မြန်မာ-ထိုင်းနယ်စပ် RCSS/SSA လွိုင်ကော်ဝမ်း တပ်စခန်းကိုအကြမ်းဖက်စစ်ကောင်စီမှ ရက်ဆက် လက်နက်ကြီး ပစ်ခတ်မှုကြောင့် စစ်ရှောင်များ ထိုင်းနိုင်ငံဘက် ပြောင်းရွှေ့နိုင်ရန် အတွက် ဆောင်ရွက်နေကြောင်း စုံစမ်းသိရသည်။

ဧပြီ ၁၈ရက် ညနေ ၆နာရီဝန်းကျင် နှင့် ယနေ့ (ဧပြီ ၁၉ )ရက် မွန်းလွဲ ၃နာရီကျော်တွင် အကြမ်းဖက်စစ်ကောင်စီမှ မြန်မာ-ထိုင်းနယ်စပ်မျဉ်းပေါ် ရှိသည့် RCSS/SSA လွိုင်ကော်ဝမ်း တပ်စခန်းကို ၂ရက် ဆက်တိုက် လက်နက်ကြီး ပစ်ခတ်မှု ပြုလုပ်နေသဖြင့် ထိုအနီးတွင် နေထိုင်သည့် စစ်ရှောင်များစိုးရိမ်မှုရှိနေကြာင်း သျှမ်းစစ်ဘေးရှောင် ကူညီရေး ကော်မတီ မှ တာဝန်ရှိသူ တဦး က ပြောသည်။

“ ဒီရက်ပိုင်း လက်နက်ကြီးသံတွေ စကြားနေရပြီ။ လေကြောင်းတိုက်ခိုက်မှုတွေ လက်နက်ကြီး ပစ်ခတ်မှုတွေကာကွယ်ဖို့ အတွက် လောဆယ်တော့ ဗုံးခိုကျင်းတွေ တူးထားတယ်။ အခြေအနေဆိုးလာရင်တော့ ထိုင်းဘက်ခြမ်း ရွှေ့ပြောင်းနိုင်ဖို့ အတွက် တာဝန်ရှိသူတွေနဲ့ ဆွေးနွေးထားပါတယ်” ဟု သျှမ်းစစ်ဘေးရှောင် ကူညီပေးနေသူ တဦးက ဆိုသည်။

ယခုရက်ပိုင်း ပစ်ခတ်သည့် လက်နက်ကြီးသည် RCSS/SSA လွိုင်ကော်ဝမ်း တပ်စခန်း အနီးကို ပစ်ခတ်သဖြင့် ဟွေ့ပန်ကွိုင်း ဒုက္ခသည်များ နေထိုင်သည့် ကျေးရွာခြံမြေထဲကျခဲ့ကာ စစ်ရှောင်များ နေရာထပ်မံပြောင်းရွှေ့နေရကြောင်း သိရသည်။

“ မနေ့ညနေက (၃)လုံးပစ်တယ်။ (၂)လုံးတော့တွေ့တယ်။ ဒီနေ့ ထပ်ပြီး ၂လုံးပစ်တယ်။ စစ်ရှောင်တွေနေတဲ့ နေရာ အနီးကျတော့ စိုးရိမ်ရတာပေါ့” ဟု စစ်ဘေးရှောင် ကော်မတီဝင် က ဆိုသည်။
လက်ရှိမှာ လွိုင်ကော်ဝမ်းတွင်ရှိသည့် စစ်ရှောင်များစခန်းများ၊ စာသင်ကျောင်း၊ ဆေးပေးခန်း၊ ဘုန်းကြီးကျောင်း စသည့် နေရာများတွင် ဗုံးခိုကျင်းများ တူးထားကြောင်း သိရသည်။

“လက်ရှိ အခြေနေ ကျနော်တို့တွေ ရင်ဆိုင်ရာတာက ကိုဗစ်-၁၉ လည်း ကြောက်ရတယ်။ စစ်ပွဲဖြစ်မှာလည်း ကြောက်ရတယ်” ဟု ၎င်း ကပြောသည်။

အကြမ်းဖက်စစ်ကောင်စီ မှ RCSS/SSA တပ်စခန်းကို ရက်ဆက် လက်နက်ကြီးပစ်ခတ်နေခြင်းသည် RCSS/SSA ကို စိန်ခေါ်နေသည့် သဘောရှိကြောင်းလည်း သျှမ်းပြည်သူများက ပြောဆိုလိုက်သည်။

မြန်မာ-ထိုင်းနယ်စပ် RCSS/SSA လွိုင်ကော်ဝမ်း တပ်စခန်းကို အကြမ်းဖက်စစ်ကောင်စီမှ လက်နက်ကြီးပစ်ခတ်မှုကြောင့် ထိုနယ်စပ်မျဉ်းတလျောက်တွင် ထိုင်းနယ်နမိတ်အတွင်း လုံခြုံရေးအသင့်ယူထားပြီး၊ မြန်မာဘက်မှ ထွက်ပြေးလာသူများကို လက်ခံနိုင်ရေး အတွက် လည်း ပြင်ဆင်ထားရန် ထိုင်းနယ်မြေခံတပ်က ညွှန်ကြားထားပြီးဖြစ်ကြောင်း ထိုင်းနိုင်ငံသတင်းဌာနများရေးသားချက်အရသိရသည်။

RCSS/SSA တပ်စခန်းဖြစ်သည့် လွိုင်ကော်ဝမ်း အနှီးတဝှိက်တွင် စစ်ဘေးရှောင် (၆၀၀၀) ကျော် ရှိပြီး ၎င်းတို့သည် ၁၉၉၆-၉၇ ခုနှစ် သျှမ်းပြည်တွင်း ဖြတ်လေးဖြတ် ဖြစ်ပွားသည့် ကာလက ရောက်ရှိလာကြသည့် သူများ ဖြစ်ကြသည်။

အကြမ်းဖက် စစ်ကောင်စီ အနေဖြင့် မြန်မာ-ထိုင်းနယ်စပ် တလျောက်ကို တိုက်ခိုက်လာမည်ဆိုပါက ထိုနယ်စပ်တလျောက်တွင် နေထိုင်သည့် စစ်ရှောင်များ ဘေးကင်းရန် ပြည်သူများအတွက် နယ်စပ်ဖြတ်ကျော်ပြီး ထိုင်းနိုင်ငံအတွင်း ဝင်ရောက် ရှောင်တိမ်းနိုင်ရန် လုံခြုံရေး နှင့်လူသားချင်းစာနာထောက်ထားမှုပေးရေးအတွက် ခွင့်ပြုပေးရန်လည်း ထိုင်းအစိုးရကို တောင်းဆိုထားသည်။