အာဏာသိမ်းစစ်ကောင်စီ၏ ရဟတ်ယာဉ်ကို SSPP/SSA တပ်သားမှ မှားယွင်းပစ်ခတ်သည့်အတွက် အဆင့်မြင့်အရာရှိ တဦး ကျည်ထိမှန်သွားသဖြင့် ပစ်ခတ်ခဲ့သူကို တည်ဆဲဥပဒေအရ အရေးယူသွားမည်ဟု စုံစမ်းသိရသည်။
ဧပြီလ (၈)ရက်တွင် အာဏာသိမ်းစစ်ကောင်စီ၏ ရဟတ်ယာဉ်သည် SSPP/SSAဌာနချုပ်တည်ရှိရာ ဝမ်းဟိုင်းကို အကြိမ်ကြိမ်ပျံသန်းခဲ့သဖြင့် SSPP/SSA မှ ပစ်ခတ်ခဲ့ကြောင်း၊ ထိုပစ်ခတ်မှုကြောင့် အာဏာသိမ်း စစ်ကောင်စီ၏ အဆင့်မြင့် အရာရှိတဦး ကျည်ထိမှန်သွားကြောင်း သိရသည်။
အာဏာသိမ်း စစ်ကောင်စီသည် SSPP/SSA နှင့် တွေ့ဆုံဆွေးနွေးရန် လာသည့်အချိန် သတင်းပေးပို့ချက် အတိုင်း မလာသည့် အတွက် SSPP/SSA မှ ပစ်ခတ်ခဲ့ရကြောင်း သိရသည်။
ထိုပစ်ခတ်မှုသည် SSPP/SSA မှ မှားယွင်းပစ်ခတ်ကြောင်း၊ မှားယွင်းပစ်ခတ်မှုကြောင့်လည်း အဆိုပါ တပ်ဖွဲ့ဝင်အား တည်ဆဲဥပဒေများနှင့် အညီ ဆက်လက်အရေးယူသွားမည် ဖြစ်ကြောင်း SSPP/SSA မှ ဧပြီ ၉ ရက်တွင် ထုတ်ပြန်ကြေညာခဲ့သည်။
ထို့နောက် အကြမ်းဖက် စစ်ကောင်စီသည် လားရှိုးမြို့ဘက်သို့ လှည့်ပြန်သွားပြီး SSPP/SSA အဖွဲ့ မှ ဧပြီ (၈)ရက်တွင် လားရှိုးသို့သွားရောက်ကာ မှားယွင်းပစ်ခတ်သဖြင့် သွားရောက်တောင်ပန်းခဲ့ပြီး အမျိုးသား စည်းလုံးညီညွတ်ရေး နှင့် ငြိမ်းချမ်းရေး ဖော်ဆောင်မှုအဖွဲ့ နှင့် တွေ့ဆုံဆွေးနွေးပွဲအား ဆက်လက်ကျင်းပခဲ့ကြောင်းသိရသည်။
SSPP/SSA တပ်ဖွဲ့ နှင့် အာဏာသိမ်း စစ်ကောင်စီဘက် မှ ဒုတိယ ဗိုလ်ချုပ်ကြီး ရာပြည့် ဦးဆောင်ပြီး၊ ဒုတိယ ဗိုလ်ချုပ်ကြီး ခင်ဇော်ဦး ( အငြိမ်းစား) ၊ ဒုတိယ ဗိုလ်ချုပ်မင်းနောင်၊ တြိဂံတိုင်း စစ်ဌာနချုပ် ကျိုင်းတုံ တိုင်းမှူး နှင့် အရှေ့မြောက်ပိုင်းတိုင်း စစ်ဌာနချုပ် လားရှိုးတိုင်းမှူး တို့ ပါဝင်ကြောင်း သိရသည်။
အာဏာသိမ်း စစ်ကောင်စီ သည် ဧပြီ (၇ )ရက် တွင်လည်း UWSA တပ်ဖွဲ့မှ စစ်ဦးစီးဌာနကြီးမှူး ကျောက်ကော်အန်း ဦးဆောင်သည့် အဖွဲ့နှင့် တွေ့ခဲ့ကြောင်းသိရသည်။
