော်ရှိကြောင်း၊ လက်ရှိရွာထဲတွင် စစ်ကောင်စီတပ် စွဲ ထားသဖြင့် ပြည်သူများ နေရပ်ကို စွန့်ခွာပြီး စစ်ဘေးရှောင်နေကြကာ တချို့သည် အိမ်စောင့်အဖြစ်ကျန်ခဲ့ကြောင်း စိုင်းကျော်သီဟ က ပြောပြသည်။
“ ကျနော်တို့ စစ်ဘေးရှောင် စာရင်းတိကျတော့မရထားဘူး။ ခန့်မှန်ခြေအရတော့ ၅၀၀၀ လောက်ရှိမယ်။ တစ်ချို့ကတော့ ဗန်းမော်ထဲသွားနေတယ်။ မြို့ထဲမှာ ဆွေမျိုးရှိတဲ့သူက မြို့ထဲသွားနေတယ်။ တချို့ ကအိမ်စောင့်ကျန်တဲ့သူရှိတယ် စစ်တပ်တွေကရွာထဲမှာရှိနေသေးတယ်။” ဟု စိုင်းကျော်သီဟ ကပြောသည်။
အိမ်စောင့်အနေဖြင့် ကျေးရွာထဲတွင် ကျန်ရှိခဲ့သူများကို စစ်ကောင်စီ တပ်က သေနတ်ပစ်ဖောက် ခြိမ်းခြောက်မှုပြုလုပ်နေကြောင်း သိရသည်။
“ သူတို့ (စစ်ကောင်စီတပ်) က မင်းတို့မပုန်းနဲ့ထွက်ခဲ့ မထွက်ရင်အကုန်ပစ်မယ် ဆိုပြီးတော့ ရွာသားတွေကို ခြိမ်းခြောက်တယ်။ ပြီးရင်အိမ်အောက်မှာရှိတဲ့ ကျွဲ၊ နွားတွေကိုလည်း သေနတ်နဲ့ပစ်သတ်လိုက်တယ်။ နေအိမ်တွေကိုလည်း ပစ်တယ်။” ဟု စိုင်းကျော်သီဟ က ပြန်လည် ပြောပြသည်။
ထိုကျေးရွာအတွင်း ကချင်လွတ်မြောက်ရေးတပ်မတော် ( KIA) တပ်သားမျာ သွားလာခြင်းမရှိကြောင်းလည်း ဒေသခံများပြောပြချက်အရသိရသည်။
ဧပြီလ (၁၀)ရက်တွင် မိုးမောက်မြို့နယ်အတွင်း KIA နှင့် အကြမ်းဖက်စစ်ကောင်စီ ပစ်ခတ်မှုကြောင့် အရပ်သား (၄)ဦး သေဆုံးခဲ့ပြီး၊ တိုက်လေယာဉ်ဖြင့် ပစ်ခတ်မှုကြောင့် ဘုန်းကြီးကျောင်းနှင့် လူနေအိမ်အများအပြား ပျက်စီး ဆုံးရှုံးပြီး၊ နေအိမ်တလုံး ပျောက်ဆုံးသွားသည့် အထိ ထိခိုက်ပျက်စီးမှု ကြီးမားကြောင်း ကချင်ပြည် SNLD အလုပ်အမှုဆောင်ကော်မတီ က ထုတ်ပြန်ကြေညာခဲ့သည်။
Leave a Comments