မြန်မာ-ထိုင်းနယ်စပ် လွိုင်ကော်ဝမ်း RCSS/SSAတပ်စခန်းကို အာဏာသိမ်း အကြမ်းဖက် စစ်ကောင်စီမှ ယနေ့ (ဧပြီ ၁၈) ညနေ ၆နာရီဝန်းကျင် တွင် လက်နက်ကြီး ဖြင့် ပစ်ခတ်မှုကြောင့် စစ်ရှောင်များနေထိုင်သည့် ခြံမြေပေါ် လက်နက်ကြီးကျခဲ့ကြောင်း သတင်းရရှိသည်။
အာဏာသိမ်း အကြမ်းဖက် စစ်ကောင်စီ ဟွေ့ခိုက်တပ်စခန်း မှ (၁၂၀ )မမ လက်နက်ကြီးဖြင့် RCSS/SSA လွိုင်ကော်ဝမ်း တပ်စခန်း အနီးကို ပစ်ခတ်သဖြင့် ဟွေ့ပန်ကွိုင်း ဒုက္ခသည် များနေထိုင်သည့် ကျေးရွာခြံမြေထဲကျခဲ့ကာ စစ်ရှောင်များ နေရာထပ်မံပြောင်းရွှေ့နေရကြောင်း သိရသည်။
“ တပ် က ညနေ ၅နာရီ ၄၀မိနစ် မှာ လက်နက်ကြီး (၁၂၀) မမ နဲ့ ၂လုံး ပစ်လာတယ်။ လွိုင်ကော်ဝမ်း နားမှာ ရှိတဲ့ ဟွေ့ပန်ကွိုင်ဒုက္ခသည် ရဲ့ ခြံမြေထဲကျတယ်။လူထိခိုက်မှုတော့မရှိဘူး။ အိမ်ခြေ (၁၀)အိမ်ကတော့ ထိုင်း-မြန်မာ နယ်စပ် အနီးက လွိုင်ကော်ဝမ်း ကို ပြောင်းနေလိုက်တယ်” ဟု RCSS/SSA လွိုင်ကော်ဝမ်း မှ အရာရှိသူ တဦးက သျှမ်းသံတော်ဆင့် ကို ပြောသည်။
အဆိုပါ လက်နက်ကြီး ကြောင့် လူထိခိုက်မှုမရှိကြောင်း၊ RCSS/SSA ဘက်မှလည်း ပြန်လည် တုန့်ပြန်ခြင်းမရှိသေးကြောင်း အထက်ပါ အရာရှိက ပြောသည်။
RCSS/SSAတပ်စခန်းဖြစ်သည့် လွိုင်ကော်ဝမ်း အနီးတဝှိက်တွင် စစ်ဘေးရှောင် (၆၀၀၀) ကျော်ရှိကြောင်း သိရသည်။
မတ် ၃၀ ရက်တွင် အကြမ်းဖက် စစ်ကောင်စီမှ မြန်မာ-ထိုင်းနယ်စပ်တလျောက်ရှိ သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) တပ်စခန်း အားလုံးကို တိုက်ခိုက်မည်ဟု ချင်းရိုင်းခရိုင် မယ်ဆိုင်မြို့နယ်ခြားကောက်မတီ ထံ အသိပေးထားကြောင်း သိရသည်။
အကြမ်းဖက်စစ်ကောင်စီ အနေဖြင့် မြန်မာ-ထိုင်းနယ်စပ်တလျောက်ကို တိုက်ခိုက်လာမည်ဆိုပါက ထိုနယ်စပ်တလျောက်တွင်နေထိုင်သည့် စစ်ရှောင်များ ဘေးကင်းရန် ပြည်သူများအတွက် နယ်စပ်ဖြတ်ကျော်ပြီး ထိုင်းနိုင်ငံအတွင်း ဝင်ရောက် ရှောင်တိမ်းနိုင်ရန် လုံခြုံရေး နှင့် လူသားချင်းစာနာထောက်ထားမှုပေးရေး အတွက် ခွင့်ပြုပေးရန် လည်း ထိုင်း အစိုးရကို တောင်းဆိုထားသည်။
