သျှမ်းပြည်မြောက်ပိုင်း ကျောက်မဲခရိုင် သီပေါမြို့နယ် နမ့်လန်ကျေးရွာအုပ်စု၌ မိုးသည်းထန်စွာ ရွာသွန်းမှုကြောင့် ရေဘေးသင့်သည့်အိမ်ထောင်စု ၁၂၀၀ ကျော်၊ လူဦးရေ ၃ ထောင်ကျော် အတွက် ကျန်းမာရေးဆိုင်ရာ၊ ပြန်လည် ထူထောင်ရေးဆိုင်ရာအတွက် အကူအညီများစွာလိုအပ်နေကြောင်း သိရသည်။
မိုးဆက်တိုက်ရွာသွန်းပြီး တောင်ကျရေစီးဝင်မှုကြောင့် ကျေးရွာအုပ်စုအတွင်းရှိ အိမ်ခြေ ၁၂၁၄ အိမ်၊ လူဦး ရေ ၃၄၄၅ ဦး တို့၏နေအိမ်များ၊ အုတ်တံတိုင်းခြံစည်းရိုးများ ပျက်စီးပြိုလဲခြင်းနေအိမ် ပရိဘောဂ ပစ္စည်းများ ရေနှင့် အတူမျှောပါခြင်း၊ ကောက်ပဲသီးနှံများရေနစ်မြှုပ်ခြင်းနှင့် လမ်းများ၊ တံတားများလည်း ပျက်စီးမှုများ ရှိခဲ့ကြောင်း သက်ဆိုင်ရာ ဌာနများ သတင်းထုတ်ပြန်ချက်များအရသိရသည်။
“ရေကတော့ ကျသွားပြီ ဒါပေမယ့် ရေတိုက်စားမှုကြောင့် ပြန်လည်ထူထောင်ဖို့က ပြန်လုပ်ယူရအုံးမယ်၊ အပျက် အစီးလဲများတယ်။ အိမ်အလုံးလိုက်ပျက်စီးတာတွေ တစ်ချို့အိမ် အိုးခွက် ပန်းကန်တွေ အိမ်ယာ ခင်းတွေ ဘာမှ မကျန်တဲ့အိမ်တွေလဲ ရှိတယ်။ ပြန်လည်ထူထောင်ရေး တော်တော်လုပ်ယူရမယ့် သဘော ရှိတယ်။ လမ်းပန်း ဆက်သွယ်ရေးလဲ အရမ်းပျက်စီးသွားတယ်၊ လမ်းတွေက ရေတိုက်စားတော့ အရမ်း ပျက်စီးတယ်” ဟု နမ့်လန်ဒေသခံလည်းဖြစ် သျှမ်းလူငယ်ကွန်ယက် TYN ပြောရေးဆိုခွင့်ရှိသူ စိုင်းနော်ဆိုင် ကပြောသည်။
ဂျွန်လ ဆန်းပိုင်းမှစ၍ မိုးသည်းထန်စွာ ရွာသွန်းမှုကြောင့် သီပေါမြို့နယ် နမ့်လန်တိုက်နယ် ကျေးလက်ဒေသခံများ ရေကြီးမှုဒဏ်ဆက်တိုက်ခံနေရသည်ဟု ဒေသခံများပြောချက်အရသိရသည်။
“လမ်းပြုပြင်ရေး အထူးအဖွဲ့ ၆ က လာပြီးတော့ ရေလမ်းကြောင်းလွှဲဖို့ လာတိုင်းတာပြီး သွားပြီ လုပ်ငန်းစဖို့ပဲ လိုတော့တယ်၊ မနေ့က ရေလမ်းကြောင်းလွှဲဖို့ သူတို့က လမ်းကြောင်းသွားရှာတယ် ” ဟု စိုင်းနော်ဆိုင် က ဆက်ပြောသည်။
ယခုကဲ့သို့အခြေနေမျိုး ထပ်မံမကြုံရစေရန် ရေတိုစီမံကိန်း နှင့် ရေရှည်စီမံကိန်း ခုချမှတ်သွားမည်ဖြစ် ကြောင်း၊ ရေတိုစီမံကိန်းတွင် ရေကြီးလာလျှင် ရေလမ်းကြောင်းလွှဲထုတ်နိုင်ရန်၊ ရေရှည်စီမံကိန်းတွင် ပြုန်းတီးသွားသည့် သဘာဝသစ်တောများ ပြန်လည်စိမ်းလန်းစိုပြေရန်အတွက် သစ်တောထိန်းသိမ်းရေး ၊ သစ်ပင်စိုက်ပျိုးရေးများ လုပ်ဆောင်သွားရန် လိုအပ်သည်ဟုလည်း စိုင်းနော်ဆိုင် ကပြောသည်။
Leave a Comments