ကချင်ပြည် မိုးမောက်မြို့နယ်တွင် KIA တပ်ဖွဲ့နှင့် အကြမ်းဖက်စစ်ကောင်စီတို့ စစ်ရေး ပြင်ထန်းလာမှုကြောင့် သျှမ်းလူထုနေထိုင်သည့် ကျေးရွာ (၅၀)နီးပါး ရွာလုံးကျွတ် ထွက်ပြေးနေရကြောင်း စုံစမ်းသိရသည်။

မိုးမောက်မြို့နယ်အတွင်း ကချင်လွတ်လပ်ရေး တပ်မတော်(KIA)နှင့် အကြမ်းဖက်စစ်ကောင်စီတို့ ယခုလ (ဧပြီ ၁၀)ရက် မှစတင်ကာ တိုက်ပွဲပိုမိုပြင်းထန်လာကာ ထိုအနီးတွင်နေထိုင်သည့် ဒေသခံ ပြည်သူများ ရွာလုံးကျွတ် ထွက်ပြေးတိမ်းရှောင်နေရကြောင်း သိရသည်။

“ တိုက်ပွဲဖြစ်နေတဲ့ အနီးမှာ သျှမ်းတွေ နေတဲ့ ရွာတွေ (၅၀)လောက်ရှိတယ်။ရွာတွေ အားလုံး ထွက်ပြေးနေရတယ်။ လက်ရှိတော့ စစ်ဘေးရှောင်တွေက ဗန်းမော်ခရိုင် မိုးပေါက်မြို့မှာသွားခိုးလှုံတာရှိတယ်။ တစ်ချိုက ဘုန်းကြီးကျောင်းမှာ သွားခိုးလှုံတာရှိတယ်” ဟု သျှမ်းတိုင်းရင်းသားများ ဒီမိုကရေစီ အဖွဲ့ချုပ် SNLD မှ စိုးမိုးအောင်က ပြောသည်။

ကချင်ပြည်နယ် မိုးမောက်မြို့နယ် အကြမ်းဖက်စစ်ကောင်စီ တပ်စွဲထားသည့် တောင်ကုန်းကို KIA တပ်ဖွဲ့မှ ဝင်ရောက်သိမ်းပိုက်နိုင်ခဲ့သည်။

ထိုတောင်ကုန်းကို အကြမ်းဖက် စစ်ကောင်စီ ပြန်လည်ရရှိရန် အတွက် ကြိုးစားနေပြီး၊ စစ်ရေးမှာ ပိုပြင်းထန်လာနိုင်ကြောင်း လည်း သိရသည်။

“ ကျနော်တို့ ကချင်ပြည်နယ်မှာ စစ်ရေးက ပိုဖြစ်လာမယ်ထင်တယ်။ မနေ့က စစ်တပ်ကနေပြီးတော့ စစ်အင်အားဖြည့်လာတယ်။ KIA က သူတို့နေရာကိုဝင်သိမ်းထားတော့ သူ(စစ်ကောင်စီ)က ပြန်ရဖို့ တိုက်နေတယ်။ ပထမက တိုက်တာသူတို့ မရတော့ လေယာဉ်ပျံတွေနဲ ဗုံးလိုက်ကြဲနေတာပေါ့။” ဟု မိုးမောက်မြို့နယ် ဒေသခံတစ်ဦးကပြောသည်။
ပြည်ထောင်စုလွှတ်တော်ကိုယ်စားပြုကော်မတီ CRPH မှ ဖွဲ့စည်းလိုက်သော အစိုးရအသစ် ဒုသမ္မတမှာ ကချင်ပြည်နယ်က ဒူဝါလရှီးလ ပါဝင်နေသဖြင့် ကချင်ပြည်နယ်တွင် စစ်ရေးပိုမို ပြင်ထန်းလာနိုင်ကြောင်း ဒေသခံများက ပြောသည်။

“ NUG က အစိုးရအသစ်မှာ ကချင်ပြည်နယ်က ဒုသမ္မတ ဖြစ်တယ်ဆိုတော့ သူတို့ပိုတိုက်ခိုက်လာမယ်လို့ထင်တယ်။ စစ်အင်အားတွေလဲထက်ဖြည့်ထားတယ်။ လေကြောင်းလိုင်းနဲ့ ဗုံးတွေကြဲတယ် ” ဟု မိုးမောက်မြို့ ဒေသခံတစ်ဦးကပြောသည်။

ထိုသို့ စစ်ကောင်စီမှ လေယာဉ်ပျံဖြင့် လိုက်လဲဗုံးပစ်ခတ်မှုကြောင့် ပြည်သူ အများအပြား နီးစပ်ရာမြို့နယ်သို့ ထွက်ပြေးတိမ်းရှောင်နေရကြောင်းသိရသည်။

ဧပြီလ (၁၀)ရက်တွင် မိုးမောက်မြို့နယ်အတွင်း KIA နှင့် အကြမ်းဖက်စစ်ကောင်စီ ပစ်ခတ်မှုကြောင့် အရပ်သား (၄)ဦး သေဆုံးခဲ့ပြီး၊ တိုက်လေယာဉ်ဖြင့် ပစ်ခတ်မှုကြောင့် ဘုန်းကြီးကျောင်းနှင့် လူနေအိမ်အများအပြား ပျက်စီး ဆုံးရှုံးပြီး၊ နေအိမ်တလုံး ပျောက်ဆုံးသွားသည့် အထိ ထိခိုက်ပျက်စီးမှု ကြီးမားကြောင်း ကချင်ပြည် SNLD အလုပ်အမှုဆောင်ကော်မတီ က ယမန်နေ့တွင် ထုတ်ပြန်ကြေညာခဲ့သည်။

လက်နက်ကြီး၊ လက်နက်ငယ်များနှင့် တိုက်လေယာဉ်များဖြင့် နေ့ညမပျက် ပစ်ခတ်မှုကြောင့် အရပ်သား (၂)သောင်းကျော်နေထိုင်သည့် တာပိန်မြစ်ကြော တလျော ရှိကျေးရွာများ ထွက်ပြေးတိမ်းရှောင်နေရသည်။