တောင်ကြီးမြို့ ယနေ့(မတ် ၂၆)ရက် တွင် အကြမ်းဖက်စစ်ကောင်စီ မှ ကူညီကုန်းရပ်ကွက်တွင်နေထိုင်သည့် သူ (၂)ဦးကို ဖမ်းဆီး ခေါ်ဆောင်သွားကြောင်း သတင်းရရှိသည်။
အကြမ်းဖက် စစ်ကောင်စီ အုပ်စုသည် ယနေ့ တောင်ကြီးမြို့ ရှိ ရပ်ကွက်များတွင် တလမ်းဝင် တလမ်းထွက် ဖြင့် ပြည်သူများကို လိုက်လံ ခြိမ်းခြောက်မှုပြုလုပ်နေပြီး၊ သေနတ်ဖြင့် ရမ်းသန်း ပစ်ခတ်မှုများလည်း ရှိကာ ပြည်သူနေအိမ်များလည်း ပျက်စီးနေကြောင်း၊ နေအိမ်အတွင်းသို့ မျက်ရည်ယိုဗုံးများ ပစ်ခြင်းလည်း ပြုလုပ်နေကြောင်း တောင်ကြီး ဒေသခံများက ပြောသည်။
“ ဒီနေ့ဆန္ဒပြသူမဟုတ်ဘဲ ရပ်ကွက်ထဲမှာနေတဲ့သူ ၂ဦးကို ဆွဲသွားတယ်။ နေအိမ်ထဲထိ မျက်ရည်ယိုဗုံးတွေပစ်တယ်။ အသက်ကြီးတဲ့သူတွေ ကလေးတွေ အရမ်းဒုက္ခရောက်တယ်” ဟု ကူညီကုန်းတွင် နေထိုင်သည့် အမျိုးသမီး တဦးက ပြောသည်။
လက်ရှိမှာ မျက်ရည်ယိုဗုံးကို နေအိမ်ထဲထိ ပစ်ခတ်မှုကြောင့် အသက်ကြီးသူများ၊ ကလေးများ နာကျင်ခံစားနေရကြောင်း၊ နေအိမ်တွင်လည်း လုံခြုံမှုမရှိတော့ကြောင်း ၎င်း အမျိုးသမီးက ပြောသည်။
“ နေအိမ်ထဲကို ခဲနဲ့ ပေါက်တယ်။ မျက်ရည်ယိုဗုံးနဲ့ပစ်တယ်။ ပြည်သူတွေ အိမ်ထဲနေလည်း မလုံခြုံတော့ဘူး။ အာဏာရှင် စနစ် အမြန်ကျဆုံးဖို့ လိုတယ်” ဟု တောင်ကြီး မြို့မတွင်နေထိုင်သူ တဦးက ပြောသည်။
လက်ရှိ အချိန်ထိ အကြမ်းဖက် စစ်ကောင်စီအုပ်စုသည် ရပ်ကွက်ထဲတွင် လူများဖမ်းဆီးနေခြင်း၊ ပြည်သူများကို သေနတ်ပစ်ဖောက်ပြီး နည်းမျိုးစုံဖြင့် ခြိမ်းခြောက်မှု ပြုလုပ်နေကြောင်း သိရသည်။
ယမန်နေ့တွင် တောင်ကြီးမြို့ ရပ်ကွက်များတွင် အကြမ်းဖက်စစ်ကောင်စီ သေနတ်ပစ်ခတ်မှုကြောင့် လူငယ် (၅)ဦးထက်မနည်း သေဆုံးမှုရှိပြီး ၊ ဖမ်းဆီးခံရသည့် အမျိုးသား၊ အမျိုးသမီး စုစုပေါင်း ၅၀ကျော်ခန့်ရှိကြောင်းလည်း တောင်ကြီးဒေသခံများက ပြောသည်။
Leave a Comments