မကြာမီ ရောက်ရှိလာမည့် သင်္ကြန်ပွဲတော်ကို အာဏာသိမ်း အကြမ်းဖက်စစ်ကောင်စီ က ကျင်းပရန် စီစဉ်နေကြပြီး သင်္ကြန်ပွဲတော်ကို ပြည်သူများအနေဖြင့် ပါဝင်ဆင်နွှဲခြင်း မပြုကြရန် သျှမ်းပြည်လူငယ်များက တောင်းဆိုကြသည်။
ဖေဖော်ဝါရီ ၁ရက်မှစတင်ကာ ပြည်သူ့ အာဏာကို စစ်တပ်က သိမ်းပိုက်ပြီးနောက် “ စစ်အာဏာ အလိုမရှိကြောင်း” မြန်မာတဝှမ်း တွင် ဆန္ဒထုတ်ဖော်ခဲ့ရာ အကြမ်းဖက် စစ်ကောင်စီမှ ပြည်သူ (၆၀၀)နီးပါး ကို သတ်ဖြတ်ခဲ့ပြီး၊ ထောင်ချီ ဖမ်းဆီး ချုပ်နှောင်ခဲ့သည်။
နိုင်ငံရေး အခြေအနေ မတည်ငြိမ်သည့် ကြား အာဏာသိမ်းအကြမ်းဖက် စစ်ကောင်စီသည် မြန်မာနှစ်သစ်ကူး သင်္ကြန်ကို စည်ကားသိုက်မြိုက်စွာ ကျင်းပရန်ကြိုးစားနေခြင်းသည် မရိုးသားကြောင်း၊ တစုံတရာ ဖြစ်ပွားလာနိုင်ကြောင်း သျှမ်းမြောက် လူငယ်များက ပြောသည်။
အာဏာသိမ်း အကြမ်းဖက် စစ်ကောင်စီ မှ ကျင်းပမည့် သင်္ကြန် ကို သွားရောက်ပါဝင်ပါက စစ်အာဏာရှင်တော်လှန်ရေး တွင် ကျဆုံးသွားသည့် သူရဲကောင်းများကို မလေးစားရာ ရောက်မည် ဟု လည်း လားရှိုး လူငယ်တဦး ကပြောသည်။
“ကျနော်တို့ ဒီနှစ် သင်္ကြန်ကို တော့ ဆော့မှာ မဟုတ်ဘူး။ အခု စစ်တပ် က သင်္ကြန်လုပ်မယ်ဆိုတော့ ပိုပြီးတော့ မလုံခြုံဘူး။ သူတို့က လူငယ်တွေကို ရာချီပြီးသတ်နေတာ။ တစ်ခုခုဖြစ်လာနိုင်တယ်” အထက်ပါ လားရှိုး လူငယ်က ဆိုသည်။
အဆိုပါ အာဏာသိမ်း စစ်ကောင်စီမှ ပြုလုပ်ပေးသည့် သင်္ကြန်ကို မပါဝင်ဘဲ ဆုံးရှုံးသွားသည့် ဒီမိုကရေစီ မရမခြင်း စစ်အာဏာရှင်ကို ဆက်လက် ပြီး မကျင်းပခြင်းဖြင့်လည်း ငြိမ်းချမ်းစွာ ဆန္ဒပြသွားမည်ဟု လူငယ်များက ပြောသည်။
သကြန်ပွဲတော်သည် မျိုးရိုးထုံးတမ်းဖြစ်သည့်အလောက် ထုံးတမ်းမပပျောက်အောင် ကိုယ်နည်း ကိုယ်ဟန်ဖြင့် ပြုလုပ်နိုင်ကြောင်း သျှမ်းပြည်နယ်တောင်ပိုင်း ပင်လုံမြို့ လူငယ်ကပြောသည်။
“ မျိုးရိုးအစဉ်လာတော့လုပ်မယ်။ ဒါပေမယ့် လမ်းပေါ်ထွက်ပြီး ဟို အရင်နှစ်တွေလိုတော့မလုပ်ဘူး။ ဥပမာ ဘုန်းကြီးကျောင်းတက်တာ။ အိမ်ကဘုရားကို ရေလောင်းပေးတာ။ ကျမတို့ နှစ်သစ်ကူးသွားနိုင်တာဘဲ။ ဒါဆိုရင် အစဉ်လာကိုထိန်းသိမ်းသလို၊ ကျမ တို့လည်း ဘေးကင်းတာပေါ့ ” ဟု ပင်လုံမြို့ လူငယ်ကပြောသည်။
ယခုနှစ်အတွင်း နှစ်သစ်ကူးသင်္ကြန်ကို မပြုလုပ်ကြရန်အတွက် မြို့နယ်အလိုက်စာထုတ်ထားကြောင်း၊ ကျဆုံးသွားသည့် သူများကို လေးစားခြင်းအားဖြင့် မပြုလုပ်ကျင်းပရန် အတွက် မေတ္တာရပ်ခံစာထုတ်ထားကြသည်။
ဖေဖော်ဝါရီ ၁ ရက်နေ့မှ စပြီး အကြမ်းဖက်စစ်ကောင်းစီမှ အာဏာသိမ်းယူပြီးနောက်ပိုင်း လူ ( ၆၀၀ )နီးပါး သေဆုံးသွားပြီး၊ ထိုထဲတွင် ကလေးငယ် ၄၀ ကျော်ပါရှိကြောင်း AAPP မှထုတ်ပြန်ကြေညာခဲ့သည်။
Leave a Comments