တောင်ကြီးမြို့ ရတနာ သီရိရပ်ကွက် အတွင်း ငြိမ်းချမ်းစွာ ဆန္ဒထုတ်ဖော်နေသည့် ပြည်သူများကို စစ်ကောင်စီ လက်နက်ကိုင်အဖွဲ့ က ယနေ့ (မတ် ၂၁)ရက် နေ့လည်ပိုင်းမှာ ရာဘာကျည်ဖြင့် အကြမ်းဖက်ဖြိုခွင်းကာ ပြည်သူ ၈ဦး ခန့် ဒဏ်ရာရရှိပြီး၊ တစ်ဦးဖမ်းဆီးခံရကြောင်း သတင်းရရှိသည်။

လက်ရှိအချိန်ထိ စစ်ကောင်စီ လက်နက်ကိုင်တပ်ဖွ့ဲက ရတနာသီရိ ရပ်ကွက်အတွင်း ရာဘာကျည်၊ အသံမိုင်း၊ မျက်ရည်ယိုဗုံးများဖြင့် အရပ်သားနေအိမ်အတွင်းထိ ပစ်ခတ်မှုများပြုလုပ်နေသဖြင့် ပြည်သူ(၈)ဦး၊ ဒဏ်ရာရရှိပြီး၊ တစ်ဦးကိုလည်း ဖမ်းဆီးခေါ်ဆောင်သွားကြောင်း သိရသည်။

“ ထိခိုက်ဒဏ်ရာရသူ ၈ဦးခန့်တော့ရှိမယ်။ ရာဘာကျည်ထိတာက တော့ မိန်းကလေး ၂ဦး၊ ယောင်္ကျား၁ဦးပါ။ မိန်းကလေးတယောက်က သတိလစ်သွားတယ်။ တယောက်တော့ အောက်ပိုင်းထိတယ်။ အမျိုးသားက ဦးခေါင်းထိတယ်။ အိမ်ထဲထိပစ်ခတ်နေတယ်။ တယောက်ကိုလည်းဖမ်းဆီးသွားတယ်” ဟု တောင်ကြီး ဒေသခံတဦး ပြောပြချက်အရသိရသည်။

လက်ရှိ အချိန်ထိ အာဏာသိမ်းစစ်ကောင်စီ အဖွဲ့သည် အရပ်သား ရာဘာကျည်၊ မျက်ရည်ယိုဗုံး၊အသံမိုင်း ကို ရမ်းပစ်နေခြင်း၊ အရပ်သားနေအိမ်ကိုလည်း ဝင်ရောက်ဖျက်ဆီးခြင်းများပြုလုပ်နေကြောင်း၊ သိရသည်။

ထို့အပြင် ရတနာသီရိရပ်ကွက်နေပြည်သူများကိုလည်း အာဏာသိမ်းစစ်ကောင်စီ က ခြိမ်းခြောက်မှုမျိုးစုံလုပ်နေကြောင်း တောင်ကြီး ဒေသခံများပြောပြချက် အရသိရသည်။

တောင်ကြီးမြို့ စစ်အာဏာရှင် ဆန့်ကျင်ဆန္ဒထုတ်ဖော်သည့် လူထုသပိတ်ကို အာဏာသိမ်းစစ်ကောင်စီက နည်းမျိုးစုံ အကြမ်းဖက် ပစ်ခတ်ဖြိုခွင်းနေသည့်ကြားက ပြည်သူများကလည်း နည်းမျိုးစုံဖြင့် ဆန္ဒထုတ်ဖော်နေကြောင်းသိရသည်။