သျှမ်းပြည် တောင်ပိုင်း တောင်ကြီးမြို့တွင် PSI Satellite Myanmar စလောင်းတပ်ဆင်ထားသည့် နေအိမ်များကို အာဏာသိမ်း အကြမ်းဖက်စစ်ကောင်စီ အုပ်စုက လိုက်လံစစ်ဆေးနေကြောင်း စုံစမ်းသိရှိရသည်။

PSI စလောင်းတပ်ဆင်းထားသည့် အိမ်များကို ယနေ့ (ဧပြီ ၉ )ရက် တွင် လိုက်လံစစ်ဆေးနေသဖြင့် PSI တပ်ဆင်ထားသည့်နေအိမ်များ ဖြုတ်နေရကြောင်း တောင်ကြီးဒေသခံများက ပြောသည်။

“ အိမ်တွေ PSI တပ်၊ထားလို့ဆိုပြီး စစ်သားတွေ လိုက်စစ်နေတယ်။ အခု တပ်ထားအိမ်တွေ ကတော့ ဖြုတ်နေတယ်။ ဖြုတ်ပြီးတော့ စလောင်းတောင်းယူသွားတယ်။ ကျနော်တို့ အိမ်မှာတပ်ထားရင် ဖြုတ်ပြီးတော့ ဖွက်ထားရပါတယ်” ဟု တောင်ကြီးမြို့ဒေသခံတစ်ဦးကပြောသည်။

PSI စလောင်း တပ်ထားသည့် နေအိမ်များတွေ့ရှိပါက ဖမ်းဆီးမှုပြုလုပ်မည်ဟုလည်း စစ်တပ်က ခြိမ်းခြောက်မှု ပြုလုပ်နေကြောင်း၊ ထို့ကြောင့် PSI တပ်ဆင်ထားသည့် တောင်ကြီးနေအိမ်များမှ ဖြုတ်နေရကြောင်း သိရသည်။

“ PSIက ကြည့်လို့လည်းမရတော့ဘူး။ ဒါပေမယ့် တပ်ထားရင် ဖမ်းမယ်ပြောလို့ ကျနော်တို့ ဖြုတ်လိုက်ရတယ်” ဟု တောင်ကြီး ဘုရားဖြူ ရပ်ကွက် ဒေသခံတဦး ကပြောသည်။

အာဏာသိမ်း အကြမ်းဖက် စစ်ကောင်စီ မှ ပြည်သူများ သတင်းမှန်ကန်မှု မရရှိရန် အတွက် PSI Satellite Myanmar မှ ထုတ်လွှင့်သည့် Mizzima နှင့် DVB channel များကို ပိတ်ထားပြီဖြစ်ကြောင်း သိရသည်။

လက်ရှိတွင်အာဏာသိမ်းစစ်ကောင်စီမှ အင်တာနက်ပိတ်ခြင်း၊ ဖုန်းများစစ်ဆေးခြင်း၊ စလောင်းများကို ဖြုတ်ပစ်ချင်ဖြင့် သတင်းမှန်များကို အမှောင်ချရန်အတွက် ကြိုးပမ်းလျက်ရှိနေသည်။

အလားတူ လုပ်ငန်းသုံး FITT Wifi ကိုလည်း မနက်ဖြန် ဧပြီလ ၁၀ ရက်နေ့တွင် ပိတ်သွားမည်ဖြစ်ကြောင်း လူမူကွန်ယက်ပေါ်တွင် ထွက်ပေါ်လျက်ရှိနေသည်။

မြန်မာနိုင်ငံတွင်းရှိ လွတ်လပ်သည့် သတင်းဌာနကြီး (၅) ခုဖြစ်သည့် DVB သတင်းဌာန၊ Myanmar Now သတင်းဌာန၊မဇ္ဈိမသတင်းဌာန၊ 7 Days သတင်းဌာန နှင့် ခေတ်သစ်မီဒီယာ သတင်းဌာန တို့သည် အာဏာသိမ်း အကြမ်းဖက် စစ်ကောင်စီမှ သတင်းပိတ်ပင်တားဆီးခဲ့ကြောင်း ထုတ်ပြန်ကြောင်းသိရသည်။