သျှမ်းပြည်မြောက်ပိုင်း နမ္မတူမြို့နယ် မန်လီကျေးရွာအတွင်း ယနေ့ (ဧပြီ ၆)ရက် နေ့လည် ၃နာရီဝန်းကျင် တွင် တိုင်းရင်းသားလက်နက်ကိုင် တပ်ဖွဲ့များကြား တိုက်ပွဲပြင်းထန်ပြီး၊ နေအိမ် (၃)လုံးမီးလောင်မှု ဖြစ်ပွားခဲ့ကြောင်း သတင်းရရှိသည်။
အဆိုပါ တိုင်းရင်းသားလက်နက်ကိုင်တပ်ဖွဲ့များမှာ RCSS/SSA နှင့် မြောက်ပိုင်းမဟာမိတ်တပ်ပေါင်းစုဖြစ်သည့် SSPP/SSA၊ TNLAတို့ ဖြစ်သည်။
“ မနက်ကတည်းက RCSS/SSA က ရွာထဲဝင်လာတယ်။ ရွာကလူတွေ အားလုံးဖယ်ပေးဖို့ ပြောပါတယ်။ ရွာမှာ အိမ်စောင့်ပဲကျန်ခဲ့တယ်။ အခုတော့ အိမ်စောင့်မယ့်သူကစ ထွက်ပြေးနေရတယ်။ ရွာထဲမှာ နေအိမ် (၃)လုံးကတော့ မီးလောင်နေတယ်” ဟု မန်လီကျေးရွာ မှ ဒေသခံ အမျိုးသား တဦးက ပြောသည်။
ယနေ့ မနက်ပိုင်းတွင် နမ္မတူမြို့နယ် မန်လီကျေးရွာအတွင်း တိုက်ပွဲဖြစ်ပွားနိုင်သဖြင့် RCSS/SSA မှ ရွာသားအားလုံးကို ပြောင်းရွှေ့ခိုင်းထားကြောင်း၊ လက်ရှိမှာ မန်လီကျေးရွာသားများသည် သီပေါမြို့ပေါ်သို့ ထွက်ပြေး တိမ်းရှောင်နေရကြောင်း လည်း မန်လီကျေးရွာ ဒေသခံ တဦးက ပြောသည်။
“ အခုတော့ ရွာမှာ ဘယ်သူမှ မကျန်တော့ဘူး။ အားလုံးက သီပေါမြို့ပေါ်ရောက်ပြီ။ ရွာထဲမှာက RCSS၊ ရွာပြင်မှာ တပ်ပေါင်းစု ရောက်နေတယ်။ ဘယ်လိုမှ အဆင်မပြေတော့ဘူး” ဟု အထက်ပါ ပုဂ္ဂိုလ်က ထပ်လောင်းပြောသည်။
လက်ရှိကာလသည် မြို့ပေါ်တွင်လည်း စစ်အာဏာရှင် အလိုမရှိ ဆန္ဒထုတ်ဖော်နေကြပြီး၊ နိုင်ငံရေး မတည်ငြိမ်မှုကြားတိုင်းရင်းသားလက်နက်ကိုင် အချင်းချင်း တိုက်ပွဲထပ်မံဖြစ်သည့်အတွက် သျှမ်းမြောက် သီပေါ၊ ကျောက်မဲ၊ နမ္မတူပြည်သူများအနေဖြင့် အလွန်ခက်ခဲလှကြောင်းလည်း ဒေသခံပြည်သူများက ပြောသည်။
“ တိုင်းရင်းသားအချင်းချင်း ဖြစ်နေတဲ့တိုက်ပွဲက ဘာကြောင့်ဆိုတာ စဉ်းစားလို့မရဘူး။ ကျနော်တို့ပြည်သူတွေရဲ့ မျက်နှာကို ထောက်ထားစေချင်တယ်။ ကျနော်တို့ အခု ဘာမှ လုပ်စားလို့မရဘူး။ စားဖို့ဆန်တောင်မရှိတော့ဘူး” ဟု မန်လီကျေးရွာ အသက် ၅၀ကျော် ဒေသခံ အမျိုးသား တဦးက သျှမ်းသံတော်ဆင့်ကို ပြောသည်။
