သျှမ်းရှေ့ ကျိုင်းတုံမြို့နယ် အဝင်၊ အထွက် ဂိတ်များတွင် စောင့်ဆိုင်းကာ အကြမ်းဖက် စစ်ကောင်စီအုပ်စုမှ ပြည်သူများကို တင်းကြပ်စွာ စစ်ဆေးမှု ပြုလုပ်နေကြောင်း စုံစမ်းသိရသည်။
နိုင်ငံတော်၏ အာဏာကို စစ်တပ်မှ သိမ်ယူပြီး ဖေဖော်ဝါရီ ၁ရက် မှစတင်ကာ ကျိုင်းတုံမြို့နယ်အတွင်း စစ်ဆေးမှု တင်းကြပ်လာသော်လည်း ယခုရက်ပိုင်းမှာ စစ်အင်အား အလုံးအရင်းဖြင့် စစ်ဆေးမှုများကို ပြုလုပ်နေကြကြောင်း ကျိုင်းတုံ ဒေသခံများ ပြောပြချက် အရသိရသည်။
“ အာဏာသိမ်းကတည်းက စစ်တပ်က နေရာတိုင်းရောက်လာတယ်။ ဒါပေမယ့် ဒီ၂ရက် ၃ရက် က တော့ မြို့ အဝင်အထွက် ဂိတ်တွေမှာ စစ်အင်အား ၂၀ကျော် ၃၀ နီးပါးနဲ့ ဆိုင်ကယ်။ ကားတွေကို စစ်တယ်။ စစ်ဆေးမှုကလည်း အရင်ကထက် ကြမ်းတယ်” ဟု ကျိုင်းတုံ ဒေသခံ အမျိုးသားတဦးက သျှမ်းသံတော်ဆင့်ကို ပြောသည်။
ကျိုင်းတုံမြို့ ဝင်ဂိတ်များတွင် အကြမ်းဖက်စစ်ကောင်စီအုပ်စုမှ ကျေးရွာမှ မြို့ပေါ်သို့ တက်လာမည့် သူများကို ပိုပြီး တင်းကြပ်စွာစစ်ဆေးကြောင်းလည်း ဒေသခံများက ထပ်လောင်းပြောသည်။
“ မိုင်းခတ်၊ မိုင်းယန်း ဘက်ကလမ်းက ပိုစစ်တယ်။ ရွာထဲကနေ မြို့ပေါ်လာရင်ပိုစစ်တယ်” ဟု ကျိုင်းတုံမှာ စိုင်းတစ်က ပြောသည်။
ကျိုင်းတုံမှ တခြားမြို့ သို့ သွားပြီး ရောင်းဝယ်လုပ်ရန် ခက်ခဲနေကြောင်း၊ မြို့ ဝင်၊ထွက်လမ်းအားလုံး စစ်ဆေးမှုပြီး ကားဈေးလည်းတက်နေသဖြင့် သွားလာမှု ခက်ခဲနေကြောင်းလည်း သိရသည်။
“ အခုနောက်ပိုင်း ရောင်းဝယ်သူတွေခက်ခဲတယ်။ လမ်းသွားလည်းခက်တယ်။ ကားဈေးတွေကလည်း တဦးလျှင် ၅ထောင်ကျပ်ကနေ အခု ၄သောင်းကျပ်၊ ၅သောင်းကျပ် ထိ တက်သွားတယ်” ဟု စိုင်းတစ် က ပြောသည်။
သျှမ်းရှေ့ ကျိုင်းတုံသည် မိုင်းလား ဒေသ၊ UWSA နှင့် ထိုင်းနယ်စပ်ဒေသကို သွားလာရာ အချက်အခြာကျသည့် နယ်မြေတခုဖြစ်သည်။
