တောင်ကြီး ညောင်ဖြူစခန်းရပ်ကွက်ရုံးမီးလောင်ရာကူညီပေးသူ (၄)ဦးထက်မနည်း စစ်ကောင်စီမှ ဖမ်းဆီးသွား

0

သျှမ်းပြည်တောင်ပိုင်း တောင်ကြီးမြို့ ညောင်ဖြူစခန်းရပ်ကွက် အုပ်ချုပ်ရေးမှူးရုံးမီးလောင်ရာ သွားရောက် မီးငြိမ်းသက်ရာ တွင် ကူညီပေးသည့်သူ (၄)ဦးထက်မနည်း အကြမ်းဖက် စစ်အုပ်စုမှ ဖမ်းဆီးသွားကြောင်းစုံးစမ်းသိရသည်။

ယမန်နေ့ (ဧပြီ ၄)ရက် ည ၈နာရီဝန်းကျင်တွင် တောင်ကြီးမြို့ ညောင်ဖြူစခန်းရပ်ကွက်ရုံးတွင် ပေါက်ကွဲသံ နှင့်အတူ မီးလောင်မှု ဖြစ်ပွားကာ ရပ်ကွက်နေပြည်သူများက မီးကူငြိမ်းသက်ပေးခဲ့သည်။

ညောင်ဖြူရပ်ကွက် အုပ်ချုပ်ရေးမှူးရုံးမီးငြိမ်းသွားပြီးနောက် မီးငြိမ်းကူရာတွင် ပါဝင်သည့် အရပ်သား(၄)ဦးထက်မနည်း ကို အကြမ်းဖက် စစ်ကောင်စီ အုပ်စုက ရပ်ကွက်နေအိမ်ထဲသို့ ဝင်ရောက်ကာ ဖမ်းဆီးခေါ်ဆောင်သွားကြောင်း တောင်ကြီးမြို့ အမည်မဖော်လိုသူ တဦးက သျှမ်းသံတော်ဆင့်ကို ပြောသည်။

“မနေ့ညက နေအိမ်တစ်တအိမ်ထဲမှာ ၄ ယောက် ဖမ်းသွားတယ်လို့ပြောတယ်။ ဒီမနက်လည်း စစ်ကားတွေ (၇) စီးလောက် ညောင်ဖြု စခန်းရပ်ကွက်ထဲမှာ ရှိနေတယ်။ မီးသွားငြိမ်းသတ်ကူတဲ့ ဦးလေးလည်း ပျောက်နေတယ်လို့တော့ ကြားတယ်။” အမည်မဖော်လိုသူ အမျိုးသား တစ်ဦးက သျှမ်းသံတော်ဆင့် ကိုပြောသည်။

အကြမ်းဖက်စစ်အုပ်စု ဖမ်းဆီးသွားသည့် ဦးရေအတိအကျကို သိရှိနိုင်ရန် အတွက် ဆက်လက်စုံစမ်းနေဆဲ ဟု အထက်ပါ အမျိုးသား က ပြောသည်။

အဆိုပါ ရပ်ကွက်အုပ်ချုပ်ရေးမှူးရုံး မီးလောင်ရသည့် အကြောင်းရင်းကို လက်ရှိအချိန်ထိ မသိရှိရသေးပေ။

စစ်အာဏာသိမ်းပြီးနောက် မြန်မာတဝှမ်းလုံး ရပ်ကွက်အုပ်ချုပ်ရေးမှူးရုံး၊ ရဲစခန်းရုံး နှင့် စစ်တပ်ဆက်နွယ်သည့် စီးပွားရေး လုပ်ငန်းရုံးတချို့ မီးလောင်မှုဖြစ်ပွားခဲ့ကြောင်း သိရသည်။

ထိုမီးလောင်သည့်အချိန်ကို ပြန်ကြည့်မည်ဆိုပါက စစ်အာဏာသိမ်းပြီးနောက် ည(၈)နာရီ အပြင်မထွက်ရ ဆိုသည့် အချိန်တွင်သာ မီးလောင်နေသဖြင့် ပြည်သူများ၏ လက်ချက်မဖြစ်နိုင်ကြောင်းလည်း ပြည်သူများက တညီတညွတ်တည်း ပြောဆိုလိုက်ကြသည်။

Leave a Comments