မြန်မာပြည်တဝှမ်း စစ်အာဏာရှင် ကို ဆန့်ကျင်တဲ့အနေနဲ့ အသံတိတ် (Silence Strike) ကို ယနေ့ (မတ် ၂၄)ရက်မှာ သျှမ်းပြည်ရှိ မြို့တိုင်းနီးပါးပြုလုပ်ကြပါတယ်။
သျှမ်းပြည်ရဲ့ နယ်စပ်ဒေသတွေမှာ Silence Strike သပိတ်ပြုလုပ်ကြပေမယ့် အောင်မြင်မှု အပြည့်အဝမရ ကြကြောင့် သျှမ်းပြည်တောင်ပိုင်း လဲချားမြို့၊ လင်းခေးမြို့၊ ပင်လုံမြို့၊ လွိုင်လင်မြို့၊ စသည့်မြို့ငယ်များတွင် အသံတိတ်သပိတ်များ မပြုလုပ်ကြကြောင်း သိရပါတယ်။
အသံတိတ် (Silence Strike) အနေနဲ့ ဈေးဆိုင်တွေ၊ စူပါးမာကတ်တွေ၊ စားသောက်ဆိုင်တွေ ပိတ်ထားပြီး ပြည်သူတွေအနေနဲ့ လမ်းပေါ်မထွက်ဘဲ တမြို့လုံးတိတ်ဆိတ်စွာနေခြင်းဖြင့် ဆန္ဒပြကြပါတယ်။
ထိုအသံတိတ်သပိတ်ပြုလုပ်ရခြင်းသည် အာဏာရှင်ကို ဆန်ကျင်ရာတွင် ကျရှုံးသွားတဲ့ သူရဲကောင်းတွေအတွက် အသံတိတ် ဆန္ဒပြခြင်းဖြစ်ပါတယ်။
မြန်မာ-ထိုင်း နယ်စပ် တာချီလိတ်မြို့ နဲ့ မြန်မာ-တရုတ် နယ်စပ် မူဆယ်မြို့မှာ အသံတိတ် သပိတ်ကို ပြုလုပ်ကြရန် တိုက်တွန်းပြောခဲ့ပေမယ့် ရာခိုင်နှုန်းအောင်မြင်မှု မရှိခဲ့ကြပေ။
“ ကျနော်တို့ မူဆယ်မှာက Silence Strike ရာနှုန်းပြည်မအောင်မြင်ဘူး။ လမ်းပေါ်သွားလာနေကြသေးတယ်။ ခပ်များများကတော့ တရုတ်လူမျိုးတွေဖြစ်တယ်” လို့ မူဆယ်မြို့ ဒေသခံ စိုင်းလှ က ပြောပါတယ်။
အလားတူ ထိုင်း- မြန်မာနယ်စပ် တာချီလိတ်မြို့တွင်လည်း အသံတိတ်သပိတ်တွေ မပြုလုပ်နိုင်ခဲ့ကြောင်းသိရပါတယ်။
“ တာချီလိတ်မှာတော့ အေးဆေးပဲ။ အပြင်ထွက်နေကြတယ်။ ဘာမှ မဖြစ်သလိုဘဲ။ တစ်ခြားမြို့တွေနဲကွာတာပေါ့” လို့ တာချီလိတ်တွင် အလုပ်သွားလုပ်သူတစ်ဦးကပြောပါတယ်။
သျှမ်းပြည်အတွင်းရှိ တချို့ မြို့ငယ်တွေမှာလည်း အသံတိတ်သပိတ်ကို မသိရှိကြောင်းနဲ့ မပြုလုပ်ကြောင်းတွေ့ရပါတယ်။
“ လင်းခေးမှာတော့မလုပ်ဘူး။ သူတို့ ဒီအသံတိတ်သပိတ်ကို မသိကြဘူးထင်တယ်။ အေးဆေးပဲ အပြင်ထွက်သွားလာနေကြတာပဲ” လို့ လင်းခေးမြို့ ဒေသခံတစ်ဦး အမျိုးသမီးကပြောပြပါတယ်။
အသံတိတ် သပိတ်ကို မပြုလုပ်ရတဲ့ အကြောင်းရင်းကို လဲချားဒေသခံ စိုင်းကွမ်း က “ ကျနော်တို့မြို့ကသေးတယ်လေ။ တခုခုဆိုသူတို့သောင်းကြမ်းနိုင်တယ်။ ကျနော်တို့အတွက် လုံခြုံရေးကသိပ်မရှိဘူး။ နေ့ကအကောင်း ညဆိုလာဖမ်းမှာ ကြောက်နေရတယ်” လို့ သျှမ်းသံတော်ဆင့်ကိုပြောပါတယ်။
သျှမ်းပြည် မြို့တော်ဟုတင်စားကြတဲ့ တောင်ကြီးမြို့ မှာတော့ အသံတိတ်သပိတ်ကို အောင်မြင်စွာ ပြုလုပ်နိုင်ခဲ့ကြောင်း လည်း ဒေသခံများက ဆိုကြပါတယ်။
“ ဒီနေ့ကတော့ အသံတိတ်သပိတ်ကို တနိုင်ငံလုံးလုပ်ကြတယ်။ တောင်ကြီးမှာလည်းလုပ်တယ်။ ဈေးပိတ်ထားတယ်။ ကျနော်တို့လည်း ဆိုင်ပိတ်ထားတာပေါ့ အိမ်မထွက်ဘူး။ တချို့ကမသိလို့ ဆိုင်ဖွင့်တာရှိတယ်။ သူတို့ပြန်ပိတ်သွားတယ်” ဟု တောင်ကြီးမြို့ဒေသခံတစ်ဦးကပြောသည်။
သီပေါမြို့တွင်လည်း စစ်အာဏာရှင်ဆန်ကျင်သည့်လူထုသပိတ် လမ်းပေါ်မထွက်တော့ဘဲ နေအိမ်ထဲတွင် နေကာ ဆန္ဒထုတ်ဖော်မှု ပြုလုပ်ကြောင်း ဒေသခံများ ပြောပြချက် အရသိရသည်။
“ ဒီနေ့တော့ကျမတို့ဆန္ဒမထွက်ပြကြဘူး။ အသံတိတ်သပိတ်အနေနဲ့ ကျမတို့က အိမ်မှာပဲနေတယ်။ အပြင်မထွက်ဘူး။ ဆိုင်ခန်းတွေလဲပိတ်ထားကြတယ်” ဟု သီပေါမြို့ဒေသခံတစ်ဦးကပြောသည်။
ဖေဖော်ဝါရီ (၁)ရက်မှ စတင်ကာ နိုင်ငံတော်ရဲ့ အာဏာကို စစ်တပ်မှ သိမ်းယူခဲ့ပြီးနောက် မြန်မာပြည်တဝှမ်း အကြမ်းဖက် စစ်အာဏာရှင်ကို နေ့စဉ်နဲ့ အမျှ ဆန့်ကျင် ဆန္ဒပြကြပါတယ်။
မြန်မာတဝှမ်း တွင် စစ်အာဏာကို ဆန့်ကျင်ဆန္ဒပြမှုကြောင့် အကြမ်းဖက် စစ်ကောင်စီ ၏ ရိုက်နှက်ဖမ်းဆီး သေနတ်ပစ်သတ်မှုကြောင့် ကျဆုံးသွားသည့် ပြည်သူ ( ၂၇၅)ဦးရှိသွားပြီဖြစ်ပြီး၊ ဖမ်းဆီးးခံရသူ (၂၈၁၂)ဦးရှိကြောင်း သိရပါတယ်။
