သျှမ်းပြည်တောင်ပိုင်း တောင်ကြီးမြို့တွင် စစ်အာဏာရှင် အလိုမရှိ စစ်ကြောင်းချီတက်ဆန္ဒပြခွင့်မရအောင် အကြမ်းဖက် စစ်ကောင်စီ အုပ်စုမှ နည်းမျိုးစုံ ဟန့်တားပြီး၊ ဆန္ဒပြ လူငယ်များကို ရှာဖွေ ဖမ်းဆီးမှုပြုလုပ်နေကြောင်း စုံစမ်းသိရသည်။
တောင်ကြီးလူထု သပိတ်စစ်ကြောင်းသည် လမ်းပေါ်ထွက် ချီတက်ခွင့်မရကြသော်လည်း လူငယ်များ နည်းမျိုးစုံ၊ ပုံစံစုံဖြင့် ဆက်လက်ပြီး စစ်အာဏာရှင်ကို ဆန့်ကျင် ဆန္ဒထုတ်ဖော်နေကြသေးကြောင်း လူငယ်များက ပြောဆိုလိုက်သည်။
ဖေဖော်ဝါရီ (၁) ရက်နေ့က စတင်ပြီး စစ်တပ်မှ နိုင်ငံတော် အာဏာကို လုယူပြီးနောက် တောင်ကြီးမြို့ရှိ ကျောင်းသားလူငယ်များ၊ ဌာနဆိုင်ရာ ဝန်ထမ်းများ အသီးသီးမှ ဖေဖောဝါရီ (၆) ရက်မှ စတင်ပြီး အာဏာရှင် အလိုမရှိကြောင်း ဆန္ဒဖော်ထုတ်ခဲ့ကြသည်။
“လမ်းပေါ်က တွေ့တဲ့ လူငယ်တွေကို လိုက်ဖမ်းတယ်။ ဆန္ဒပြတဲ့လူတွေလို့ သူတို့ထင်ကြတာ။ အိမ်တွေကို လိုက်စစ်တယ်။ လူငယ်တွေ ထွက်ပြေးတာတွေရှိတယ်။ သပိတ်စစ်ကြောင်းလည်း မရှိတော့ဘူး။ လူမဲ့သပိတ်တွေပဲ ဆက်လုပ် နေရတယ်” ဟု တောင်ကြီးဒေသခံ တစ်ဦး က သျှမ်းသံတော်ဆင့် ကိုပြောသည်။
အကြမ်းဖက် စစ်ကောင်စီသည် ပြည်သူများကို ဖုန်းစစ်ဆေးခြင်း၊ ကားစစ်ဆေးခြင်း၊ ဖုန်းမပါရှိပါက ငွေတောင်းခြင်းများ ပြုလုပ်ကြောင်း တောင်ကြီး ဒေသခံ အမျိုးသမီး တဦးက ပြောပြသည်။
“CDM မှာ ပါထားတဲ့ ဝန်ထမ်းတွေကို သူတို့ ည (၂) နာရီလောက် လိုက်ဖမ်းနေတာရှိတယ်။ လူငယ်တွေ ညပိုင်း ဝင်ဖမ်းနေတာရှိတယ်”ဟု တောင်ကြီးဒေသခံ တစ်ဦးက ပြောသည်။
လက်ရှိမှာ ဆန္ဒပြ ပါဝင်သည့် လူငယ်များ၊ CDM သမားများ သည် ထွက်ပြေးတိမ်းရှောင်နေရပြီး၊ တောင်ကြီးမြို့ပေါ်တွင် ဖမ်းဆီးခံရသည့် လူဦးရေ မည်မျှရှိနေသည်ကို အတိအကျ မသိရသေးပေ။
ဆန္ဒဖော်ထုတ်သည့် လူငယ်များ ကျောင်းသားများ CDM လှုပ်ရှားမှုမှာ ပါဝင်သည့် ဝန်ထမ်းများကို မတ်လဆန်းပိုင်းတွင် စစ်တပ်မှ အကြမ်းဖက် ဖြိုခွင်းခြင်းများ ပြုလုပ်သဖြင့် သပိတ်စစ်ကြောင်းများ ပျောက်ကြားစနစ်ဖြင့် ဆန္ဒဖော်ထုတ်ရကြောင်း တောင်ကြီးဒေသခံများက ပြောဆိုကြသည်။
မတ်လ (၂၅) ရက်နေ့တွင် အကြမ်းဖက် စစ်ကောင်စီသည် တောင်ကြီးတစ်မြို့လုံးနီးပါးရှိ ဆန္ဒပြသပိတ်များကို ကျည်အစစ်သုံးကာ ဖြိုခွင်းမှုပြုလုပ်သဖြင့် လူငယ် ၄ ဦး ကျဆုံးကာ၊ ထိုထဲတွင် အမျိုးသမီး လူငယ်တစ်ဦးလည်း ပါရှိကြောင်း သိရသည်။
လက်ရှိတွင် စစ်ကောင်စီမှ ပိုင်သော မြဝတီရုပ်သံလိုင်းမှ CDM လုပ်ထားသည့် ဆရာဝန်များ၊ ပြည်သူများ ပုဒ်မ (၅၀၅)(က) ဖြင့် ဖမ်းဝရမ်း ထုတ်ထားသည်ကိုနေ့စဉ်နှင့် အမျှ ထုတ်ပြန်ခဲ့သည်။