ယခုကာလသည် သျှမ်းပြည်လူထုအတွက် အခက်အခဲဆုံးအချိန်ဖြစ်နေကြောင်း၊ တဖက်တွင်ကိုဗစ်-၁၉ ကူးစက်မြန်ရောဂါကြောင့် စီးပွားရေးမလုပ်ဆောင်နိုင်၊ တဖက်တွင် စစ်အာဏာသိမ်းမှုကြောင့် အဆင်မပြေနေချိန် တိုင်းရင်းသားအချင်းချင်း တိုက်ပွဲထပ်မံဖြစ်သည့်အတွက် ဝန်ထုပ်ဝန်ပိုး ပိုဖြစ်ေနေကြောင်းလည်း စစ်ရှောင်များကို ကူညီပေးနေသူများက ဆိုသည်။
“ အဖက်ဖက် မှာ အဆင်မပြေချိန် ဒီလိုကိုယ့်အချင်းချင်းပြန်တိုက်တော့ စိတ်တွေ မကောင်းဘူး။ ပြောစရာစကားတောင် မရှိတော့ဘူး။ ကိုယ့်အချင်းချင်းကြောင့် အိမ်တွေမီးလောင် လူတွေ သေကြေကြ၊ ဘဝတွေဆုံးရှုံးကြ ဒါတွေ သက်ဆိုင်ရာက လူတွေမြင်စေသိစေချင်တယ်” ဟု စစ်ရှောင်များကို ကူညီနေသည့် အမျိုးသား တဦးက ဆိုသည်။
လက်ရှိ တိုင်းရင်းသားအချင်းချင်းကြား တိုက်ပွဲပြင်းထန်မှုဖြစ်ပွားနေချိန် အကြမ်းဖက် စစ်ကောင်စီ အုပ်စုကလည်း သျှမ်းမြောက် နမ္မတူမြို့နယ် နှင့် သီပေါမြို့နယ်ကြားရှိ ဂတ်စ်ပိုက်လိုင်းလုံခြုံရေး ဆိုသည့်အကြောင်းပြချက်ဖြင့် ဝင်ရောက်နေရာယူနေကြောင်းလည်း ဒေသခံများ၏ သတင်းပေးပို့ချက်အရသိရသည်။
သျှမ်းမြောက် တွင် မြောက်ပိုင်းမဟာမိတ် တပ်ပေါင်းစု နှင့် RCSS/SSA ကြား တိုက်ပွဲဖြစ်ပွားခဲ့သည်မှာ ၂လသာ ရှိလာခဲ့ပြီဖြစ်သော်လည်း လက်ရှိအချိန်ထိ အချင်းချင်းကြားတွေ့ဆုံဆွေးနွေးမှုမရှိကြဘဲ အပြန်အလှန် ငြင်းဆိုနေကြသည်။
ယနေ့ဖြစ်ပွားသည့် တိုက်ပွဲနှင့် တရွာလုံး ရွှေ့ပြောင်းခိုင်းသည့် ကိစ္စကို သျှမ်းသံတော်ဆင့်မှ RCSS/SSAနှင့် မြောက်ပိုင်းတပ်ပေါင်းစု ကို ဆက်သွယ်မေးမြန်း သော်လည်း ဖုန်းကိုင်ဖြေကြားခြင်းမရှိပေ။
ထိုတိုက်ပွဲကြောင့် အရပ်သားနေအိမ် ၃၀နီးပါး လက်နက်ကြီးသင့်ကာ မီးလောင် ပျက်စီးခဲ့ရပြီး ၊သေဆုံးသူ ၅ဦး ထက်မနည်းထိ ရှိကာ၊ ထိခိုက်ဒဏ်ရာရရှိသူ (၁၀) ဦး အထက်ရှိကြောင်း သိရသည်။
